1 ነ ያላጋተꬃ ላይꬃን ኔና መꬌዳዋ ቆፓ። መትያ ጋላሳቱ ዬናን ደእሺና፥ ኔን፥ “ታና ሀዌ ናሸቼና” ግያ ዎደቱ ጋከናን ደእሽና፥ 2 አዋይነ ፖኡ፥ አግናይነ ጾልንቲ ꬉመናን ደእሺና፥ እራይ ቡክ አꬍናካ ሻሪ ሃ ስመናን ደእሺና፥ ኔና መꬌዳዋ ቆፓ። 3 አያዉ ጎፐ፥ ሄዌ ጎልያ ናግያዋንቱ ኮኮርያ ዎደ፥ ምኖ አሳይ ቁንያ ዎደ፥ ጋጭያዋንቱ ፓይዱዋን ጉጼዳ ጋሱዋን ጋቻ አግያ ዎደ፥ ቃይ ማስኮትያና ጼልያዋንቱ ጋልጅያ ዎደ ግዳናዋ። 4 ሄ ዎደ ዎጋ ኦግያኮ ስሜዳ ፐንገቱ ጎርደትያ ዎደ፥ ጋጭያ ዎጻቱዋ ኮሻይ ዝቂ ግያ ዎደ፥ ካፉዋ ዋሱ አሳ ገምእሹዋፐ ቤጎꬂያ ዎደ፥ ሽን፥ የꬃንቻ ማጫ ናናቱዋ የꬃ ኮሻይ ለፕያ ዎደ ግዳናዋ። 5 ሄ ዎዲ አሳይ ꬎቃ ሳአቱዋ ከሳናዉነ አኮ ኦገቱዋና ሄመታናዉ ያይያ ዎደ፥ ነ ሁጲ ፑሉምያ ዎደ፥ ኔን ኔና ዳንዳያደ ሄመትያዌ ነዉ እጽያ ዎደ፥ አሞይያባይ አግያ ዎደ ግዳናዋ። ሄ ዎዲ አሳይ ባረ መꬍና ጎልያ ብያ ዎደ፥ ዬክያዋንቱካ አኮ ኦግያና ዬኪደ ዩይያ ዎደ ግዳናዋ።

6 ብራ ቃጭናይ ዱጸናን፥ ዎርቃ ከሪካ መኤናን፥ ሃꬃ ኦቱካ ፑልቱዋ ላንቂያን መኤናን፥ ሃꬃ ፑደ ጎችያ ዎዶሩካ ዱጸናን ደእሺና፥ 7 ቢታይ ካሰ ባረ አከቴዳ ቢታኮ ስመናን፥ ሸምፑካ ባረና እሜዳ ጾሳኮ ስሚደ ቤና ደእሺና፥ ኔና መꬌዳዋ ቆፓ።

8 ኤራንቻይ ኦዲደ፥ “ሀዳ! ሀዳ! ኡባባይካ መላ!” ያጌዳ።

9 ኤራንቻዉ አꬌዳ ኤራተꬃይ ደእያ ድራዉ፥ ኤራተꬃ ደርያ አሳ ታማርሴዳ። እ ዳሮ ሌምሳቱዋ ፕልግ ቆሪደ፥ እቱዋ እቱዋ አ ማራን ማራን ዱማዪደ ኦꬄዳ። 10 ኤራንቻይ ልከ ግዴዳ ቃላ ደማናዉ ኮዬዳ፤ ሄዋ ድራዉ፥ እ ጻፌዳዌ ሱረነ ቱማ።

11 ኤራንቻቱዋ ቃላይ ሄንꬃንቻይ ዉድያ ላግያ ጼራ ሌኦ ጻምኣ ማላ። ቃይ እትፐ ሺሼዳ ሌምሶቱካ ጎምፓ ጋኪደ ገልያ ምስማረቱዋ ማላ።

12 ታ ናአዉ፥ ሀ ኡባፐ ቦላና ኔን ናገታናዉ ኮሽያባይ ደኤ። ማጻፋ ጻፊደ ዉርሳናዉ ዳንዳየተና። ቃይ ዳሮባ ፕልግ ጼሊደ አገናን እጽያዌካ አሳተꬃ ዳቡርሴ።

13 ሄኮ ኡባባይ ኦደቴዳ፤ ሄዋ ድራዉ፥ ኡባባዉ ኩሻይ ሀዋ: ጾሳዉ ያያ፤ አ አዛዙዋ ናጋ። አያዉ ጎፐ፥ ሄዌ አሳዉ ዋና ኦሱዋ። 14 ጾሳይ ኦሱዋ ኡባ ቦላን፥ ቃይ ጌሜዳ የዉዋ ኡባ ቦላን፥ ሎአ ግድና፥ ኢታ ግድናካ ፕርዳናዉ ደኤ።