1 ጾማ ዶሞደፐ ሄዘንꬆ ጋላስ አስትራ ካዉተꬃ ማዩዋ ማያደ፥ ካትያ ጎለፐ ስንꬃ ባጋና ግዶ ዳባባ ገላደ ኤቃዱ። ሄ ዳባባን ካቲ ኡትያ ዉይግያ አራታይ ደኤ። ካቲካ ባረ ጎልያ ገልያ ፐንግያ ጼልያ ሳን ደእያ፥ ባረ ካዉተꬃ አራታን ኡቴዳ። 2 ካታታ አስትራ ገላደ፥ ግዶ ዳባባን ኤቄዳኖ ካቲ በኢደ እዝን ናሸቴዳ ድራዉ፥ ባረ ኩሽያን ደእያ ዎርቃ ጻምኣ ኢኮ ምጬዳ። አካ ሺቃደ ጻምኣ ጼራ ቦቻዱ። 3 ካቲ እዞ ሀዋዳን ያጌዳ፤ “ካታት አስቴረ፥ ኔን ታኮ አያዉ ያድ? ቃይ ኔን ታና ኦችያባይ አዬ? ሀራይ አቶ ታ ካዉተꬃፐ ባጋ ግዶፐነ፥ ታን ነዉ እማና” ያጌዳ።

4 አስትራ ዛራደ ሀዋዳን ያጋዱ፤ “ካትያዉ፥ ኔና ናሸችያዋ ግዶፐ፥ ታን ነዉ ጊግሴዳ ባላ ማናዉ ኔንነ ሃማን ላኡ ሀቼ ይንቶ ዶሳይ” ያጋዱ።

5 ሄዋፐ ጉይያን ካቲ፥ “ኑን አስትራ ጊግሴዳ ሾብያዉ ባናዉ፥ ሃማና ኤለካ አህተ!” ያጌዳ።

ሄዋፐ ጉየ ላአቱካ ሄ ሳኣ ቤድኖ። 6 ኡንቱንቱ እትፐ ዎይንያ ኤሳ ኡሺደ ደእሽን፥ ካቲ ላኤንꬁዋ አስቴሮ፥ “ኔን ታና ዎስያባይ አዬ? ታን ነዉ እማና። ቃይ ኔን ታና ኦችያባይ አዬ? ሀራይ አቶ ታ ካዉተꬃፐ ባጋ ግዶፐነ፥ ታን ነ ኦሻ ፖላና” ያጌዳ።

7 አስትራ ዛራደ ሀዋዳን ያጋዱ፤ 8 “ካትያዉ፥ ኔን ታናን ናሸቴዳዋ ግዶፐ፥ ቃይ ታን ዎስያዋ እማናዉነ ታ ኦሻ ፖላናዉ ኔን ዶስያባ ግዶፐ፥ ዎንት ታ ጊግስያ ሀራ ግብራዉ ኔንነ ሀማን ያናዳን ኦቻይ። ታን አያ ኮይንቶ፥ ሄ ዎደ ነዉ ቆንጭሳና” ያጋዱ።

9 ሄ ጋላስ ሃማን ባላ ሳፐ ከሲደ ብያ ዎደ፥ ሎይꬅ ናሸቴዳ ድራዉ፥ ባረ ዎዛናን ኖጩ ጊደ ቤዳ። ሽን እ ካትያ ጎልያ ገልያ ፐንግያ ማታና አꬊደ ብያ ዎደ፥ ሄዋን ኡቴዳ ማርድክዮሳ በኤዳ፤ አዉ ደንድቤናዋነ ያዪደ ኮኮርቤናዋ አኬኪደ፥ ሃማን ሀንቁዋ ኤጽ ከሴዳ። 10 ግዶፐነ፥ ባረ ሀንቁዋ ዳንዳዪደ ቢደ፥ ባረ ሶ ጋኬዳ።

ሄዋፐ ጉይያን፥ ባረ ላገቱዋነ ባረ ማቻቶ ዘሬሾ እትፐ ጼግሲደ፥ 11 ሃማን ባረ ዱረተꬃ ልክያ፥ ባረ አቱማ ናና ፓይዱዋ፥ ካቲ ባረና ኡባባን ቦንቼዳ ቦንቹዋነ ሀራ ሞድያዋንቱፐነ ካትያ ኦሳንቻቱዋፐ አꬍያ ሱንꬃተꬃ አዉ እሚደ፥ ዋቲደ አ ቦንቼደንቶ፥ ኡንቱንቶ ጬቄዳ። 12 ጉጂድካ ሃማን ሀዋዳን ያጌዳ፤ “ሀራይ አቶ ካታታ አስትራካ ባረ ጊግሴዳ ሾብያዉ ካትያና ባናዉ ታፐ አትና፥ ሀራ ኦናነ ጼሳበይኩ። ቃይ ዎንትካ ካትያና ባናዳን ታና ጼሳ ዎꬃዱ። 13 ሽን ሄ አይሁዳይ ማርዶክዮስ ካትያ ጎልያ ገልያ ፐንግያን ኡቴዳዋ በእያ ዎደ፥ ሀ ኡባባይካ ታና ካልሰና” ያጌዳ።

14 ሄ ዎደ አ ማቻታ ዘሬሻነ አ ላገቱ ኡባይ ሀዋዳን ያጌድኖ፤ “ኔን እሻታሙ ዋꬋ አዱሳ ኮጫ ኤስሳ፤ ያታደ ዎንት ጉራና ማርዶክዮስ ሄ ኮጫን ካቀታና ማላ፥ ካትያ ኦቻ። ሄዋፐ ጉይያን፥ ናሸታደ ባላ ማናዉ ባ” ያጌድኖ። ሃማና ሀ ቆፋይ ናሸቼዳ ድራዉ፥ ኡንቱንቱ ጌዳዋዳን ኮጫ ጊግስሴዳ።