1 አꬌዳ ኤራንቻ አሳ ማላ አሳይ ኦኔ? የዎቱዋ ኡባ ብለꬃ ኤርያዌ ኦኔ? አꬌዳ ኤራተꬃይ ፓሽክሲደ፥ ꬉሜዳ ሶምኡዋ ፖእሴ።

2 ካትያዉ አዛዘታ፤ አያዉ ጎፐ፥ አዛዘታናዉ ኔን ካሰ ጾሳ ስንꬃን ጫቃ ኡታዳ። 3 ኡባ ዎደ ኢታ ኦሱዋ ኦꬆፓ፤ አያዉ ጎፐ፥ ካቲ ባረ ኮዬዳዋ ኦꬃናዉ ዳንዳይያ ድራዉ፥ ኔን አ ስንꬃፐ ኤለ ꬋያና። 4 ኡባባ ኦꬃናዉ ካትያዉ ማታይ ደኤ፤ ያትና፥ “አያዉ ሀዋ ኦꬃዲ?” ያጊደ አ ኦቻናዉ ዳንዳይያዌ ኦኔ? 5 አ አዛዙዋ ፖልያ ኡራይ ሙረተና፤ አꬌዳ ኤራንቻ አሳይ ልከ ግድያ ዎድያነ ኦꬅያ ኦግያ ኤሬ። 6 እት አሳ ቦላን ዴጾ መቱ ጋክንቶነ፥ የዉዋ ኡባዉ አዉ አ ዎዲነ አ ኦጊ ኦጊ ደኤ። 7 ስንꬃፐ ሀናና ትምቢትያ ኤርያዌ ባዋ፤ ሄዋ ድራዉ፥ “ሀዌ ሀናና” ጊደ ኦዳናዉ ዳንዳይያዌ ኦኔ? 8 ሸምፑ ሻከቲደ ብያ ጋላስ ኦይቂደ፥ ተአናዉ ዳንዳይያ አሳይ ባዋ፤ ዎይ ሀይቁ ባረ ጋላሳን ዬናዳን ድጋናዉ ዳንዳይያ አሳይካ ባዋ። ሄዌ ኦንነ ከስ አካናዉ ዳንዳየና ኦላ። ሄዋ ድራዉ፥ ሀይቁዋ ስንꬃን ኢታተꬅ ኢታ ኦꬅያ ኡራ አሽ አከና።

9 ሳሉዋ ጉፋንꬃን ሀንያዋ ኡባ ታን አኬካደ ቆፕያ ዎደ፥ እት አሳይ ባረዉ ሞድያ ማታ ሀራ አሳ ቆሀናዉ ጎኤትያዋ በኣድ። 10 ቃይ ኢታ አሳቱ ቦንቹዋን ሞገትሽና በኣድ። ሄዋፐ አꬍያዌካ ቃይ፥ ሞጉዋፐ ስምያ ዎደ፥ ኡንቱንቱ ሄ ኢታተꬃ ኦꬄዳ ካታማ አሳይ ሺቂደ፥ ኡንቱንታ ሳቢሽና ስሳድ። ሄዌ ኡባይካ መላ።

11 አስ ሀልቺደ ኢታባ ኦꬅያ ጋሱ፥ ኢታባ ኦꬄዳ አሳቱዋ ኤለካ ሙርያባይ ባይና ድራሳ። 12 ናጋራንቻይ ጼቱ ገደ ኢታባ ኦꬅሽና፥ አ ላይꬃይ አዱቆፐካ፥ ጾሳዉ ያይያዋንቶ ሳአይ ሎአናዋ ታን ኤራይ። 13 ኢታቱ ጾሳ ያየና ድራዉ፥ ሳሮተꬃይ ኡንቱንቶ ባዋ፤ ጾሳዉ ኡንቱንቱ ያየና ድራዉ፥ ኡንቱንቱ ባረካ ኩዋዳን ቃማና። 14 ሀ ሳኣን ኦሰትያ እት ሀዳባይ ደኤ፤ ሄዌካ፥ ጌሻ አሳቱ ናጋራንቻቶ ይያ ሙሩዋ አክና፥ ናጋራንቻቱ ቃይ፥ ጌሻቶ ይያ ሎኦባ አኪኖ። ሀ ኡባይካ መላ።

15 ሄዋ ድራዉ፥ አሳይ ባረ ደኡዋን ናሸቶፐ ሎአ ጋደ ቆፋ እማይ፤ አያዉ ጎፐ፥ አሳይ ምያዋፐ፥ ኡሽያዋፐነ ባረና ናሸችያዋፐ አꬌዳ ሎኦባይ አዉ ሳሉዋፐ ጋርሳ ባጋና ሀራይ ባዋ። ጾሳይ አዉ እሜዳ ላይꬃን እ ዳቡሪደ ደሜዳዋን ሄዋዳን ኦꬆፐ፥ ናሸታናዉ ዳንዳዬ።

16 ታን አꬌዳ ኤራተꬃይ አየንቶ ኤራናዉነ አሳይ ሀ ሳኣ ቦላን ዳቡርያ ዳቡራ አኬካናዉ ሀልቻድ፤ ዉርሰꬃን አሳይ ገምእሹዋ ꬋዪደ ኦꬅያ ዱጸና ኦሱ ደእያዋ በኣድ። 17 ሄዋፐ ጉይያን፥ ጾሳይ ኦꬄዳዋ ኡባ በኣድ። ቃይ ሳሉዋፐ ጋርሳ ባጋን ኦሰቴዳ ኦሱዋ አሳይ ፕልጊደ ኤራናዉ ዳንዳየናዋ ኤራድ። አስ አይ ኬሻ ዳቡሪደ ፕልግ ጼሎፐነ፥ አ ብለꬃ ኤራናዉ ዳንዳየና። ቃይ አꬌዳ ኤራንቻ አሳይ፥ “ታን ሀዋ ኤራይ” ጎፐነ፥ እ ኤራናዉ ዳንዳየና።