1 “ህንተ ሞርክያና ኦለታናዉ ብያ ዎደ፥ ኡንቱንቱ ፓራቱ፥ ፓራ ጋረቱነ ኡንቱንቱ ኦላንቻቱ ህንተፐ ዳርና በኢደ፥ ኡንቱንቶ ያዮፕተ፤ አያዉ ጎፐ፥ ህንተና ግብጼፐ ከሴዳ መꬍና ጎዳይ ህንተ ጾሳይ ህንተናና ደኤ። 2 ህንተ ኦላ ዶማናፐ ካሰቲደ፥ ቄሲ ስንꬃዉ አꬊደ ሀዋዳን ያጎ፤ 3 ‘ህንተኖ እስራኤልያ አሳቶ፥ ስስተ፤ ህንተ ሀች ህንተ ሞርክያና ኦለታናዉ ሀኒታ። ስም ህንተ ዎዛናይ ዳጋሞፖ፤ ያዮፕተ፤ ኡንቱንቱ ስንꬃን ኮኮሮፕተነ ሻባረቶፕተ። 4 አያዉ ጎፐ፥ መꬍና ጎዳይ ህንተ ጾሳይ ህንተናና ብያ ድራዉ፥ ህንተ ሞርክያ ኦሊደ፥ ህንተንቶ ጾኑዋ እማና’ ያጎ።

5 “ኦላ ጋዳዋቱ ኡንቱንታ ሀዋዳን ያግኖ፤ ‘ኦራꬃ ጎልያ ኬጺደ ገልቤና አሳይ ደኦፐ፥ እ ሀ ኦላን ሀይቂና፥ ሀራ አሳይ አ ጎልያ ገለናዳን፥ እ ጎለ ስሞ። 6 ዎይ ዎይንያ ቶኪደ፥ አ አይፍያን ናሸትቤና ኡራይ ደኦፐ፥ እ ሀ ኦላን ሀይቂና፥ ሀራ አሳይ አ ዎይንያ አይፍያን ናሸተናዳን፥ እ ባረ ጎለ ስሞ። 7 ማጫ አሳ ጊግሲደ አክቤና አሳይ ደኦፐ፥ እ ሀ ኦላን ሀይቂና፥ ሀራ አሳይ እዞ ማችያ አከናዳን፥ እ ባረ ጎለ ስሞ’ ያግኖ።

8 “ጋዳዋቱ ጉጂድካ አሳዉ ሀዋዳን ያግኖ፤ ‘ሀ አሳ ግዶን ያይያ አሳይነ ህርግያ አሳይ ኦንነ ደኦፐ፥ እ ባረ ላገቱዋ ዎዛናካ ያሻን ሴርሰናዳን እ ባረ ጎለ ስሞ’ ያግኖ። 9 ጋዳዋቱ ሀዋ አሳዉ ኦድ ዉርስያ ዎደ፥ ጭታዉ ጭታዉ ኦላ ጋዳዋቱዋ ዶርኖ።

10 “እት ካታማ ኦላናዉ ቢደ ህንተ አኮ ማትያ ዎደ፥ ኮይሮቲደ ሳሩዋን ኡንቱንቱ ኩሽያ እማናዳን ኦችተ። 11 ኡንቱንቱ ሳሩዋን ባረንቱ ኩሽያ እሚደ፥ ባረንቱ ግምቢያ ፐንግያ ዶዪደ ህንተና ገልሶፐ፥ ሄ ካታማን ደእያ አሳይ ኡባይ ህንተንቶ ሀጋዝኖነ ዴጾ ኦሱዋ ህንተንቶ ኦꬅኖ። 12 ሽን ሄ ካታማ አሳይ ህንተንቶ ሳሩዋን ኩሽያ እመናን እጺደ፥ ህንተናና ኦላዉ ጊጎፐ፥ ህንተ ሄ ካታማ ዩሹዋ ዶድተ። 13 መꬍና ጎዳይ ህንተ ጾሳይ ኡንቱንታ ህንተንቶ አꬅ እምያ ዎደ፥ ሄ ካታማን ደእያ አቱማ አሳ ኡባ ማሻን ዉርስተ። 14 ሽን ማጫ አሳ፥ ናናቱዋ፥ መህያነ ካታማ ግዶን ደእያ ኡባባ ኦሞዱዋ ኦꬂደ ህንተንቶ አኪተ። ቃይ መꬍና ጎዳይ ህንተ ጾሳይ ህንተንቶ እምያ ህንተ ሞርከቱዋ ኦሞዱዋን ጎኤትተ። 15 ህንተ ደኢያሳፐ ሃኪደ ደእያ ካታማቱዋካ ኦይቂያ ዎደ፥ ሄዋዳን ኦꬂታ።

16 “ሽን መꬍና ጎዳይ ህንተ ጾሳይ ህንተንቶ ላታ ኦꬂደ እምያ ጋድያን ሸምፑዋና ደእያዋ እትባነ አሸናን ዎꬍተ። 17 መꬍና ጎዳይ ህንተ ጾሳይ አዛዜዳዋዳን፥ ሂተቱዋ፥ አሞረቱዋ፥ ካናነቱዋ፥ ፓርዘቱዋ፥ ሂዌቱዋነ ያቡሳቱዋ ዉርሲደ ዎꬍተ። 18 ሄዌ ꬋዮፐ፥ ኡንቱንቱ ባረንቱ ጾሳቶ ጎይንያ ቱና ኦሱዋ ህንተ ኦꬃናዳን ህንተና ታማርሳና፤ ሄዋን ህንተ መꬍና ጎዳ ህንተ ጾሳ ቦላ ናጋራ ኦꬃና።

19 “ካታማ ኦይቃናዉ ዩሹዋ ዶድ፥ ዳሮ ጋላሳ ኦለቲደ ጋምእያ ዎደ፥ አን ደእያ አይፍያ እምያ ምꬃ ካልታን ቃንጾፕተ፤ ኡንቱንቱ አይፍያ ሚተፐ አትና፥ ኡንቱንታ ቃንጾፕተ። አያዉ ጎፐ፥ ህንተ ዩሹዋን ዶዲደ ኦልያዌ አሳፐ አትና፥ ደምባን ደእያ ምꬃ ግደና። 20 ሽን ህንተ ኤርያ አይፍያ እመና ሀራ ምꬃቱዋ ቃንጺደ፥ ህንተናና ኦለትያ ካታማይ ኩንዳና ጋካናዉ፥ ሄዋን ዶድያ ጌሱዋ ኬጽተ።