1 ሀዋፐ ካሊደ ጻፈቴዳ ሃሳያይ፥ ካትያ ልሙኤላ አታ ካትያ ልሙኤላ ታማርሴዳዋ።

2 “ላ ታ ናአዉ፥ ታ ኡሉዋፐ ዎꬌዳዎ፥ ታን ሺቀታደ የሌዳዎ፥ 3 ማጫ አሳን ነ ዎልቃ ዉርሶፓ፤ ሄ ካተቱዋ ባይዝያ ማጫ አሳቱዋን ነ አካታ ꬋይሶፓ።

4 “ልሙኤላ፥ ሀዌ ካተቶ በሰና፤ ዎይንያ ኤሳ ኡሽያዌ ካተቶ በሰና፤ ማꬆይያ ኡሻ ኡሽያዌ አሳ ቦላ ሱንቴዳዋንቶ በሰና። 5 ኡንቱንቱ ኡሽያ ዎደ ህግያ ባሊኖ፤ ናቀቴዳ አሳ ማታ ሸነኮ ጊኖ። 6 ማꬆይያ ኡሻ ሀይቃና ሀንያ ኡራዉነ ሳአይ ኢቴዳ ኡራዉ እምተ። 7 ኡንቱንቱ ባረንቱ ማንቆተꬃነ ባረንቱ ቱጋ ደኡዋ ዶጋና ማላ ኡሽኖ።

8 “ባረንቱ መቱዋ ኦዳናዉ ዳንዳየናዋንቱ ድራዉ ኔን ኦዳ፤ ማድያዌ ባይናዋንቱ ማታ ድራዉ ኔን ደንዳ። 9 ኡንቱንቶ ሱረ ፕርዳ ፕርዳ፤ ህዬሳቱዋነ መቶታንቻቱዋ ማታ ናጋ” ያጋደ ታማርሳዱ።

10 ዎዛናማ ማቻቶ ኦን ደማናዉ ዳንዳዪ? እንቁዋ ግያ አልኦ ሹቻፐካ እዛ አልአዉ። 11 እ አስናይ እዞ ኡባባንካ አማኔ፤ አዉ ደአናዉ በስያዋፐ አያይነ ፓጨና። 12 አ ባረ ደኡዋ ላይꬃ ኡባን አዉ ሎኦባፐ አትና፥ ኢታባ ኦꬁኩ።

13 ሱፍያነ ላይኑዋ አ ኮያደ፥ ናሸታደ ባረ ኩሽያን ኦꬃዉ። 14 አ ዛልአንቻቱዋ ማርካባቱዋ ማላ፤ ባረ ቁማ ሃኮ ቢታፐ አያዉ። 15 አ ባረ ሶ አሳዉ ቁማ ካꬃናዉነ ባረ ማጫ ቆማቶ ኦሱዋ ግሻናዉ፥ ሳአይ ብሮ ቃማ ደእሺና ደንዳዉ። 16 ጋድያ አ ኮያደ ሻማዉ፤ ባረ ኩሽያን ኦꬃደ ደሜዳ ሻሉዋን ዎይንያ ቱራ ቶካዉ።

17 አ ጎባ ኦሳንቻ ግድያዋ ጻላላ ግደናን፥ ምኖነ ጭንጫ አሳ። 18 አ ባረ ዎꬍያ ደማናዉ ምናደ ዛልአዉ፤ አ ኦꬃደ ቃምስያ ድራዉ፥ ባረ ጾምፕያ ኤለ ቶይሱኩ። 19 አ ባረ ስንድሪታን ሱቃደ፥ ባረ አፍላ ዳዳዉ።

20 አ ህዬሳቶነ መቶታንቻቶ ባረዋፐ ጮ እማዉ።

21 እ ሶ አሳይ ኡባይ ሆእያ ማዩዋ ማዬዳ ድራዉ፥ ሻቻይ ቡክንቶ፥ አ ህርጉኩ። 22 አርሳ ቦላን ሂጽያ ማዩዋ ስካዉ፤ ሊኑዋፐ ዳደቴዳ ኦቻ ቴራ ማላትያ ማዩዋካ ባረዉ ማያዉ።

23 ጋድያ ጭማቱ ሺቅያ ዱቡሻን እ አስናይ ቦንቼቴዳ አሳ።

24 ሊኑዋፐ ማዩዋነ ሳቂያ ኦꬃ ኦꬃደ፥ ዛልአንቻቶ ዛልአዉ።

25 እዛ ምኖነ ቦንቾ አሳ፤ ይያ ላይꬃቶ እዛ ኡባካ ህርጉኩ። 26 አꬌዳ ኤራን አ ሃሳያዉ፤ አማንꬅያ ዞሪ እ እንጻርሳፐ ከሴ። 27 አ ባረ ሶ አሳ ደኡዋ እንጀያናዉ ኡባ ገደ ኦሱዋ ኦꬃደ ደአዉ፤ አዛላ ሀኑ እ ቦላን ቤት ኤረና።

28 እዝ ናናቱ ደንድ ኤቂደ፥ እዞ ናሺኖ፤ እዝ አስናይካ እዞ ጋላቲደ፥ 29 “ሎኦባ ኦꬄዳ ዳሮ ማጫ አሳቱ ደኢኖ፤ ሽን ኔን ኡንቱንቱ ኡባፐ አꬋሳ” ያጌ።

30 ማላ ሎኦተꬃይ አላለ ከሰና፤ ፑልካ ꬋያና፤ ሽን መꬍና ጎዳዉ ያይያ ምሽራታ፥ እዛ ጋላተታናዉ በሳዉ። 31 አ ኦꬄዳባዉ ኡባዉ እዉ እዝ ኩሽያ ዛርተ፤ እዛ ኦꬄዳ ኦሱ ኡባይ ዳባባን እዞ ጋላትሶ።