1 ሄዋፐ ስሚደ፥ ካትያ አርጸክሲሳ ሀንቁ ዶቼዳ፤ አስጺና ኦꬄዳባነ እካ እዝ ቦላን ከሴዳ አዋዩዋባ ቆፔዳ። 2 ሄ ዎደ ካትያ ጎለን ኦꬅያ ቆማቱ አ ሀዋዳን ያጌድኖ፤ “ሎኦ ማላና ደእያ ዎዶሮ ማጫ ናና ኮዪደ፥ ካትያዉ አሀና ማላ፥ 3 ነ ካዉተꬃ ግዱዋን ደእያ ቢታቱዋ ኡባን ካፓቱዋ ሱንꬃ። ኡንቱንቱካ ሎኦ ማላና ደእያ ዎዶሮ ማጫ ናና ዶሪደ፥ ሱሳ ካታማ አሂደ፥ ማጫ አሳ ጊጌዳ ጎለን ዎꬅኖ። ሄዋን ሄ ማጫ አሳው ጎለዉ ሀላፈ ግድያ ካትያ ጎይሩዋ ሄጋያ ኩሽያን ኡንቱንቱ ደእሽን፥ ኡንቱንቱ ማላ ሎይꬅያባይ ኡንቱንቶ እመቶ። 4 ሄዋፐ ጉይያን፥ ካትያ ኡባፐ አꬋ ናሸችያ ወዶራታ አስጺን ኮታን ካታቶ ግዱ” ያጌድኖ። ሄዋፐ ጉየ ሀ ዞሪ ካትያ ናሸቼዳ ድራዉ፥ ካቲ ሄዋዳን ኦꬄዳ።

5 ሄዋን ሱሳ ካታማን ካቲ ደእያ ሳን እት ማርድክዮሳ ጌተትያ አይሁዳ ጋድያ አሳይ ደኤ። እካ ያኢራ ናኣ፤ ያኢር ሽምአ ናኣ፤ ሽምእ ቢንያማ ዛርያ ግዴዳ ቂሳ ናኣ። 6 ባብሎነ ካቲ ናቡካዳናጾረ ይሁዳ ካትያ ዮኣኪናነ ሀራ አይሁዳ አሳ ኦላን ኦሞዲደ አፌዳ ዎደ፥ ማርዶክዮስ የሩሳላመፐ ኡንቱንቱና እትፐ ቤዳዋ። 2 ካታ. 24:10-16፤ 2 ኦዱዋ 36:10 7 እ ሄ ጋድያን ደኢደ፥ ባረ አዉዋ እሻ ናቶ፥ እብራይጸ ቃላን ሀዳሶ ጌተትያ አታነ አዉ ሀይቅኬዳ አስቴሮ ባረናና ዎꬂደ ድቼ። እዝ አዉነ አታ ሀይቆዋፐ ጉይያን፥ ማርዶክዮስ እዞ አፊደ፥ ባረ ማጫ ናቶ ኦꬂደ ድቼዳ። አስትራ መꬋንካ ጌሳንካ ሎይꬃ ማላ ሎአ።

8 ካቲ ከሴዳ አዋዩዋነ አዛዙዋ ማራን፥ ካቲ ደኢያሳ ሱሳ ካታማ ካትያ ጎልያ ዬዳ ዶረቴዳ ሀጋየ አዎተꬃን ኡቴዳ ጮራ ዎዶሮቱዋፐ እትና አስቴሮ። እዛካ ያደ፥ ማጫ አሳው ጊጌዳ ጎለ ሀላፈ ግዴዳ ሄጋያ ግያዋ አዎተꬃን ኡታዱ። 9 ሄጋይ አስትርን፥ ሎይꬅ ናሸቴዳ፤ እዛ አ ስንꬃን ናሹዋ ደማዱ። ያቲደ ኤለካ ማናዉ ቁማነ ቦላ ኦከትያዋ እዝዉ እሜዳ። ቃይ እዝዉ ኦꬃናዉ ካትያ ጎልያፐ ዶረቴዳ ላፑን ዳንጋጽረቱዋ ሱንꬂደ፥ ማጫ አሳዉ ጊጌዳ ጎለን፥ ክፍልያ ኡባፐ አꬊደ ሎእያ ክፍልያን ኦነ እ ዳንጋጽረቱዋ አፊደ ዎꬄዳ።

10 ማርዶክዮስ እዝዉ ካሰቲደ ኦዴዳዋዳን፥ አስትራ ሀቃ አሳፐንቶነ ኦ ቆመንቶ ኦዉነ ኦዳበይኩ። 11 ቃይካ ማርዶክዮስ አስትር ፓጻተꬃነ እዝዉ ሀንያዋ ኤራናዉ፥ ማጫ አሳ ጎልያ ዳባባፐ ስንꬃና ጋላሳን ጋላሳን ያነ ሃነ ሀመቴ።

