1 ሙሴ ጉጂድካ እስራኤልያ አሳዉ ሀዋዳን ያጌዳ፤ 2 “ሀእ ታዉ ጼታነ ላታሙ ላይꬃ ግዴዳ ድራዉ፥ ሀዋፐ ስንꬃናዉ ህንተና ካለꬃናዉ ዳንዳይከ፤ ሄዋ ቦላካ መꬍና ጎዳይ ታና፥ ‘ኔን ዮርዳኖሳ ሄፍንꬃ ፕናካ’ ያጊደ ኦዴዳ። ፓይ. 20:12 3 መꬍና ጎዳይ ህንተ ጾሳይ ህንተ ስንꬃን ሀመቲደ ህንተና ካለꬃና። ሄዋን ደእያ ካዉተꬃቱዋ እ ዉርስያ ድራዉ፥ ኡንቱንቱ ቢታ ህንተ ላታና። ቃይ መꬍና ጎዳይ ጌዳዋዳን ኢያሱ ህንተና ካለꬃና። 4 መꬍና ጎዳይ አሞረ ካተቱዋ ስሆናነ ኦጋ ጾኒደ፥ ኡንቱንቱ ቢታ ꬋይሴዳዋዳን፥ ህንተ ሞርከቱዋካ ሄዋዳን ኦꬃና።ፓይ. 21:21-35 5 መꬍና ጎዳይ ኡንቱንታ ህንተንቶ አꬅ እማና፤ ህንተ ኡንቱንቱ ቦላ ታን ህንተና አዛዜዳዋዳን ኦꬃና። 6 ምንተ፤ አይነ ባዋ፤ ያዮፕተ። ኡንቱንታ በኢደ ዳጋሞፕተ። አያዉ ጎፐ፥ መꬍና ጎዳይ ህንተ ጾሳይ ህንተናና ግዳናዋ። እ ህንተና የገና ዎይ አገና” ያጌዳ።

7 ሄዋፐ ጉይያን፥ ሙሴ ኢያሳ ጼሲደ፥ እስራኤልያ አሳ ኡባ ስንꬃን ሃዋዳን ያጌዳ፥ “ምና፤ ገንጫ። አያዉ ጎፐ፥ ኔን ሀ አሳና እትፐ መꬍና ጎዳይ ኡንቱንቱ ማይዛ አዋቶ እማና ጊደ ጫቄዳ ቢታ ገልሳሳ፤ ሄ ቢታካ ኡንቱንታ ላትሳሳ። 8 እ መꬍና ጎዳይ ባረ ሁጲያዉ ኔናና ግዲደ ኔና ካለꬃና። እ ኔና ኦለና፤ አይነካ ኔና አገና። ሄዋ ድራዉ፥ ያዮፓ፤ ነ ዎዛናን ዳጋሞፓ” ያጌዳ። ኢያሳ 1:5፤ እብራ. 13:5

9 ሙሴ ሀ ህግያ ጻፊደ፥ መꬍና ጎዳ ጫቁዋ ታቦታ ቶክያ ቄሰ ግድያ ሌዊያ ናናቶነ እስራኤልያ ጭማቶ ኡባዉ እሜዳ። 10 ሙሴ ኡንቱንታ ሀዋዳን ያጊደ አዛዜዳ፤ “አጩ ኡባይ አቶ ጌተትያ ላፑንꬃ ላይꬃ ዉርሰꬃን፥ ቦንቼትያ ዳስያ ባላ ጋላሳን፥ ዛረ. 15:1፤ 16:13-15 11 መꬍና ጎዳ ህንተ ጾሳ ስንꬃ እ ዶሬዳ ሳኣ አዉ ጎይናናዉ እስራኤልያ አሳይ ኡባይ ሺቅያ ዎደ፥ ኡንቱንቱ ስስያዋዳን ናባብተ። 12 ኡንቱንቱ ኡባይካ ስሲደ፥ መꬍና ጎዳዉ፥ ህንተ ጾሳዉ፥ ያይያዋ ታማራና ማላ፥ ሀ ህግያ ቃላ ኡባ አማነቲደ ፖላና ማላ፥ አሳ፥ አቱማነ ማጫ፥ ናናቱዋነ ህንተ ጋድያን ደእያ ካረ ቢታ አሳ እትፐ ሺሽተ። 13 ሀ ህግያ ቃላ ኤረና ኡንቱንቱ ናናይካ ዮርዳኖሳ ፕኒደ፥ ህንተ ላታናዉ ብያ ጋድያን ህንተ ደእያ ላይꬃ ኡባን ሀ ህግያ ስስኖ፤ መꬍና ጎዳዉ፥ ህንተ ጾሳዉ፥ ያይያዋ ታማርኖ” ያጌዳ።

