1 ማርዶክዮስ ሀ ሀኔዳባ ኡባ ስሴዳ ዎደ፥ ካዮቲደ ባረ ማዩዋ ፔꬌዳ፤ ማቅያ ማዬዳ፤ ባረ ሁጲያንካ ብድንꬃ ክክፌዳ። ባረ ኮሻካ ꬎቁ ኦꬂደ፥ ሴላ ዬኩዋ ዬኪደ፥ ካታማ ግዶን ዩዬዳ። 2 ካትያ ጎልያ ገልያ ፐንግያ ጋካናዉ ቤዳ፤ ሽን ገላናዉ ዳንዳይቤና። አያዉ ጎፐ፥ ማቅያ ማዪደ፥ ካትያ ጎልያ ገላናዉ ኦነ ዳንዳየተና። 3 ካትያ አዋዩ ስሰቴዳ ቢታ ኡባን አይሁዳቱ ግዶን ዎልቃማ ካዩ፥ ጾማይ፥ ዬኩነ ዝላሳይ ዶመቴዳ። ኡንቱንቱፐ ዳሮቱካ ቃይ ማቅያ ምጪደ፥ ካዮታናዉ ብድንꬃን ካካፊደ ኡቴድኖ።

4 ካታት አስትር ዳንጋጽረቱነ እዞ ናግያ ሱንꬃቱ ዪደ፥ ማርዶክዮሳባ እዝዉ ኦዴዳ ዎደ፥ አ ሎይꬅ ካዮታዱ። ማርዶክዮስ ዋሩዋ ከስ ድጊደ ማያና ማላ፥ አዉ ሀራ ማዩዋ ኪታዱ፤ ሽን እ አከናን እጼዳ። 5 ሄዋፐ ጉይያን አስትራ፥ ካቲ እዝዉ ኦꬃናዳን ዎꬄዳ ሀታካ ግያ ጎይረቶዋ ጼጋደ፥ ማርድክዮሳ መቱ አዬንቶነ ቃይ እ አያዉ ካዮትንቶነ ኤራና ማላ፥ አኮ ኪታዱ። 6 ሀታክ ካትያ ጎልያ ገልያ ፐንግያ ማታ ዳባባን ደእያ ማርዶክዮሳኮ ቤዳ። 7 ማርዶክዮስ፥ ባረ ቦላ ጋኬዳዋ ኡባ ቆንጭሲደ፥ አዉ ኦዴዳ። ቃይካ አይሁዳቱዋ ዎꬌዳ ዉርሳናዉ ሃማን ካትያ ሚሻ ምንጅያ ጎለዉ እማናዉ ገፔዳ ሻሉዋ ልክያና ኡባይ አተናን ጌሺደ ኦዴዳ። 8 ሄዋ ጻላላ ግደናን፥ አይሁዳቱዋ ዉርሳናዉ ሱሳን ከሴዳ አዋዩ ጻፈቴዳ ዋራቃታካ ሀታካዉ እሚደ፥ ሄዋ አስትርዉ እማናዳንነ ሀንያዋ ኡባ እዝዉ ኦዳናዳን ኦዴዳ። ቃይ አስትራ ካትያኮ ገላደ፥ ባረ አሳይ ዉረናዳን ጋናታና ማላ፥ ሀታካዉ ኦዴዳ።

9 ሀታክ ዪደ፥ ማርዶክዮስ ኪቴዳዋ ኡባ አስትርዉ ኦዴዳ። 10 አስትራ ሀታካ ዛራደ፥ ማርዶክዮሳኮ ሀዋዳን ያጋደ ኪታዱ፤ 11 “ህጊ፥ ‘ማጫዋ ግድና፥ አቱማዋ ግድና፥ ኦንነ ጼገተናን ደኢደ፥ ካትያና ጋከታናዉ ካትያ ጎልያ ግዶ ዳባባ ገሎፐ፥ ሀይቆ። ሽን እ ጼገተናን ካትያኮ ገልያ ዎደ፥ ካቲ ዎርቃፐ ኦሰቴዳ ባረ ካዉተꬃ ጻምኣ ጼራ አኮ ዛሪደ በሶፐ፥ ሄ ኡራ ጻላላይ አቶ’ ያጌ። ሀ ህግያ ካትያና ዞረትያዋንቱፐ ቢደ፥ ጮ አሳ ጋካናዉ ደእያ አሳይ ኡባይ ኤሬዳ። ሽን ታን ሀታሙ ጋላሳ ግዶደፐ ካትያኮ ገላናዉ ጼሰታ ኤርከ” ያጋዱ።

12 ማርዶክዮስ አስትራ ኪቴዳ ኪታ ስሴዳዋፐ ጉይያን፥ 13 እዝዉ ዛሩዋ ኪቲደ፥ ሀዋዳን ያጌዳ፤ “ኔን፥ ‘ታን ካትያ ጎለን ደእያ ድራዉ፥ ሀራ አይሁዳቱዋፐ አትና፥ ታና ቦችያዌ ባዋ’ ጋደ ቆፖፓ! 14 ኔን ሀዋ ማላ ዎድያን ጮኡ ጎፐ፥ አይሁዳቶ ማዱ ሀራ ሳፐ ያናዋ። ኡንቱንቱካ ቱሙፐ አታና፤ ሽን ኔንነ ነ አዉዋ ጎልያ አሳይ ꬋያና። ኔን ካታቶ ግዳደ ዬዳዌ ሀዋ ማላ ዎድያሰንቶነ ኦን ኤሪ?” ያጌዳ።

15 አስትራ ማርዶክዮሳዉ ሀዋዳን ያጋደ ዛራደ ኪታዱ፤ 16 “ባደ ሱሳ ደእያ አይሁዳቱዋ ኡባ እትፐ ሺሻ። ጾሚደ፥ ታዉ ዎስተ። ሄዙ ጋላሳይነ ሄዙ ቃማይ ዉራናዉ፥ ቁማ ሞፕተ፤ ሃꬃ ኡሾፕተ። ታንካ ታ ዳንጋጽረቱዋና ሄዋዳን ጾማና። ሄዋፐ ጉይያን፥ እ ኡባ ህግያን ተኤቴዳዋ ግዶፐነ፥ ካቲ ደእያ ሳኣ ታን ገላና። ታን ሀይቂንቶነ ሀይቃና” ያጋዱ።

17 ማርዶክዮስ ቢደ፥ አስትራ አ አዛዜዳዋዳን ኡባባ ኦꬄዳ።