1 ሀዌ፥ ዳዊታ ናኣ፥ የሩሳላመን ካተቴዳ ኤራንቻ ቃላ። 2 ሄ ኤራንቻይ፥ “ኡባባይካ መላ፤ ቃይ ኡባባይካ ሀዳፐ አꬌዳ መላ፤ ኡባባይካ ኡባና መላ” ያጌዳ። 3 ባረ ደእያ ሳን ኡባን፥ አሳይ ዳቡሪደ ኦꬅያዋን ኡባን አዉ ዎꬍ አዬ? 4 እት የለታይ አꬍያ ዎደ፥ ሀራ የለታይ ሳኣ ኦይቄ። ሽን ሀ ቢታይ መꬍናዉካ ላመተናን ደኤ። 5 አዋይ ዶሌነ ዉሌ፤ ቃይ ላኤንꬁዋካ ዶላናዉ ያ ዶሊያ ሳኣኮ ኤሌሌ። 6 ጫርኩ እት ገደ ገድሳ እት ገደ ሁጲሳ ጫርኬ፤ ቃይ ዩይ ዩይ አꬊደ፥ ስመረቲደ ዬ። 7 ጎግያ ሃꬃይ ኡባይ አባን ገሌ፤ ሽን አባይ ኩም ኤረና። ሄ ሃꬃይ ቃይካ ስሚደ ጎጋናዉ፥ ጉየ ባረ ፑልትያ ሳኣ ቤ። 8 ኡባባይካ ሳለꬅያባ። እ ዎይሳ ኬናዉ ሳለꬅንቶካ ኦድ ዉርሳናዉ ዳንዳየተና። አይፊ ጼሊደ፥ ካል ኤረና፤ ሀይꬃይካ ስሲደ፥ ታዉ ግዴዳ ግ ኤረና። 9 ካሰ ሀኔዳዌ ስንꬃናዉካ ስሚደ እ ሀናና፤ ቃይ ሀእ ሀኒደ ደእያባይካ ካሰ ሀኔዳዋ። ሄዋ ድራዉ፥ ሳሉዋ ጉፋንꬃን ኦራꬃባ ግያዌ አያይነ ባዋ። 10 ኦንነ፥ “በእተ! ሀዌ ኦራꬃባ” ጎፐ፥ ሄዌ ኦራꬃ ግደና፤ ሄዌ ኑን የለታናፐ ካሰ ባጋን ሀኔዳዋ። 11 ካሰ አꬌዳ ዎደቱዋን ሀኔዳባቱዋ ዛሪደ ሀሳይያዌ ባዋ፤ ጉየፐ ሀናናባቱዋካ ኡንቱንቱፐ ጉይያን ኦንነ ሀሳየና።

12 ታን ኤራንቻይ፥ የሩሳላመን እስራኤልያዉ ካተ ግዳደ ደኣድ። 13 ታን ቢታን ሳኣን ደእያዋ ኡባ ቆራ ቆራደ ኤራናዉነ አꬌዳ ኤራተꬃን ፕልጋ ጼላናዉ ታ ቆፋ ቃቻድ። ያታደ አሳ ኡባዉ ጾሳይ እሜዳ ደኡ ሎይꬅ ዳቡርስያባነ ናሸችያባ ግድያዋ አኬካድ። 14 ሳሉዋፐ ጋርሳ ባጋን ሀኔዳዋ ኡባ ታን በኣድ፤ ሽን ኡባባይካ መላ፤ ጫርኩዋ ኦይቃናዉ የደርስያዋ ማላ።

15 ጌላይ ስታናዉ ዳንዳየና፤ ቃይ ባይናባካ ፓይዳናዉ ዳንዳየተና።

16 ታን ዎን ታ ዎዛናን ሀዋዳን ያጋደ ቆፓድ፤ “ታፐ ካሰ የሩሳላመ ሞዴዳ ኡባቱዋፐ ታን ዎልቃማነ አꬌዳ ኤራንቻ ግዳድ። ጭንጫተꬃነ ኤራ ግያዌ እ አየንቶ ፓጫደ ኤራድ” ያጋድ። 1 ካታ. 4:29-31 17 ቃይ ታን አꬌዳ ኤራተꬃፐ፥ ጎሻፐነ ኤያተꬃፐ ግዱዋን ደእያ ዱማተꬃይ አየንቶ ኤራናዉ ሎይꬅ ዳቡራድ። ሽን ዉርሰꬃን ሄዌካ ጫርኩዋ ኦይቃናዉ የደርስያባ ማላ መላ ግድያዋ ኤራድ። 18 አꬌዳ ኤራተꬃይ ዳርያ ዎደ ካዮዪያባይ ዳሬ፤ ኤራይ ዳርያ ዎደካ ቃይ መቱ ዳሬ።