14 ሄዋፐ ጉይያን፥ መꬍና ጎዳይ ሙሳ ሀዋዳን ያጌዳ፤ “በአ፥ ኔን ሀይቂያ ጋላሳይ ማቴዳ። እ ካለሰትያ አዛዙዋ አዉ ታን እማና ማላ፥ ኢያሳ ጼሳደ፥ ኔን አናና እትፐ ዱንካንያ ግዶ ገልተ” ያግና፥ ሙሴነ ኢያሱ ዱንካንያኮ ሺቄድኖ።

15 መꬍና ጎዳይ ሄ ዱንካንያን ሻርያ ቱሳን ኡንቱንቶ ቆንጬዳ፤ ሄ ሻርያ ቱሳይካ ዱንካንያ ፐንግያን ኤቄዳ።

16 መꬍና ጎዳይ ሙሳ ሀዋዳን ያጌዳ፤ “ኔን ማታን ሀይቃደ ነ አዎቱዋን ጋከታሳ። ኔፐ ጉይያን፥ ሀ አሳይ ታዉ አማነተናዋ ግዳና፤ ታን ኡንቱንቱና ዎꬄዳ ጫቁዋ መንꬃና። ኡንቱንቱ ታና አጊደ፥ ሻርሙጻቱዋዳን፥ ባረንቱ ላትያ ጋድያን ደእያ ኤቃቱዋ ካላና። 17 ሄዌ ሀንያ ዎደ፥ ታ ሀንቁ ኡንቱንቱ ቦላ ኤጽ ከሳና። ታንካ ኡንቱንታ አጋ አጋና፤ ታ ሶምኡዋ ኡንቱንቱፐ ዎራ ዛራና። ያትና፥ ኡንቱንቱ ꬋያና፤ ጮራ መቱነ ባሻይ ኡንቱንቱ ቦላ ያና። ሄ ዎድያን ኡንቱንቱ፥ ‘ቱሙ ሀ መቱ ጋኬዳዌ ኑ ጾሳይ ኑ ግዶን ባይናዋ ግሻሳ ግደኔ?’ ያጊደ ኦቻና። 18 ሀራ ጾሳቶ ጎይኒደ፥ ኡንቱንቱ ሀኔዳ ኢታባ ድራዉ፥ ታን ሄ ጋላስ ታ ሶምኡዋ ሙለካ ኡንቱንቱፐ ዎራ ዛራና።

