1 “ሀ ታ ህንተ ስንꬃን ዎꬄዳ አንጁነ ሸቃይ ህንተ ቦላን ጋክያ ዎደ፥ መꬍና ጎዳይ ህንተ ጾሳይ ህንተና ላልያ ሀራ ካዉተꬃቱዋ ግዶን ደኢደ፥ ሀዋ ህንተ ሀሳያና። 2 ሄ ዎደ ህንተነ ህንተ ናናይ መꬍና ጎዳኮ፥ ህንተ ጾሳኮ፥ ስሚደ፥ ህንተ ኩመንꬃ ዎዛናፐነ ህንተ ኩመንꬃ ሸምፑዋፐ ታን ሀች ህንተና አዛዜዳ ቃላዉ አዛዘቶፐ፥ 3 ሄዋን መꬍና ጎዳይ ህንተ ጾሳይ ህንተ ኦሞዱዋ ዛራና፤ እ ህንተንቶ ቃረታና። መꬍና ጎዳይ ህንተ ጾሳይ ህንተና ላሌዳ ካዉተꬃቱዋ ኡባ ግዶፐካ ዛሪደ ሺሻና። 4 ቢታ ጋጻ ጋካናዉ ላለቶፐካ፥ ሄዋፐ መꬍና ጎዳይ ህንተ ጾሳይ ህንተና ዛሪደ ሺሻና። 5 ህንተ አዎቱ ካሰ ላቴዳ ቢታ ህንተካ ላታናዳን ጾሳይ ህንተ ጾሳይ ህንተና ሄ ቢታዉ አሀና። ያን ህንተና ህንተ አዎቱዋፐ አꬂደ ዱረያናነ ህንተ ፓይዱዋ ዳርሳና።

6 “ህንተ ደኡዋን ደአና ማላነ መꬍና ጎዳ ህንተ ጾሳ ህንተ ኩመንꬃ ዎዛናፐነ ህንተ ኩመንꬃ ሸምፑዋፐ ሲቃናዳን፥ እ ህንተንቶነ ህንተ ናናዉ አዛዘትያ ዎዛና እማና። 7 መꬍና ጎዳይ ህንተ ጾሳይ ሀ ሸቃ ኡባ ህንተ ሞርከቱነ ህንተና የደርስያዋንቱ ቦላ አሀና። 8 ህንተካ ዛሪደ መꬍና ጎዳዉ፥ ህንተ ጾሳዉ፥ አዛዘታና፤ ታን ሀች ህንተና አዛዝያ አ አዛዙዋካ ናጋና። 9-10 ህንተ ሀ ህግያ ማጻፋን ጻፈቴዳ መꬍና ጎዳ ህንተ ጾሳ አዛዞቱዋነ አ ዎጋቱዋ ናጋናዉ መꬍና ጎዳዉ፥ ህንተ ጾሳዉ፥ አዛዘቶፐ፥ ቃይ ህንተ ህንተ ኩመንꬃ ዎዛናፐነ ህንተ ኩመንꬃ ሸምፑዋፐ መꬍና ጎዳኮ፥ ህንተ ጾሳኮ፥ ስሞፐ፥ እ ህንተና ህንተ ኩሽያ ኦሶ ኡባን፥ ህንተ ኡሉዋ አይፍያን፥ ህንተ መህያ አይፍያንነ ህንተ ቢታ አይፍያን ዳርሲደ አንጃና። አያዉ ጎፐ፥ ካሰ ህንተ አዎቱዋ አንጅያዋን ናሸቴዳዋዳን፥ መꬍና ጎዳይ ሀእ ህንተና አንጅያዋንካ ናሸታና።

11 “ታን ሀች ህንተና አዛዝያ ሀ አዛዙ ሄዋ ኬሻ ዴጾ ግደና፤ ህንተፐ ሃኮካ ግደና። 12 ህንተ፥ ‘ኑን ስሲደ አዛዘታናዳን፥ ሳሉዋ ከሲደ ኑዉ ዎꬃናዌ ኦኔ?’ ጌናዳን ሳሉዋን ደኤና። ሮመ 10:6-8 13 ‘ኑን ስሲደ አዛዘታናዳን፥ ኑዉ አባ ፕኒደ አሀናዌ ኦኔ?’ ጌናዳን አባ ሄፍንꬃን ደኤና። 14 ቃላይ ህንተንቶ ሎይꬅ ማታን ደኤ፤ ህንተ ኦꬃናዳን፥ ቃላይ ህንተ ዎዛናንነ ህንተ ዶናን ደኤ።

15 “በእተ፥ ታን ሀች ህንተ ስንꬃን ደኡዋነ ሎኦተꬃ፥ ሀይቁዋነ ባሻ ዎꬃድ። 16 ህንተ መꬍና ጎዳ ህንተ ጾሳ ሲቅያዋን አ ኦግያን ሀመትያዋንነ አ አዛዙዋ፥ አ አዋዩዋነ አ ዎጋ ናግያዋን፥ ታን ሀች ህንተና አዛዝያ መꬍና ጎዳዉ፥ ህንተ ጾሳዉ፥ አዛዘቶፐ፥ ህንተ ደኡዋን ደአናነ ጮራታና፤ ቃይ ህንተ ላታናዉ ገልያ ጋድያን መꬍና ጎዳይ ህንተ ጾሳይ ህንተና አንጃና።

17 “ሽን ህንተ ዎዛናይ ዎራ ስምና፥ ህንተ አዛዘተናን እጾፐ፥ ሀራ ጾሳቶ ጎይኖፐ፥ ቃይ ኡንቱንቶ ኦꬆፐ፥ 18 ህንተ ዉር ꬋያናዋ ታን ሀች ህንተንቶ ኦዳይ። ዮርዳኖሳ ፕኒደ፥ ህንተ ላታናዉ ብያ ጋድያን ህንተ ላይꬃይ አዱቀና።

19 “ታን ህንተ ስንꬃን ደኡዋነ ሀይቁዋ፥ አንጁዋነ ሸቃ ዎꬄዳዎ ሀች ሳሉዋነ ሳኣ ህንተ ቦላ ማርካያና፤ ስም ህንተነ ህንተ ዛሪ ደኡዋን ደአና ማላ፥ ደኡዋ ዶርተ። 20 መꬍና ጎዳ ህንተ ጾሳ ሲቅተ፤ አ ቃላ ስስተ፥ አዉ አዛዘትተ፤ አናና ኦይቀትተ። ሄዋዳን ሀኖፐ፥ መꬍና ጎዳይ ህንተዉ ደኡዋ። ካሰ ህንተ ማይዛ አዋቶ፥ አብራሃማዉ፥ ይሳቃዉነ ያቆባዉ እማናዉ ጫቄዳ ጋድያን ህንተነ ህንተ ናናይ አዱሳ ላይꬃ ደአና” ያጌዳ። ዶመꬃ 12:7፤ 26:3፤ 28:13