1 ሀ ኡባ የዎቱዋባ አዱሳ ዎድያ ታን ቆፔዳዋፐ ጉይያን፥ አꬌዳ ኤራንቻነ ጽሉዋ ግዴዳ አሳቱነ ኡንቱንቱ ኦሶቱ ጾሳ ኩሽያን ደኢኖ ጋደ ቃቻድ፤ ሽን ሲቁ ናግያ፥ እጹ ናግያ ኦንነ ባረና ናግያዋ ካሰቲደ ኤረና። 2 ዱማተꬃይ ባይናን ደእሺና፥ ኡባ ጋክያ ካጫይ እቱዋ፤ ጽሉዋ ግድና ማካላንቻ ግድና፥ ሎአ ግድና ኢታ ግድና፥ ጌሻ ግድና ቱና ግድና፥ ያርሹዋ ያርሽያዋ ግድና ያርሸናዋ ግድና፥ ኡንቱንቱ ኡባ ካጫይ እቱዋ። ሎኦ አሳዉ ናጋራንቻዋፐ ኬክያ ካጭ ባዋ፤ ጫቁዋ ጫቃናዉ ያይያዌካ ጫቃናዉ ጻልያዋፐ ዱማተና።

3 አሳ ኡባ ካጫይ እቱዋ ግድያዌ፥ ሀ ሳኣን ደእያ ሀራ ኢታተꬃካ ማላ ዳሮ ኢታ። አስ ደኡዋን ደኤዳ ላይꬃን ኡባን አ ዎዛናይ ኢታተꬃንነ ጎሻን ኩሚደ ደኤ፤ ዉርሰꬃን ሀይቂ አጌ። 4 ሀይቂዳ ጋሙዋፐ ፓጻ ደእያ ካናይ ኬካ፤ አያዉ ጎፐ፥ ፓጻ ደእያዋንቱና ደእያ አሳዉ ህዶታይ ደኤ።

5 ፓጻ ደእያ አሳቱ እት ገደ ሀይቃናዉ ደእያዋ ኤሪኖ፤ ሽን ሀይቄዳዋንቱ አያነ ኤርክኖ። ኡንቱንቱ ሙለካ ዶገት ክቼዳዋንቱ ግድያ ድራዉ፥ አይነ ማድክኖ። 6 ኡንቱንቱ ሲቁ፥ እጹነ ቃናቲ ኡባይ ኡንቱንቱና እትፐ ꬋይክቼዳ። ሄዋ ድራዉ፥ ሀዋፐ ህን ባጋን ሳሉዋ ጉፋንꬃን ኦሰትያ የዉዋ ኡባን ኡንቱንቶ መꬍናዉካ ካጭ ባዋ።

7 ባደ፥ ነ ቁማ ናሸቻን ማ፤ ነ ዎይንያ ኤሳካ ነ ዎዛናይ ፓሽክሽና ኡሻ። አያዉ ጎፐ፥ ጾሳይ ሄዋ ነዉ ካሰፐካ እም ዎꬄዳ። 8 ኡባ ዎደ ነ ማዩ ቦꬃ ግዶ፤ ነ ሁጲያንካ ዛይትያ ኦከታ። 9 ሳሉዋፐ ጋርሳ ባጋና ጾሳይ ነዉ እሜዳ ሀ መላ ደኡዋን፥ ነ መላ ደኦቱዋ ኡባን ኔን ሲቅያ ነ ማቻትና ናሸታደ ደአ፤ አያዉ ጎፐ፥ ኔን ሳሉዋፐ ጋርሳ ባጋና ዳቡራደ ኦꬄዳዋ ኡባፐ ኔና ጋክያ ሳማይ ሄዋ። 10 ነ ኩሺ ኦꬃናዉ ደሜዳዋ ኡባ ነ ኩመንꬃ ዎልቃን ኦꬃ፤ አያዉ ጎፐ፥ ኔን ባናሳን ዱፉዋን ኦሱ፥ ዎይ ሀልቹ፥ ዎይ ኤራይ፥ ዎይ አꬌዳ ኤራተꬅ ባዋ።

11 ታን ሳሉዋፐ ጋርሳና ሀራባካ በኣድ፤ ሄዌካ፥ ኤሌልያ ዎꬃንቻቱ ኡባ ዎደ ጾንክኖ፤ ዎይ ምኖ ኦላንቻቱካ ኡባ ዎደ ኦላን ጾንክኖ፤ ዎይ አꬌዳ ኤራንቻቱ ኡባ ዎደ ቁማ ደምክኖ፤ ዎይ ጭንጫቱ ኡባ ዎደ ዱረትክኖ፤ ዎይ ታማሬዳ አሳቱ ኡባ ዎደ ሳበትክኖ። ሽን ኡባይካ ካጫይነ ዎዲ ኦꬆዋዳን ሀኔ።

12 ሄዋ ቦላካ ቃይ፥ ስንꬃፐ ያናዉ ደእያ መቶ ዎዲ አዉደ ጋካነንቶ፥ ኤራናዉ ዳንዳይያ አሳይ ባዋ፤ ካፉ ፓሊደ ጲርያን ገልያዋዳን፥ ዎይ ሞሊ ማጋን ኦይቀትያዋዳን፥ አሳይ ኡባይ ቆፐናን ጋክያ ኢታ ዎድያን ኦይቀቴ።

13 ሳሉዋ ጉፋንꬁዋን ታን በኤዳባይ ሀራባይካ ደኤ፤ ሄዌካ አꬌዳ ኤራተꬃይ ዎልቃማ ሌምሶ ግድያዋ። 14 እት ቢታን እት ጉꬃ አሳይ ደእያ ቄር ካታማታ ደአዉ፤ ሄ ካታማቶ እት ዎልቃማ ካቲ ኦላናዉ ደንዴ። እዞ ዶዴዳ። 15 ቃይ፥ እት ህዬሳ ሽን ጭንጫ ግዴዳ ብታኒ፥ ሄ ካታማትን ደኤ፤ እ ባረ አꬌዳ ኤራተꬃን ሄ ካታማ አሼዳ። ሽን፥ ሄ ህዬሳ ብታንያ ዛረꬂደ ሀሳዬዳባይ ባዋ። 16 ታን፥ “አꬌዳ ኤራተꬃይ ዎልቃፐ ዳሬ” ያጋድ። ግዶ ሽን፥ አꬌዳ ኤራንቻ ግዶፐነ፥ ህዬሳ አሳይ ካቴ፤ እ ሃሳይያዋካ ሀይዝያዌ ባዋ። 17 ሄዋ ግዶፐካ፥ ደርያ ሞድያዌ አዛላቱዋ ሺቁዋን ዋስያ ዋሱዋ ስስያዋፐ፥ ሌላን ኦደትያ አꬌዳ ኤራንቻ ቃላ ስስያዌ ሎአ። 18 አꬌዳ ኤራተꬃይ ኦላ ሚሻፐ ሎአ፤ ሽን እት ናጋራንቻ አሳይ ዳሮ ሎኦባ ባይዜ።