1 ታን ታ ዎዛናን፥ “አነ ታዉ ዎልቃማ ናሸቻ እምያዌ አየንቶ፥ ቃይ ደእያ ደኡዋ ግዶንካ ሎኦባይ አየንቶ በአና” ያጋደ ቆፓድ፤ ሽን ሄዌካ መላ። 2 ኡባ ገደ ሚጭያዌ ኤያተꬃ ግድያዋ፥ ቃይ ዳሮ ናሸቻይካ አይነ ጎኤናባ ግድያዋ አኬካድ። 3 ሄዌ ሄዋ ግድ ኡት ደእሽን፥ አꬌዳ ኤራተꬃ ደማናዉ አሞታደ፥ ታ ዎዛና ዎይንያ ኤሳን ናሸቻደ፥ ሄዋ ሱጋናዉ ኤያተꬃን ቆፋ ቃቻድ። ቃይ አሳይ ሀ ሳኣ ቦላ ባረዉ ደእያ ቃንꬃ ዎድያ አꬅያ፥ ኡባፐ አꬍያ ሎኦ ኦጊካ ሀዋ ጋደ ቆፓድ።

4 ቃይ ሀራ እት ዎልቃማባ ኦꬃድ፤ ታዉ ደእያ ኬꬃቱዋ ኬጻድ፤ ዎይንያ ቱራካ ቶካድ። 1 ካታ. 10:23-27፤ 2 ኦዱዋ 9:22-27 5 ዱማ ዱማ አታክልትያነ አይፍያ አይፍያ ምꬃቱዋ ቶክያ ሳኣነ አሳይ ሸምፕያ ሳኣ ጋናትያዳን ሎይꬃደ ጊግሳድ። ሄ ሳኣን ዱማ ዱማ አይፍያ አይፍያ ምꬃቱዋካ ቶካደ፥ ድቻድ። 6 ሄ ድጭያ ምꬃቱዋ ኡሻናዉ፥ ሃꬃ ዳጋይያ ሳኣ ዜራደ ጊግሳድ። 7 አቱማነ ማጫ አይለቱዋ ሻማድ፤ ቃይ ታ ሶን የለቴዳ ሀራ አይለቱካ ታዉ ደኢኖ። ታፐ ካሰ የሩሳላመን ደኤዳ ኦዋፐነ ዳርያ መህያ፥ ዴሻነ ዶርሳ ዉድያ ሃራድ። 1 ካታ. 4:23 8 ታን ሞድያ ዱማ ዱማ ቢታቱዋፐ ቦንቼቴዳ ካተ ጎልያ ዱረታ አይሳደ፥ ዳሮ ዎርቃነ ብራ ታዉ ዳጋያድ። ቃይ፥ ታና ሳቢደ የጽያ አቱማነ ማጫ የꬃንቻቱዋ ቃጻራድ፤ ሄዋ ቦላካ፥ አሳዉ ናሸቻ እምያ ሎይꬅ ዳሮ ማጫ አሳካ ሺሻድ። 1 ካታ. 10:10፣ 14-22

9 ሄዋ ድራዉ፥ ታን ታፐ ካሰ የሩሳላመን ደኤዳ ኦፐነ አꬌዳ ዎልቃማ አሳ ግዳድ። ታ አꬌዳ ኤራተꬃይካ ታናና ዉርሰꬃይ ጋካናዉ ደኤዳ። 1 ኦዱዋ 29:25 10 ታ አይፊ ጼሌዳባነ ታ ዎዛናይ አሞቴዳባ ኡባ ደማድ፤ ታ አሳተꬃይ ኮይያ ናሸቻ ኡባካ ድጋበይከ። ታን ኦꬄዳ ኦሱዋ ኡባን ናሸታይ፤ ታ ዳቡራዉ ዎꬊካ ሄዋ። 11 ግዶ ሽን፥ ሄዋ ኡባ ኦꬃ ስማደ ታን አኬክያ ዎደ፥ ሎይꬅ ታን አዉ ዳቡሬዳዌ ኡባይካ መላ ግድያዋ በኣድ። ሳሉዋ ጉፋንꬃን ጎእያዌ አያይነ ባዋ፤ ኡባይካ ጫርኩዋ ኦይቃናዉ የደርስያባ ማላ።

12 ሄዋፐ ጉይያን፥ ታን አꬌዳ ኤራተꬃይ፥ ኤያተꬃይነ ጎሻይ አየንቶ ፓጫደ ኤራናዉ ቆፋ ዶማድ። ካትያ ኮታን ካተትያ ሀራ ካቲ ካሰ ኦሰቴዳዋፐ አꬍያ ሀራባ አይ ኦꬃኔ? 13 ታን ሀዋዳን ያጋድ፤ “ቱሙካ ፖኡ ꬉማፐ ኬክያዋዳን፥ አꬌዳ ኤራተꬃይ ኤያተꬃፐ ኬኬ። 14 ጭንጫ አሳቱ ባረንቱ ደንድያ ሳኣነ ቢደ ጋክያ ሳኣ ኤሪኖ፤ ሽን ኤያቱ ሄዋ ኡባ ኤርክኖ” ያጋድ። ግዶፐ አትና፥ ኡንቱንቱ ላኡዋ ዉርሰꬃይካ እቱዋ።

