1 ሳሉዋ ጉፋንꬃን አሳ ቦላ ጋክያ ሎይꬅ ኢታባ ታን በኣድ። 2 ጾሳይ አሳዉ ማጹዋ፥ ዱረተꬃነ ቦንቹዋ ኡባ እሜ፤ አዉ ኮሽያባፐ አያነ ፓጭሰና። ሽን፥ አዉ እመቴዳ ማጹነ ዱረተꬃ ኡባን ኬꬃዉ ናሸታና ማላ፥ ኩመንꬃ ሸንያ አዉ እመና። ሄዋ ጻላላካ ግደና፤ እ ዳቡሪደ ደሜዳዋን ሀራ ዳቡርቤናዌ ናሸታናዳን ኦꬄ። ሄዌካ ሀዳነ ሎይꬅ ካዮትያ ኢታባ።

3 እት አሳይ ጼቱ ናናቱዋ ጋካናዉ የሊደ፥ አዱሳ ላይꬃ ደኢደ ኤጫናዉ ዳንዳዬ፤ ሽን እ ባረዉ እመቴዳዋን ናሸትያ ካጫይ አዉ ꬋዮፐ፥ ቃይ ዉርሰꬃን ቦንቾ ሞጉዋካ ሞገተናን አቶፐ፥ አፐ ባረ ዳይ ኡሉዋን ሀይቂደ የለቴዳ ቦሻይ ኬካ ጋይ። 4 አያዉ ጎፐ፥ ሄ ቦሻይ ጮ የለቴዳ፤ ስሚደ ቃይ፥ አ ኦንነ ሀሳየና ꬉማዉ ቤ፤ አ ሱንꬃይካ ሄ ꬉማን ካመቲደ አቴ። 5 እ አዋ ፖኡዋ በእቤና፤ ደኡዋባይካ አየንቶ ኤርቤና። ህንኮ ብታንያዋፐ አꬊደ ሸምፕያዌ አ። 6 ሄዋ ድራዉ፥ ናሸቻይ ባይናን ደእሺና፥ ላኡ ሻኡ ላይꬃ ደእያ አሳፐ ሄ ቦሻ ካጫይ ሎአ። አያዉ ጎፐ፥ ዉርሰꬃን ላኡካ እት ሳኣ ቢኖ።

7 አስ ዳቡሪደ ኦꬅያ ኡባይ ባረዉ ምያዋ ደማናሳ፤ ሽን አ ኡሉ አዉደነ ግዳናዋ ግ ኤረና። 8 ያትና፥ ጭንጫ አሳይ ኤያፐ አያን ኬኪ? ህዬሳይካ ሎይꬅ ጭንጪደ፥ ሀራቱ ስንꬃን ዋን ስመረታነንቶ ኤርያዌ አዉ አያ ማዲ? 9 አይፍያን በእያዌ አሞትያዋፐ ኬካ። ቃይ ሄዌካ ጫርኩዋ ኦይቃናዉ የደርስያዋ ማላ መላ።

10 ሀንያባይ ኡባይካ ካሰቲደ ኩሸት ኡቴዳ። እት እት አሳይ ዋናናዉ ደእንቶ፥ አዱሳ ዎድያፐ ካሰ ባጋን ኤረት ኡቴዳ፤ ቃይ አይ አሳይነ ባረፐ ምንያዋና ጋዳታናዉ ዳንዳየና። 11 ሃሳያይ ጮራትያ ዎደ፥ ሀዳባይ ጮራቴ፤ ሄዌ ያትና፥ አሳ አያ ማዲ?

12 ሀዳ ግዲደ፥ ኩዋዳን ጮ አꬍያ ጉꬃ ላይꬃ ባረ አሳይ ዎቲደ አꬃናዉ ኮሽንቶ ኤርያዌ ኦኔ? ቃይካ አሳይ ሀይቂደ ብ ክችና፥ ሳሉዋ ጉፋንꬃን ሀናናዉ ደእያዋ አሳዉ ኦዳናዉ ዳንዳይያዌ ኦኔ?