1 ጾሳ ጎልያ ገልያ ዎደ፥ ነ ገድያ አኬካደ ታንጋ። ስሳናዉ ማታ ሺቅያዌ፥ ኤያቱ ያርሹዋ ሺሽያዋፐ አꬌ፤ አያዉ ጎፐ፥ ኡንቱንቱ ኢታ ኦሱዋ ኦꬂደ ደእያዋ ኤርክኖ። 2 ነ ዶናን ሃሳያናዉ፥ ጾሳ ስንꬃንካ ብዳናዉ ኤሌሎፓ። ቃይ እትባ ጾሳዉ እማና ጋደ ነ ዎዛናን ኤሌላደ ገፓ ክቾፓ፤ አያዉ ጎፐ፥ ጾሳይ ሳሉዋን፥ ኔን ቃይ ሀዋን ሳኣን ደኣሳ፤ ሄዋ ድራዉ፥ ነ ሃሳይያ ቃላይ ጉꬃ ግዶ። 3 ህርጋይ ዳርያ ዎደ፥ ቃማን አኩሙካ ዳሬ፤ ሄዋዳንካ፥ ብደꬃ ዳሩ ኤያተꬃ ቃላ ከሴ። 4 ጾሳዉ ኔን ገፔዳዋ ፖላናዉ ጋምኦፓ፤ አያዉ ጎፐ፥ ጋምእያ ኤያቱዋን ጾሳይ ናሸተና። ሄዋ ድራዉ፥ ኔን ገፔዳዋ ኡባ ፖላ። ማዝ. 66:13-14 5 እትባ ጾሳዉ ገፒደ፥ ፖለናን አግያዋፐ ኮይሮ ገፐናን አግያዌ ሎአ። 6 ኔና ነ ዶናይ ናጋራን የገናዳን፥ ነ ዶና ዛዋፐ አꬌዳ የዳ ኦꬆፓ፤ ቃይ ጾሳዉ ኦꬅያዎ፥ “ካሰካ ሀዋ ታን አኬከናን ገፓድ” ጎፓ። አያዉ ጎፐ፥ ሄዋ ጾሳይ ሎይꬅ ሀንቀꬅያ ድራዉ፥ ኔን ዳቡራደ ደሜዳዋ፥ ነ ኩሽያ ኦሱዋ ኡባ እ ባረ ሀንቁዋን ቁጪደ ꬋይሳናዉ ዳንዳዬ። 7 ዳሮ አኩሙዋ አኩመቶፐነ ዎይ ቃይ ዳሮባ ሃሳዮፐነ ሄ ኡባይካ መላ፤ ሄዋ ድራዉ፥ ኔን ሄዋ አጋ አጋደ ጾሳዉ ያያ።

8 እት ካዉተꬃይ ባረ ቢታን ደእያ ህዬሳቱዋ ናቂሺንነ ፕርዳ ጌላይሽን ኔን በኦፐ፥ ዳርና ማላለቶፓ። እት እት ካፖ አፐ ቦላና ሱንቲደ፥ አ ጼልያ ሀራ ካፑ ደኤ። ቃይ ኡንቱንቱ ላኡዋፐካ ቦላና ሱንቲደ፥ ኡንቱንታ ጼልያ ሀራ ካፓቱካ ደኢኖ። 9 ሀራይ አትና፥ ካትያ ግዶፐነ፥ ጎሻፐ ቤትያ አይፈቱ ꬋዮፐ፥ ዎፓን ደአናዉ ዳንዳየና።

10 ብራ ዶስያ ኡራዉ ብር ግድ ኤረና፤ ዱረታናዉ ሲቅያ ኡራይካ ሚሻ ካል ኤረና። ሽን ሀ ኡባይካ መላ። 11 ዱረተꬃይ ዳርያ ዎደ፥ ምያባይካ ሄዋ ኬሻ ዳሬ። ያትና፥ ባረ ማጹዋ ጮ አይፍያን ጼሊደ፥ “ታን ዱረ” ጋናፐ አትና፥ ሀራባ አዉ አያ ማዲ!

12 ኦሱዋ ኦꬅያ አሳይ ጉꬃ ምን፥ ዳሮ ምን፥ ሳሮ ገምእሹዋ ገምእሺደ አቄ፤ ሽን ዱሪ ባረ ዱረተꬃዉ ኡባ ዎደ ኡንኤቲደ ቆፕያ ድራዉ፥ ገምእሹዋ ꬋዪደ ደኤ።

13 ሳሉዋ ጉፋንꬃን ሎይꬅ ካዮይያዋ ሀራባካ ታን በኣድ፤ ኢታ ዎድያን ባረና ማዶ ጊደ፥ አሳይ ባረዉ ደኤዳዋፐ ጉየ ዎꬂደ ዳጋዬ። 14 ቃይ ሄ ዱረተꬃይ እት ኢታባይ ጋከትና ꬋይ ክቼ። እ ናኣ የሌዳዋ ግዶፐካ፥ ናኣ ላትስያዋና ꬋዪደ፥ መላ አቴ። 15 አስ ኡባይ ኮይሮ ካሎ የለቴዳዋዳን፥ መላ ኩሽያና ስሚደ ባና። አይ ኬሻ እ ዳቡሪደ ኦꬆፐነ፥ ባረ ዳቡሬዳባፐ አኪደ ብያባይ አያይነ ባዋ። ኢዮባ 1:21፤ ማዝ. 49:17፤ 1 ጽሞ. 6:7

16 አስ ካሎ የለቲደ፥ ካሎ ጉየ ስምያዌካ ቃይ ሎይꬅ ካዮትያ ኢታባ። አ ዳቡራይ ኡባይ ጫርኩዋ ኡጭያዋዳን መላ ግዶዋፐ ስንꬃን፥ እ ሄዋን አያ ማደቲ? 17 እ ባረ ላይꬃ ኡባ ꬉማ ደኡዋን፥ ካዩዋን፥ ይሎትያዋን፥ ሀርግያንነ ሀንቁዋን ዉርሴ።

18 ሄዌ ሄዋ ግዶፐነ፥ ታን አኬኬዳ እት ሎኦባይ ደኤ፤ ሄዌካ ሳሉዋ ጉፋንꬃን ጾሳይ አሳይ ደአናዳን እሜዳ ቃንꬃ ላይꬃ ግዶን፥ አሳይ ዳቡራፐ ምያዌ፥ ኡሽያዌነ ናሸትያዌ ሎአነ በስያዋ። አያዉ ጎፐ፥ አ ካጫይ ሄዋ። 19 ጾሳይ አሳዉ ዱረተꬃነ ማጹዋ እምያዌ፥ ባረ ዳቡራ ጋትያ ደሚደ፥ ሚድነ ኡሺደ ናሸታናሳ። ሄዌካ ቃይ ጾሳፐ አዉ እመቴዳ እሞታ። 20 ጾሳይ አ ዎዛናን ኡባ ዎደ ናሸቻ ኩንꬅ ዎꬅያ ድራዉ፥ እ ባረ ደኡዋ ላይꬃባ ዳሮ ቆፐና።