1 ሄዋፐ ጉይያን፥ ካቲ አርጸክስስ ሀማና ሱንꬃተꬃ ꬎቂሲደ፥ ባረ ካፓቶ ካፑዋ ኦꬂደ ሱንꬄዳ። ሀማዳታ ናኣ ሀማን አይሁዳቱዋ ሞርክያ፥ አጋጋ ዛርያ። 2 ካቲ አዛዝ ዎꬄዳ ድራዉ፥ ካትያ ጎልያ ፐንግያን ደእያ ካፓቱ ኡባቱ ሃማን አꬍያ ዎደ፥ ጉልባቲደ አ ቦንቺኖ። ግዶ ሽን፥ ማርዶክዮስ ሃማናዉ ጉልባተናንነ ቦንቼናን እጼዳ። 3 ሄ ዎድያን ካትያ ጎልያ ፐንግያን ደእያ ካፓቱ ማርድክዮሳ፥ “ካትያ አዛዙዋ ፖለናን አያዉ እጻይ?” ያጊደ፥ 4 ሀቼ ሀቼ ኦዲኖ፤ ሽን እ ኡንቱንቱ ኦድያዋ ስሳናዉ ኮይቤና። ኡባ ቃይ፥ “ታን አይሁዳ አሳ ግድያ ድራዉ፥ ሃማናዉ ጉልባታናዉነ አ ቦንቻናዉ ዳንዳይከ” ያጌዳ።

ሄዋፐ ጉይያን ኡንቱንቱ፥ “ሀ ማርዶክዮስ ኦድያ ጋሱዋ ስሲደ፥ ሃማን ዋናንዴሻ!” ጊደ፥ አዉ ኦዴድኖ። 5 ማርዶክዮስ ባረዉ ጉልባተናዋነ ባረና ቦንቼናዋ ሃማን ኤሬዳ ዎደ፥ ሀንቁዋ ታማዳን ኤጽ ከሴዳ። 6 ሄዋ ቦላካ ቃይ፥ ማርዶክዮስ አይሁዳ አሳ ግድያዋ ኤሬዳ፤ አ ጻላላ ዎꬍያዌ ላፋባ ጊደ ቆፔዳ ድራዉ፥ አርጸክሲሳ ካዉተꬃ ግዱዋን ደእያ አይሁዳ ዛርያ ኡባ ዎꬋናዉ ሀልቼዳ።

7 አርጸክስስ ካተቴዳ ታማነ ላኤንꬆ ላይꬃን፥ ንሳና ጌተትያ ኮይሮ አግናን፥ አይሁዳቱዋ ዎꬍያ አግናነ ጋላሳ ኤራናዉ፥ ፑሪማ ጌተትያ ሳማ አ ስንꬃን የጋናዳን፥ ሃማን አዛዜዳ። ሄ ሳማይ ዎꬌዳ ማራን፥ አዳረ ጌተትያ ታማነ ላኤንꬃ አግናን፥ ታማነ ሄዘንꬆ ጋላሳይ አይሁዳቱ ዉርያ ጋላሳ ግድያዌ ቃሸቴዳ።

8 ሄዋፐ ጉይያን፥ ሃማን ካትያ አርጸክስሳዉ ሀዋዳን ያጊደ ኦዴዳ፤ “ነ ካዉተꬃ ግዱዋን ሙለ ሳኣን ላለቲደ ደእያ እት ዛረ አሳቱ ደኢኖ፤ ኡንቱንቱ ደኡዋ ማራይ ሀራ አሳ ኡባዋፐ ዱማ፤ ሄዋ ጻላላ ግደናን፥ ኡንቱንቱ ካትያ ህግያዉካ ሞደትክኖ። ሄዋ ድራዉ፥ ኔን ኡንቱንቱ ደኢኖ ጋደ ጮኡ ጎፐ፥ ሄዌ ሎአ ግደና። 9 ሄዋ ድራዉ ካትያዉ፥ ሀ ቆፋይ ኔና ናሸቾፐ፥ ሀ አሳቱዋ ዎꬍ ꬋይሳና ማላ፥ አዋዩዋ ከሳ። ሄዋ ነ ኦꬆፐ፥ ታን 340,000 ኪሎ ግራምያ ዴጽያ ብራ ካትያ ሚሻ ምንጅያ ጎለዉ ገልሳናዳን፥ ሀ ኦሱዋ ኦꬅያዋንቶ እማና” ያጌዳ።

10 ሄዋፐ ጉየ ካቲ ባረ ማታ ኤርሳናዉ አዋዩዋ ቦላ ዎꬅያ ምግዱዋ ማታፋ ባረ ብራꬍያፐ ከሲደ፥ አይሁዳቱ ሞርክያ፥ አጋጋ ዛርያ፥ ሀማዳታ ናኣ ሃማናስ እሜዳ። 11 ካቲ ሃማና፥ “ኔን እማና ጌዳ ብራይ ነ ማታን ደኦ፤ ሽን ሀ አሳቱዋ ቦላ ነ ዶሴዳዋ ኪተታ” ያጌዳ።

12 ሄዋ ድራዉ፥ ኮይሮ አግናን፥ ታማነ ሄዘንꬆ ጋላሳን፥ ሃማን ካትያ ጻፈቱዋ ጼጌዳ። ሄ አዋዩ ቢታ ኡባን ደእያ አሳዉ ዱማ ዱማ ቃላንነ ዱማ ዱማ ፕዶልያን ጻፈቲደ፥ ካትያፐ ጋርሳና ጋድያ ሞድያዋንቱኮ፥ አዉራጃ ሞድያዋንቱኮነ ደርያ ካፓቱ ኡባኮ ኪተታናዳን አዛዜዳ። አዋዩካ ካትያ አርጸክሲሳ ሱንꬃን ጻፈቲደ፥ ምግዱዋ ማታፋይ አ ቦላ ዎꬎዋፐ ጉየ፥ 13 ኤሌል ዎꬃንቻቱ አ ካዉተꬃ ጋድያ ኡባ ጋꬃናዳን ኪተቴድኖ። ሄ አዋዩ፥ “አዳረ ግያ ታማነ ላኤንꬆ አግናን ታማነ ሄዘንꬆ ጋላሳን፥ አይሁዳ ኡባ፥ ያላጋ፥ ጭማ፥ ማጫዋ፥ አቱማዋ፥ ናናካ አሸናን መጽ እት ጋላስ ዉርስ ዎꬍተ፤ ኡንቱንቱ አቁዋካ ቦንቂተ” ያጌ። 14 ሄዋ ድራዉ፥ ሄ ኬሬዳ ጋላሳይ ጋክያ ዎደ፥ አሳይ ኡባይ ጊገታናዳን፥ ሄ አዛዙ ቢታዉ ኡባዉ ጻፈቲደ ኪተቴዳ።

15 ካትያ አዛዙዋን ኤሌል ዎꬃንቻቱ ቢታ ኡባካ ኪታ ጋꬄድኖ። ቃይ ሱሳ ካታማን ካትያ ጎልያ ሄራን ጻፈቴዳ ህጊ እመቴዳ። ያትና፥ ሱሳ ካታማ አሳይ ኡባይ ሻቢረቴዳ። ሽን ካቲነ ሃማን እትፐ ኡቲደ፥ ሚኖ።