1 ሄ ጋላስ ቃማ ካትያ ገምእሹ አፈናን እጼዳ። ሄዋ ድራዉ፥ ካቲ ካትያ ታርክያ ጻፍያ ማጻፋ አሂደ፥ ሄዋን ጻፈቴዳ፥ ካሰ ሀኔዳ ታርከቱዋ ዎዛናን አꬃናዉ አዉ ናባባና ማላ አዛዜዳ። 2 ናባበቴዳ ታርከቱዋፐ እቱ ማርዶክዮስ ኦꬄዳዋ፤ ሄዌነ፥ ካቲ ደእያ ክፍልያ ናግያ፥ ብግታናነ ተረሻ ግያ ላኡ ጎይረቴዳዋንቱ ካትያ ዎꬋናዉ ማቀቴዳ ማቁዋ ማርዶክዮስ ቆንጭሴዳዋ። አስ. 2:21-22 3 ካቲ፥ “ያትና፥ እ ሀዋ ቆንጭሴዳዎ አዉ እመቴዳ ሱንꬃተꬃይ ዎይ ጋቲ አዬ?” ያጌዳ።

ካትያ ቆማቱ ዛሪደ፥ “አዉ አያይነ ኦሰትቤና” ያጌድኖ።

4 ካቲካ ዛሪደ፥ “ካትያ ጎልያ ካረ ዳባባን ኦኔ ደእያዌ?” ያጌዳ። ሄ ዎደ ባረ ጊግሴዳ ኮጫን ማርድክዮሳ ካቃናዉ፥ ካትያ ኦቻና ጊደ፥ ሃማን ካትያ ጎልያ ካረ ዳባባ ገሊደ ደኤ።

5 ካትያ ቆማቱ፥ “ሃማን ሀዋን ደኤ” ያጌድኖ።

ካቲ ዛሪደ፥ “ሃ ገላ ጊተ” ያጌዳ።

6 ሃማን ገሎዋፐ ጉይያን ካቲ፥ “ካቲ ቦንቻናዉ ዶስያ አሳዉ አይ ኦꬃናዉ ኮሺ?” ያጊደ ኦቼዳ።

ሀማን፥ “ካቲ ታፐ ሀራ ኦና ቦንቻናዉ ዶሲ?” ያጊደ ባረ ዎዛናን ቆፔዳ። 7-8 ሄዋ ድራዉ፥ ሃማን ካትያዉ ያጊደ ዛሬዳ፤ “ካቲ ቦንቻናዉ ዶስያ ኡራዉ ካቲ ማይ ከሴዳ ባረ ካዉተꬃ ማዩዋ፤ ባረ ቶጌዳ ፓራነ አ ሁጲያን ዎꬄዳ ካላቻ አሀናዳን ኡዳ። 9 ሄዋፐ ጉይያን፥ ባረናና ኦꬅያ ሞድያዋንቱፐ እት ሎይꬅ ቦንቼቴዳዋ ጼግሲደ፥ ካዉተꬃ ማዩዋ አ ማይዛናዳንነ ካትያ ፓራን አ ኡትሲደ፥ ካታማ ዳባባ ከሳናዳን አዛዛ። ያቶፐ ሄ ሎይꬅ ቦንቼቴዳ ካፑ አ ስንꬃን ሀመቲደ፥ ‘ካቲ ቦንቻናዉ ዶስያ ኡራዉ ሀዋዳን ኦꬄ’ ያጊደ አዋዮ” ያጌዳ።

10 ሄዋፐ ጉየ ካቲ ዛሪደ፥ ሃማና ሀዋዳን ያጊደ አዛዜዳ፤ “ዎደ ኤለካ ደንዳ ካዉተꬃ ማዩዋነ ታ ፓራ አካደ፥ ነ ጌዳዋዳን አይሁዳ ማርዶክዮሳዉ ኦꬃ። እ ካትያ ጎልያ ገልያ ፐንግያን ደኤ። ነ ጌዳዋፐ እትባነ አሾፓ” ያጌዳ።

11 ሄዋ ድራዉ፥ ሀማን ማዩዋነ ፓራ አኪደ ማርድክዮሳ ካዉተꬃ ማዩዋ ማይዚደ፥ ካትያ ፓራ ቦላን ኡትሴዳ። ቃይ ካታማ ዳባባን አፐ ስንꬃና ሀመቲደ፥ “ካቲ ቦንቻናዉ ዶስያ ኡራዉ ሀዋዳን ኦꬄ” ያጊደ አዋዬዳ።

12 ሄዋፐ ጉይያን፥ ማርዶክዮስ ካትያ ጎልያ ፐንገ ጉየ ስሚደ ቤዳ። ሽን ሃማን ዳሮ ካዮቴዳ ድራዉ፥ ባረ ዴሙዋ ጉሎቴዳ፥ ኤሌሊደ ባረ ሶ ቤዳ። 13 ባረና ጋኬዳዋ ኡባ ባረ ማቻት ዘሬሽዉነ ባረ ላገቱዋ ኡባቶ ኦዴዳ። ኡንቱንቱ አ፥ “አ ስንꬃን ኔን ኩንዳናዉ ዶሜዳ ሀ ብታኒ፥ ማርዶክዮስ፥ አይሁዳ አሳ ግዶፐ፥ ነ አናና ኤቀታደ፥ አ ጾናናዉ ኡባካ ዳንዳያካ፤ ቱሙፐ እ ኔና ጾናና” ያጌድኖ።

14 ኡንቱንቱ ብሮ ሄዋ ሃሳዪደ ደእሽን፥ ካትያ ጎይራቱ ጋኪደ፥ ሃማና አስትራ ጊግሴዳ ሾብያዉ ኤሌልሲደ አፌድኖ።