1 መꬍና ጎዳይ ሲና ደርያን እስራኤላቱዋና ጫቀቴዳ ጫቁዋ ቃላ ቦላ ሀራ ሞኣበን ኡንቱንቱና ጫቀታናዉ ሙሳ አዛዜዳ ጫቁዋ ቃላቱ ሀዋንታ። 2 ሙሴ እስራኤልያ አሳ ኡባ ጼስ ሺሺደ፥ ኡንቱንቶ ኦድያባይ ሀዋ፦

“መꬍና ጎዳይ ህንተ ስንꬃን ግብጼ ካትያ ቦላ፥ አ ኦላንቻቱዋ ኡባ ቦላነ አ ቢታ ኡባ ቦላ ኦꬄዳዋነ ጋꬄዳዋ ህንተ አይፍያን በኤድታ። 3 ሄ ኢታ መቶቱዋ፥ ዎልቃማ ማላልስያዋንታነ ኦራꬃባቱዋ ህንተ አይፍያን በኤድታ። 4 ሽን ሀች ጋካናዉ፥ መꬍና ጎዳይ ህንተንቶ አኬክያ ዎዛና፥ ጼልያ አይፍያነ ስስያ ሀይꬃ እምቤና። 5 ጾሳይ ኦይታሙ ላይꬃ ኩመንꬃ ህንተና ቢታ ባዙዋን ካለꬅያ ዎደ፥ ህንተ ማዩ ህንተ ቦላፐ ዉርቤና፥ ህንተ ጫማይካ ህንተ ገድያፐ ዉርቤና። 6 ህንተ ምያ ኡክꬃይ፥ ኡሽያ ዎይንያ ኤሳይ፥ ዎይ ሀራ ማꬆይያ ኡሻይ ባዋ፤ ꬋዮፐካ መꬍና ጎዳይ ህንተንቶ ጾሳ ግድያዋ ኤርሳድ።

7 “ኑን ሀ ሳኣ ጋኬዳ ዎደ፥ ሀሰቦና ካቲ ስሆንነ ባሳነ ካቲ ኦግ ኑናና ኦለታናዉ ዬድኖ፤ ሽን ኑን ኡንቱንታ ጾኔዶ። ፓይ. 21:21-35 8 ኡንቱንቱ ቢታ አኪደ፥ ሮቤላነ ጋዳ ዛራቱ ቃይ ምናሰ ዛርያፐ ባጋዉ ላታ ኦꬂደ እሜዶ። ፓይ. 32:33

9 “ህንተ ኦይቆባይነ የꬎባይ ህንተንቶ አንጀታና ማላ፥ ሀ ጫቁዋ ቃላቱዋ አማነቲደ ፖልተ። 10 ሀቼ ህንተ ኡባይ፥ ዛርያ ካፓቱ፥ ጭማቱ፥ ሱንꬃቱነ እስራኤልያ አሳይ ኡባይ ሀዋን መꬍና ጎዳ ስንꬃን፥ 11 ህንተ ናናቱዋና፥ ህንተ ማጫ አሳና ህንተ ግዶን ደእያ ካረ ቢታ አሳናነ ህንተ ሶን ምꬃ ቆርያነ ሃꬃ ትክያ ኦሳንቻቱዋና እትፐ፥ ሀዋን ኤቄድታ። 12 መꬍና ጎዳና፥ ህንተ ጾሳና፥ ቃላ ጫቁዋ ገላናዉ፥ መꬍና ጎዳና ጫቁዋን ማዬዳዋ ፖላናዉ ጊጊደ ሺቄድታ። 13 መꬍና ጎዳይ ህንተና ባረ አሳ ኦꬂደ ምንሳና፤ ህንተንቶነ በን ህንተ ማይዛ አዋቶ፥ አብራሃማዉ፥ ይሳቃዉነ ያቆባዉ ገሌዳ ጫቁዋ ቃላዳን፥ እ ህንተንቶ ጾሳ ግዳናዋ። 14 ታን ሀ ጫቁዋ ሚኖ ቃላ ጫቁዋ ኡዳ ዎꬅያዌ ህንተ ጻላላና ግዲደ፥ 15 ሀቼ ሀዋን ኑናና መꬍና ጎዳ ኑ ጾሳ ስንꬃን ኤቄዳ ኑ ኡባናነ ስንꬃናዉ ያና ኑ የለታ ኡባና ዎꬃይ።

