9 ያትና፥ ኦሳንቻይ ባረ ዳቡሬዳ ዳቡራፐ አያ ዎꬍያ ደሜዴ? 10 ታን ቃይ፥ አሳ ናናቱ ዳቡሪደ ኦꬃና ማላ፥ ጾሳይ እሜዳ ገዲ ሎይꬅ ዴጾ ግድያዋ በኣድ። 11 ጾሳይ ኡባባ አ ዎድያን ዎድያን ሎይꬂደ ኦꬄዳ። ጾሳይ አሳ ዎዛናን መꬍናተꬃ ኦꬄዳ፤ ሄዋ ግዶፐነ፥ ጾሳይ ኦꬄዳዋ ኡባ ኮይሩዋፐ ዉርሰꬃይ ጋካናዉ፥ አሳይ ዉርሲደ ኤራናዉ ዳንዳየና። 12 ሄዋ ድራዉ፥ አሳይ ባረ ደኤዳ ላይꬃን ሎእያዋ ኦꬅያዋፐነ፥ ናሸትያዋፐ አꬍያዌ አያይነ ባይናዋ ታን አኬካድ። 13 ቃይ፥ አሳዉ አዉ አ ዳቡራዉ ዋጋ ግድያዌ ሙሳንነ ኡሻን ባረና ናሸችያዋ፤ ሄዌካ አዉ ጾሳፐ እመቴዳ እሞታ።

14 ጾሳይ ኦꬄዳዌ ኡባይ መꬍናዉ ደእያዋ ግድያዋ ታን ኤራድ፤ እ ኦꬄዳዋ ቦላን ጉጃናዉ ዎይ አፐ ሃ ጉꬃናዉ ዳንዳየተና። ጾሳይ ሄዋ ኦꬄዳዌ፥ አሳይ ባረዉ ያዪደ ቦንቻናሳ። 15 ሀእ ሀኒደ ደእያባይ ዎይ ስንꬃፐ ሀናናዉ ደእያባይ ኡባይ ካሰ አꬌዳ ዎድያን ሀኔዳዋ፤ አያዉ ጎፐ፥ ጾሳይ ካሰ ሀኔዳዌ ዛር ዛሪደካ ሀናናዳን ኦꬄ።

16 ቃይ ታን፥ ሳሉዋ ጉፋንꬃን ጌሻ ፕርዳ ሳኣን ኢታተꬃይ፥ ጽሎተꬃ ሳንካ ናጋራይ ደእያዋ በኣድ። 17 ታ ዎዛናን፥ “ጾሳይ ጽሉዋነ ኢታ ላኡዋካ ፕርዳዉ ሺሻና፤ አያዉ ጎፐ፥ ጾሳይ አላለ ኡባዉነ ኦሱዋ ኡባዉ ዎድያ ኬር ዎꬄዳ” ያጋደ ቆፓድ።

18 ቃይ ታን ታ ዎዛናን፥ “አሳይ ዶአቱዋፐ ኬከናዌ ኡንቱንታ በሳናዉ፥ ጾሳይ ኡንቱንታ ፓጬ” ያጋድ። 19 አያዉ ጎፐ፥ አሳ ግድና፥ ዶአቱዋ ግድናካ፥ ኡንቱንቱ ካጫይ እቱዋ፤ እቱ ሀይቂያዋዳን፥ የንኩካ ሀይቄ። ቃይ ላኡካ እት ጫርኩዋ ሸምፒኖ፤ ሄዋ ድራዉ፥ አሳቱካ ዶአቱዋፐ ኬክክኖ፤ ሄዌካ መላ። 20 ኡንቱንቱ ላኡካ እት ሳኣ ቢኖ፤ ላኡካ ቢታፐ መቴዳ ድራዉ፥ ቢታዉ ስሚኖ። 21 ያትና፥ አሳ ሸምፑ ሳሉዋ ፑደ ከስያዋነ ዶአቱዋ ሸምፑ ቢታ ጪማዉ ዱገ ዎꬍያዋ ሻኪደ ኤራናዉ ዳንዳይያዌ ኦኔ? 22 ሄዋ ድራዉ፥ አሳይ ባረ ኦꬄዳ ኦሱዋን ናሸትያዋፐ ኬክያዌ ሀራባይ አዉ ባይናዋ በኣድ። አያዉ ጎፐ፥ አዉ ደእያ ሎኦ ካጫይ ሄዋ ጻላላ። አስ ሀይቂ ክቾፐ አፐ ጉይያን ሀንያዋ በሳናዉ፥ አ ሀይቁዋፐ ጉየ አሀናዉ ዳንዳይያዌ ኦኔ?