12 እት እት ወዶራታ ካትያኮ ገላናፐ ካሰታደ ማጫዋንቶ አዛዘቶ ማራዳን፥ እዛ እት ላይꬃ ኩመንꬃ ባረ ማላ ሎይꬃደ ጋምአዉ፤ ሄዌካ፥ ኮይሮ ኡሱፑን አግና ካርቢያ ዛይትያን ጎርፐታደ ጋምኣደ፥ ላኤንꬆ ኡሱፑን አግና ቃይ፥ ሎኦ ሳዊያ ሽቱዋንነ ማላ ሎይꬅያባን ጎርፐታዉ። 13 ሄዋፐ ጉይያን፥ እት ወዶራታ ካትያኮ ገልያ ዎዲ ጋክያ ዎደ፥ እዛ ኮዮዌ ኡባይ እመትና፥ ማጫ አሳ ጎልያፐ ከሳደ፥ ካቲ ደእያ ሳኣ ገላዉ። 14 ቃማ ገላደ፥ ካትያና አቄዳዋፐ ህን ባጋን፥ ዎንትና ጉራ ከሳዉ። ካትያና አቅ ከሴዳ ማጫዋንቱ ደእያ ሀራ ጎልያ እዞ አፊኖ። ሄ ጎልያዉ ሀላፈ ግድያ ካትያ ጎይሩ ሻእሻጋዝ እዞ ናጌ። ካቲ ዶሲደነ እ ሱንꬃ ጼሴዳ፥ “ኤበሎ አህተ” ጋና ꬋዮፐ፥ አ ላኤንꬆ ካትያኮ ገላናዉ ዳንዳዩኩ።

15 ሄዋ ግዶደ፥ ካትያኮ ገልያ ካላይ አስቴሮ ጋኬዳ። አስትራ ማርድክዮሳ አዉዋ እሻ አብሀይላ ናቶ፤ ማርዶክዮስ ባረ ናቶ ኦꬂደ ድቼዳኖ። እዛ ማጫ አሳይ ጊግያ ጎለዉ ሀላፈ ግድያ ካትያ ጎይሩ ሄጋይ ዞሬዳዋፐ አትና እዛ አይነ ኦቻበይኩ። ኦ በኤዳ ኡባይ እ ማላ ናሼዳ። 16 አርጸክስስ ካተቴዳ ላፑንꬃ ላይꬃን፥ ተቤታ ጌተትያ ታማንꬃ አግናን አስቴሮ ካቲ ደእያ ሳኣ አፌዳ።

17 ካቲ ሀራ ማጫዋንቱ ኡባፐ አꬂደ፥ እዞ ዶሴዳነ ሀራ ዎዶሮቱዋ ኡባፐ እዝን ናሸቴዳ። ሄዋ ድራዉ፥ ካዉተꬃ ካላቻ እ ሁጲያን ዎꬂደ፥ እዞ አስጺን ሳኣን ካታቶ ኦꬄዳ። 18 ሄዋፐ ጉይያን፥ ካቲ አስትር ቦንቾ ዎልቃማ ባላ ጊግሲደ፥ ሞድያዋንታነ አናና ኦꬅያዋንታ ጼሴዳ። ቃይ ባረ ካዉተꬃ ግዶን ናሸቻ ባላይ ቦንቼታና ማላ አዋዪደ፥ እሞታካ ባረ ኬካተꬃ ኬሻ እሜዳ።

19 ዎዶራቱ ላኤንꬁዋ ሺቄዳ ዎደ ማርዶክዮስ ካትያ ጎለ ፐንግያን ማታይ እመትና ኡቴዳ። 20 አስትራ ሀቃ አሳፐንቶነ ኦ ቆመንቶ ኦነ ኦዳበይኩ። ኦ ማርዶክዮስ፥ “ኦዶፓ” ጌዳ ድራዉ፥ ካሰ ናአተꬃን አዛዘትያዋዳን፥ ሀእካ አዉ አዛዘታዱ።

21 ማርዶክዮስ ካትያ ጎለ ፐንግያን ኡቴዳ ሄ ዎደ፥ ካቲ ደእያ ክፍለቱዋ ገልያ ፐንግያ ናግያ ካትያ ጎይረቶዋንቱፐ ላአቱ፥ ብግታንነ ተረሽ ካትያ አርጸክሲሳ ሞርኪደ፥ ዎꬋናዉ ማቀቴድኖ። 22 ኡንቱንቱ ማቁዋ ማርዶክዮስ ስሲደ፥ ካታት አስትርዉ ኦድና፥ እዛካ ማርድክዮሳ ሱንꬃን ካትያዉ ኦዳዱ። 23 ካቲ የዉዋ ሎይꬂደ፥ ቆሪደ ጼልያ ዎደ፥ የዉ ቱማ ግዲደ ቤትና፥ ሄ ላኡ አሳቱዋ ኮጫን ካቂደ ዎꬌዳ። ሀ ሀኖተꬃይካ ካትያ አርጸክሲሳ ታርክያ ጻፍያ ማጻፋን እ ደእያ ሳኣን ጻፈቴዳ።