15 ታን ታ ዎዛናን፥ “ኤያ ጋክያ ካጫይ ታናካ ጋኬ፤ ያትና፥ ታን አꬌዳ ኤራንቻ ግድያዌ ታና አያ ማዲ?” ያጋደ ቆፓድ። ቃይ ታን ታ ዎዛናን፥ “ሀዌ ኡባባይካ መላ!” ያጋድ። 16 አያዉ ጎፐ፥ ኤይና አꬌዳ ኤራንቻ ግድና፥ ሀይቁዋፐ ሄፍንꬃን ስሚደ፥ አ ሀሳይያዌ ባዋ፤ ስንꬃፐ ይያ ላይꬃቱዋን ኑን ኡባይካ ዶገት አታና። ኤያይ ሀይቂያዋዳን፥ አꬌዳ ኤራንቻይካ ሀይቄ።

17 መቱዋፐ አትና፥ ጎእያዌ ባይና ድራዉ፥ ሀ ሳኣ ደኡ ታና ኢቴዳ። ሄዌካ መላ፤ ጫርኩዋ ኦይቃናዉ የደርስያባ ማላ። 18 ሳሉዋ ጉፋንꬃን ታን ሎይꬅ ዳቡራደ ደሜዳ ታ ማጹዋ ኡባ ታፐ ጉይያን ይያ ኡራዉ የጋደ ብያ ድራዉ፥ ታን ዳቡሬዳዌ ኡባይ ታና ኢቴዳ። 19 ታፐ ጉይያን ይያ ብታኒ አꬌዳ ኤራንቼንቶ ኤየንቶ ኦን ኤሪ? ሽን እ ኦና ግድናካ፥ ታን ሎይꬅ ዳቡሬዳዋነ ታ ጭንጫተꬃን ታን ደሜዳዋ ኡባ ባረዉ አኪደ፥ ጎዳ ግዳናዋ፤ ያቶፐ፥ ሄዌካ መላ።

20 ሄዋ ድራዉ፥ ሳሉዋ ጉፋንꬃን ሀዋ ኬሻ አያዉ ዳቡራድታሻ ጋደ ታ ዎዛናን ካዮታድ። 21 አስ ባረ ደኤዳ ላይꬃን ባረዉ ደኤዳ አꬌዳ ኤራተꬃን፥ ኤራንነ ሂላን ዳቡሪደ ደሜዳዋ ኡባ አይነ ዳቡርቤናዎ የጊደ ቤ። ሄዌካ ቃይ፥ ሀዳነ ልከ ግደናዋ። 22 ያትና፥ ሳሉዋ ጉፋንꬃን አሳይ ሎይꬅ ዳቡሪደ ኦꬄዳዋፐ ኡባፐ አያ ጎኣ ደሜዴ? 23 እ ባረ ደኡዋ ላይꬃን ዳቡርያ ዳቡራይ ኡባይ ካዮቶፐነ ካዮፐ ሀራባ አይነ አዉ ጉጀና፤ ሀራይ አቶ ቃማካ አ ሁጲ ቆፋፐ ሸምፐና፤ ግዶ ሽን፥ ሄ ኡባይካ መላ። ኢዮባ 5:7፤ 14:1

24 ሄዋ ድራዉ፥ አሳዉ ጎኣ ግድያዌ አዬ ጎፐ፥ አሳይ ባረ ዳቡሬዳባፐ ሚድነ ኡሺደ ናሸትያዋ። ሄ ናሸቻይካ ቃይ ጾሳ ኩሽያፐ እመቴዳዋ ግድያዋ ታን አኬካድ። ኤራ. 3:13፤ 5:18፤ 9:7፤ ሉቃሳ 12:19፤ 1 ቆሮ. 15:32 25 አያዉ ጎፐ፥ አ ሸነ ግዳናዋ ꬋዮፐ፥ ምን ኡሽናካ አሳዉ ናሸቻይ ሀቃን ቤቲ? 26 ጾሳ ናሸችያ ኡራዉ ጾሳይ ጭንጫተꬃ፥ ኤራተꬃነ ናሸቻ እሜ፤ ናጋራንቻዉ ማታ እ ዳቡሪደ ሺሻናዳን፥ ዳቡራ እሜ፤ ሽን እ ሺሼዳዋ ጾሳይ አኪደ፥ ባረዉ ያይያዎ ሀራዉ እሜ። ሄዋ ድራዉ፥ ሀ ኡባይካ ሀዳነ ጫርኩዋ ኦይቃናዉ የደርስያባ ማላ። ኢዮባ 32:8፤ ሌም. 2:6