1 ሀይቄዳ ኡዱንጸቱ ሳዊያ ዛይትያ ሽቱዋ ጽንቀꬃናዉ ዳንዳዪኖ፤ ሄዋዳንካ፥ ጉꬃ ኤያተꬃይ አꬌዳ ኤራተꬃነ ዎልቃማ ቦንቹዋ ባይዜ።

2 አꬌዳ ኤራንቻ አሳ ዎዛናይ አ ኡሸቻዉ ካለꬄ፤ ሽን ቦዛ አሳ ዎዛናይ ሀድርሳዉ ካለꬄ። 3 ኤያ አሳይ ኦግያን ሀመትያ ዎደካ፥ አዉ አኬክ ባዋ፤ ሄዋፐ ደንዴዳዋን እ ቦዛ ግድያዋ አሳይ ኡባይ ኤሬ።

4 ነ ካፑ ነ ቦላን ሀንቀቶፐነ፥ ነ ሱንቴዳ ሳኣፐ ክቻ ክቾፓ፤ አያዉ ጎፐ፥ ጮኡ ጊደ ዳንዳይያዌ ዎልቃማ ባይዙዋካ አቶ ጊሴ።

5 ሳሉዋ ጉፋንꬃን ታን በኤዳ ሀራ ኢታባይ ደኤ፤ ሄዌካ ደርያ ሞድያዋንቱ ኦꬅያ ናቁዋ። 6 ኤያቱ ዳሮ ꬎቃ ሱንꬃተꬃ ኦይቂደ ደእያ ዎደ፥ ዱረቱ ህርክ ዝቃ ሳኣን ኡቴድኖ። 7 ታን፥ አይለቱ ሞድያዋንቱዳን ፓራ ቶጊደ ቢሺናነ ቃይ ሞድያዋንቱ አይለቱዋዳን ገድያን ሀመትሽን በኣድ።

8 ኦላ ቦክያ ኡራይ ሄ ኦላን እ ኩንዳና፤ ቃይ ግምቢያ ድርሳ ኮልያ ኡራ ሾሻይ ዱካና። ማዝ. 7:15፤ ሌም. 26:27 9 ሹቻ አ ሳኣፐ አꬅ የግያ ኡራይ ሄ ሹቻን ደሸቴ፤ ቃይ ምꬃ ቆእያ ኡራይካ ሄ ምꬃን ደሸቴ።

10 ዱልዱሜዳ ካልታ ፖሸናን ጮ ቆኦፐ፥ ዳሮ ዎልቃ ዉርሴ፤ ሽን አꬌዳ ኤራን ኦꬅያዌ ኦሱዋ ዳርሴ።

11 ሾሻይ ዱክ ድግና፥ ሾሻ ጆልሳናዉ አያንቲያ አያንቱ ሄ ኡራዉ አይነ ማደና።

12 አꬌዳ ኤራንቻ ሃሳያይ አዉ ቦንቹዋ እምሴ፤ ሽን ኤያይ ባረ ዶናፐ ከሴዳ ቃላን እ ባረዉ መቱዋን ገሌ።

13 ኤያይ ባረ ሃሳያ ቦዛ ቃላን ዶሚደ፥ ኢታተꬃንነ ጎሻን ፖሌ።

14 ኤያይ ዳሮባ ሃሳዬ። ግዶፐነ፥ ስንꬃፐ ሀናናዉ ደእያዋ ኦንነ ኤረና። አስ ሀይቂ ክችና፥ ሀናናዉ ደእያዋ አዉ ኦዳናዉ ዳንዳይያዌ ባዋ።

15 ኤያ አሳይ ባረ ኦሱዋን ዳቡሬ፤ እ ባረ ጎለ ብያ ኦግያ ኤረና።

16 ቄር ናኣ ግዴዳ ካዉነ ዎንታ ጉራና ግብራ ጊግሲደ፥ ባረንቶ ምያ ካፓቱ ደእያ ቢታይ ነዉ አየ አና! 17 ቦንቼቴዳ ካዉነ ማꬁዋሳ ግደናን ዎልቃነ ምኖተꬃ ደማናዉ ማራን ምያነ ኡሽያ ካፓቱ ደእያ ቢታታ ጋላተቴዳኖ።

18 ብታኒ አዛላ ግዶፐ፥ አ ካራይ ዎዴ፤ አ ኩሺ ኦሱዋ ብሎዋል ግዶፐ፥ አ ጎሊ አꬄ።

19 ቁማ ምያዋንነ ዎይንያ ኤሳ ኡሽያዋን ናሸቻይ ቤቴ፤ ሽን ሚሻይ ኡባባ ሻሜ።

20 ስስያዌ ባዋ ጋደ ነ ዎዛና ቆፋን ግዶፐነ፥ ካትያ ቦሮፓ፤ ዎይ ነ ግስያ ክፍልያን ዱርያ ቦሮፓ፤ አያዉ ጎፐ፥ ነ ጌዳዋ ሳሉዋ ካፉ ዎይ፥ ቀፍያና መታቱ ቢደ፥ ኡንቱንቶ ኦዳና።