16 “ኑን ግብጼን ዋን ደኤደንቶነ ቃይ ሀዋ ጋካናዉ፥ ኦግያን ደእያ ካዉተꬃቱዋ ግዱዋና ዋን አꬊደ ዬደንቶ ኤሪታ። 17 ኡንቱንቱ ግዶን ደእያ ቱና ኤቃ፥ ማሴዳ ምꬃ፥ ሹቻ፥ ብራነ ዎርቃ ኤቃ ምስለቱዋ በኤድታ። 18 ሀ ህንተፐ ኦንነ አቱማዋ ግድና ማጫዋ ግድና፥ እት ጎልያ አሳ ግድና ዛረ ግድና፥ መꬍና ጎዳፐ፥ ኑ ጾሳፐ፥ ሸርእ ጊደ፥ ሀራ ካዉተꬃቱዋ ጾሳቶ ጎይነናዳን ናገትተ። ሄዋ ኦꬅያ አሳይ ጫምያነ ዎꬍያ አይፍያ አይፍያ ምꬃ ጻጱዋ ግዳናዋ። እብራ. 12:15

19 “ሀ ጫቁዋ ቃላ ስሲደ፥ ባረ ዎዛናን፥ ‘ታ ሸንያን ታን ቦፐካ፥ አያ መቱነ ባዋ’ ያጊደ ባረና ጭሞፐ፥ ሄዋ ማላ አሳይ ሎኦቱዋ ቦላነ ኢታቱዋ ቦላ ባሻ አሀና። 20 መꬍና ጎዳ ሀንቁነ ቃናቲ ሄዋ ማላ አሳ ቦላ ኤጽ ከሳናፐ አትና፥ መꬍና ጎዳይ አ ማረና። ሀ ማጻፋን ጻፈቴዳ ሸቃ ኡባይ አ ቦላ ያና፤ ሳሉዋፐ ጋርሳ ባጋፐ አ ሱንꬃ መꬍና ጎዳይ ꬋይሳና። 21 መꬍና ጎዳይ ሀ ህግያ ማጻፋን ጻፈቴዳ ሸቃ ጫቁዋዳን ሄ አሳ እስራኤልያ አሳፐ ሻኪደ ꬋይሳና።

22 “ስንꬃፐ ይያ የለታይ፥ ህንተ ዛሪነ ሃኮ ደርያፐ ይያ ሀራ ቢታ አሳይ መꬍና ጎዳይ ህንተ ቦላ አሄዳ ቦሻነ ሀርግያ በአና። 23 ቢታ ኡባይ ዲንያንነ ማጽንያን ካመቲደ፥ አያ ጎአነ እመናዋ ግዳናዋ፤ አያነ ዘራናዉነ ሞክሳናዉ ዳንዳየተና፤ እን ማታይ ምꬃይ ድጨና። መꬍና ጎዳይ ባረ ሀንቁዋን ꬋይሴዳ ሶዶማዳንነ ጋሞራዳን፥ አዳማዳንነ ጻቦይማ ካታማቱዋዳን ሀናና። ዶመꬃ 19:24-25 24 ካዉተꬃ ኡባይ ሀዋዳን ያጋና፤ ‘መꬍና ጎዳይ ሀ ጋድያን ሀዋ ማላባ አያዉ ኦꬄዴ? ሀ ዎልቃማ ሀንቁዎ ጋሶ ግዴዳባይ አዬ?’ ያጋና።

25 “አሳይ ዛሪደ፥ ‘ኡንቱንቱ መꬍና ጎዳይ፥ ኡንቱንቱ አዎቱዋ ጾሳይ፥ ኡንቱንታ ግብጼፐ ከስያ ዎደ፥ ኡንቱንቱና ገሌዳ ጫቁዋ ቃላ መንꬄዳ ድራሳ። 26 ቃይ ኡንቱንቱ ቢደ፥ ኤረና ጾሳቶነ እ ኡንቱንታ ጎይኖፕተ ጌዳ ጾሳቶ ጎይኔድኖ። 27 ሄዋ ድራዉ፥ መꬍና ጎዳይ ሀንቀቲደ፥ ሀ ማጻፋን ጻፈቴዳ ሸቃ ኡባ ኡንቱንቱ ቦላ አሄዳ። 28 መꬍና ጎዳይ ዎልቃማ ሀንቁዋ ሀንቀቲደ፥ ኡንቱንቱ ጋድያፐ ኡንቱንታ ሾዲደ፥ ሀዋዳን ሀራ ቢታ የደርሴዳ’ ያጋና።

29 “ጹራ የዎቱ መꬍና ጎዳ ኑ ጾሳሳ፤ ሽን ኑን ሀ ህግያ ቃላ ኦꬃናዳን፥ ቆንጬዳ የዎቱ መꬍናዉ ኑሳነ ኑ ናናቱዋሳ።