1 ካቲነ ሀማን ካታት አስትር ባላ ማናዉ ቤድኖ። 2 ሄ ላኤንꬆ ጋላሳ ሾብያዉ ቢደ፥ ኡንቱንቱ ዎይንያ ኤሳ ኡሽ ደእሽን፥ ካቲ ቃይካ፥ “ካታት አስቴረ፥ ኔን ዎስያባይ አዬ? ታን ነዉ እማና። ቃይ ኔን ታና ኦችያባይ አዬ? ሀራይ አቶ ታ ካዉተꬃፐ ባጋ ግዶፐነ፥ ታን ነ ኦሻ ፖላና” ያጊደ ኦቼዳ።

3 ካታታ አስትራ ዛራደ ያጋዱ፤ “ካትያዉ፥ ኔን ታናን ናሸቴዳዋ ግዶፐ፥ ቃይ ታ ኦሻካ ፖላናዉ ኔን ዶሴዳዋ ግዶፐ፥ ታ ዎሳይነ ታ ኦሻይ ታንነ ታ አሳይ ሀይቀናን አታናሳ። 4 አያዉ ጎፐ፥ ታንነ ታ አሳይ እቱነ አተናን ዉራናዉ ሀይቃናዉነ ꬋያናዉ ዛልኤቴዶ። ኑን ዛልኤቴዳዌ ማጫ አይለነ አቱማ አይልያ ግዲደ ደአናዉ ግድንቶ፥ ታን ጮኡ ጋና፤ አያዉ ጎፐ፥ ሄዋ ማላ መቱ ካትያ ዋይሳናዉ በስያዋ ግደና” ያጋዱ።

5 ካቲ አርጸክስስ ዛሪደ፥ “ሄዋ ኦꬃናዉ ጻሌዳዌ ኦኔ? እ ሄ ብታኒ ሀቃን ደኢ?” ያጊደ ካታቶ አስቴሮ ኦቼዳ።

6 አስትራ፥ “ኑ ሞርኪ፥ ኑና የደርስያዌ ሀዋ ሀ ኢታ ሃማና” ያጋዱ።

ሄ ዎደ ሃማን ካትያ ስንꬃንነ ካታት ስንꬃን ዳሮ ዳጋሜዳ። 7 ካቲ ሎይꬅ ሀንቀቲደ፥ ባረ ኡቴዳ ሳፐ ደንድ ኤቂደ፥ ካትያ ጎልያ አታክልትያ ሳኣ ቤዳ። ሽን ሃማን ካቲ አ ቦላ ኢታባ አሀናዉ ቃቼዳዋ ኤሬዳ ድራዉ፥ ካታታ አስትራ አ ሀይቁዋፐ አሻና ማላ ዎሳናዉ ጉየ አቴዳ።

8 ካቲ ካትያ ጎልያ አታክልትያ ሳፐ ስሚደ፥ ዎንታ ኡንቱንቱ ዎይንያ ኤሳ ኡሽያ ሳኣ ገልያ ዎደ፥ ሃማን ካታት አስትርፐ ማሮታ ዎሳና ጊደ፥ አ ኡቴዳ ግሱዋ ቦላን ጉፋኔዳዋ በኢደ፥ ሀንቁዋን ኤጽ ከሲደ “ላ ሀ ብታኒ ሀዋን ካትያ ጎለን፥ ኡባ ቃይ ታ ስንꬃን፥ ካታትና ግሳናዉ ኮዪየ?” ያጌዳ።

ካቲ ብሮ ሄዋ ሃሳይሽን፥ ካትያ ሱንꬃቱ ዪደ፥ ሃማና ዴሙዋ ጉሎዬድኖ። 9 ቃይ ኡንቱንቱፐ እቱ፥ ሀርቦና ጌተትያ ካትያዉ ኦꬅያ ጎይረቶዌ፥ “ካትያዉ፥ ሃማን ኔና ሀይቁዋፐ አሼዳ ማርድክዮሳ ካቃና ጊደ ኤሴዳ እሻታሙ ዋꬋ ኮጫይ አ ሶን ደኤ” ያጌዳ።

ካቲ ዛሪደ፥ “ሃማና አፊደ፥ ሄ ኮጫን ሱልተ!” ያጊደ አዛዜዳ።

10 ሄዋ ድራዉ፥ ማርድክዮሳ ካቃና ጊደ ጊግሴዳ ኮጫን ሀማን ካቀቴዳ። ሄዋፐ ጉይያን፥ ካትያ ሀንቁ ዶቼዳ።