19 “ሄዋ ድራዉ፥ ሀእ ሀ ማዝሙርያ ጻፋደ፥ እስራኤልያ አሳ ኡባ ታማርሳ። ሀ ማዝሙሪ ታዉ እስራኤልያ አሳ ቦላ ማርካ ግዳና ማላ፥ ኡንቱንታ የጽሳ። 20 ኡንቱንቱ ማይዛ አዋቶ ገሌዳ ቃላዳን፥ ማꬃይነ ኤሳይ ጎግያ ቢታ ታን ኡንቱንታ ገልሴዳዋፐ ጉይያንነ ኡንቱንቱ ም ካሊደ፥ ዎዛናይ ሙሜዳዋፐ ጉይያን፥ ሀራ ጾሳቶ ጎይኒደ፥ ታና ካꬋና፤ ታ ጫቁዋካ መንꬃና። 21 ዳሮ መቱነ ባሻይ ኡንቱንቱ ቦላ ጋኬዳ ዎደ፥ ሀ ማዝሙሪ ኡንቱንቱ ናናቱ ዶናፐ ድገተና ድራዉ፥ ኡንቱንቱ ቦላ ማርካ ግዳናዋ። አያዉ ጎፐ፥ ታን ጫቄዳ ቢታ ኡንቱንታ ብሮ ገልሰናን ደእሽን፥ ሃናናካ ኡንቱንቱ ቆፕያ ቆፋ ኤራክቻድ” ያጌዳ። 22 ሙሴ ሄ ጋላስ ሄ ማዝሙርያ ጻፊደ፥ እስራኤልያ አሳ ታማርሴዳ።

23 ሄዋፐ ጉይያን፥ መꬍና ጎዳይ ኔዌ ናኣ ኢያሳ ሀዋዳን ያጊደ አዛዜዳ፤ “ምና፥ ገንጫ፤ ታን ኡንቱንቶ እማናዉ ቃላ ገሌዳ ቢታ እስራኤልያ አሳ አፋደ ገልሳሳ። ታንካ ኔናና እትፐ ግዳና” ያጌዳ። ፓይ. 27:3፤ ኢያሳ 1:6

24 ሙሴ ሀ ህግያ ቃላቱዋ ኮይሮፐ ዉርሰꬃ ጋካናዉ፥ ጻፊደ ዉርሴዳዋፐ ጉይያን፥ 25 መꬍና ጎዳ ጫቁዋ ታቦታ ቶክያ ሌዋቱዋ ሀዋዳን ያጊደ አዛዜዳ፤ 26 “ህጊ ጻፈቴዳ ሀ ማጻፋ አፍተ፤ መꬍና ጎዳ ህንተ ጾሳ ጫቁዋ ታቦታ ማታን ዎꬅተ። ሄዋን እ ህንተ ቦላ ማርካ ግዳና ማላ ያን ዎꬅተ። 27 ህንተ ዎይሳ ማካላንቼንቶነ ዎይሳ ሞርግያ ꬉሌፈንቶ ታን ኤራይ። በእተ፥ ታ ህንተናና ደኤዳ ላይꬃ ኡባን ህንተ መꬍና ጎዳዉ ኢታ ማካላ፤ ሽን ታን ሀይቃ ክችና፥ ኡባ ዎይሳ ማካላንቴ? 28 ሄዋ ድራዉ፥ ሀዋ ኡባ ታ ኡንቱንቶ ኦዳናዉ፥ ሳሉዋነ ሳኣ ታ ኡንቱንቱ ቦላ ማርካያናዉ፥ ህንተ ዛርያ ካፓቱዋ ኡባነ ደርያ ካለꬅያ አሳ ኡባ ታዉ ሺሽተ። 29 ታ ሀይቄዳዋፐ ጉይያን፥ ህንተ ሙለ ኢታ አሳ ግዳናዋነ ታን ህንተና ታማርሴዳ አዛዙዋፐ ዎራ ስማናዋ ታን ኤራይ። እ ኦꬆፕተ ጌዳ ኢታባ ህንተ ኩሽያን ኦꬂደ፥ መꬍና ጎዳ ሀንቀꬅያ ድራዉ፥ ስንꬃፐ ይያ ዎድያን ህንተ ቦላ ኢታ ቦሻ አሀና” ያጌዳ።

30 ሄዋፐ ጉይያን፥ ሙሴ ሀ ማዝሙርያ ቃላቱ ዉራና ጋካናዉ፥ ሺቄዳ እስራኤልያ ሺቁዋ ኡባ ስሲደ ኦዴዳ።