1 ነ ኡክꬃ ሃꬃ ቦላን ኦላ፤ ዳሮ ጋላሳቱዋፐ ጉይያን፥ ኔን ዛረꬃደ አ ደማና። 2 ነዉ ደእያ ማጹዋ ላፑን ዎይ፥ ኡባ ሆስፑን ሳኣን ሻካደ ዎꬃ፤ አያዉ ጎፐ፥ ስንꬃፐ ሀ ሳኣ ቦላ አይ ኢታባይ ያነንቶ፥ ኔን ኤራካ።

3 ሻሪ ሃꬃን ኩሜዳባ ግዶፐ፥ ቢታ ቦላን እራ ትጌ።

ምꬃይ ሁጲሳ ኩንድና ገድሳ ኩንድና፥ ሄ ባረ ኩንዴዳ ሳኣን ደኤ።

4 ጫርኩዋ ሀኖታ ናግያ ኦንነ ካꬃ ዘረና፤ ቃይ ሻሪ ደንዳናዉ ናግያ ኦንነ ባረ ካꬃ ጫከና።

5 ጫርኩ ሀቃና ብንቶ፥ አ ኦግያ ኤራካ፤ ቃይ ናአይ አት ኡሉዋን ዋን መትንቶካ ኤራካ። ሄዋዳንካ፥ ኡባባ መꬍያ ጾሳይ ባረ ኦሱዋ ዎት ኦꬅንቶ፥ ኤራናዉ ዳንዳያካ።

6 ዎንታ ጉራን ግድናካ ኦማርሳን፥ ነ ዘረꬃ ዘርያዋ አጎፓ፤ አያዉ ጎፐ፥ ዎንታዌ ሎአኔ ኦማርሳዌ ሎአኔ ኔን ኤራካ።

7 ፖኡ ናሸችያዋ። አዋ አይፍያ በእያዌካ ሎኦባ። 8 አስ ሎይꬅ አዱሳ ላይꬃ ሀ ሳኣን ደኦፐ፥ ሄ ኡባ ላይꬃንካ ናሸቶ። ሽን ꬉማ ዎደቱዋ ቆፓ። አያዉ ጎፐ፥ ሄ ዎደቱ አዱቃና። ያናዉ ኡባባይካ መላ።

9 ኔኖ ያላጋዉ፥ ያላጋተꬃይ ሎይꬅ ሎኦባ ግድያ ድራዉ፥ ነ ያላጋተꬃ ላይꬃን ናሸታ፤ ነ ዎዛናይካ ናሸቶ። ነ አይፊ ጼሌዳባነ ነ ዎዛናይ አሞቴዳባ ኡባ ፖላ። ሽን፥ ሄ ኔን ኦꬄዳዋ ኡባ ድራዉ፥ ኔና ጾሳይ ፕርዳናዉ ደእያዋ ዶጎፓ።

10 ሄዋ ድራዉ፥ ስም ነ ዎዛናፐ ህርጋ፥ ነ ቦላፐካ ሴላ ድጋ። አያዉ ጎፐ፥ ናአተꬃይነ ያላጋተꬃይ መላ።