1-2 ሀዌ ካቲ አርጸክስስ ህንደ ጋድያፐ ቶጵያ ጋድያ ጋካናዉ ደእያ፥ ጼታነ ላታማነ ላፑን ቢታቱዋ ሞድያ ዎደ ሀኔዳባ። እ ኡቲደ ሞድያ ዋና ካታማይ ካቲ ደኢያሳ ሱሳ ጌተቴ። እዝራ 4:6

3 እ ካተቴዳ ሄዘንꬆ ላይꬃን፥ ባረፐ ጋርሳና ሞድያዋንቶነ አናና ኦꬅያዋንቶ ባላ ጊግሴዳ። ሄ ባላ ሳኣን ሜዶናነ ፓርሰ ጋድያ ኦላ ጋዳዋቱ፥ ጋድያ ካፓቱነ አይስያዋንቱ ቤቴድኖ። 4 ካቲ እት ጼታነ ሆስፑን ታሙ ጋላሳ ኩመንꬃ ባረ ካዉተꬃ ዱረተꬃነ ባረ ቦንቾ አንጋ ኡባ ጮራ ጋላሳ ኡንቱንታ በሴዳ።

5 ሄ ጋላሳቱዋፐ ጉይያን፥ ካቲ ቃይካ ሀራ ላፑን ጋላሳዉ ጋምእያ ባላ፥ ሱሳ ካታማን ካቲ ደኢያሳ፥ ዱርያፐ ማንቁዋ ጋካናዉ ደእያ አሳ ኡባዉ ጊግሴዳ። ሄ ባላይ ካትያ ጎልያ አታክልትያ ሳኣን ጊጌዳ። 6 ሄ ሳኣን ደእያ ዳባባይ፥ ሊኑዋፐ ዳደቴዳ ቦꬃነ ሳሉዋ ማላትያ ጋርዳቱዋን ፑላት ኡቴዳ። ጋርዶቱካ ቦꬃነ ኦቻ ቴራ ማላትያ ሎኦ ሊኑዋ ባቀꬃን አꬂና፥ እብነባራድያ ጌተትያ ሹቻፐ ኦሰቴዳ ቱሳ ቦላን ደእያ ብራ ምግዳቱዋን ካቀት ኡቴድኖ። ቃይ ዎርቃፐነ ብራፐ ኦሰቴዳ አርሳቱ፥ ዱማ ዱማ ማላይ ደእያ አልኦ ሹቻቱዋፐነ እንቆቱዋፐ ኦሰቴዳ ባሱዋን ማራን የገት ኡቴድኖ። 7 እቱ እቱዋፐ ዱማ ግዴዳ ዎርቃ ቡርጩኩዋን ኡሻይ አሳዉ እመቴ፤ ካቲካ ባረ ሎኦተꬃን ዳሮ ሎአ ዎይንያ ኤሳ ዳርስ እሜዳ። 8 እት እት አሳይ ባረ ኮዮዋ ኬሻ ኡሼ፤ ሄዋ ካቲ ካሰቲደ፥ ባረ ቆማቶ ኦድ ዎꬄዳ።

9 ሄ ዎደ ካታታ አስጺናካ ማጫ አሳ ባላ ካትያ ጎለን ጊግሳዱ።

10 ሾቢ ዶመቴዳ ላፑንꬃ ጋላስ፥ ካቲ አርጸክስስ ዎይንያ ኤሳ አሊደ ናሸቴዳ ዎደ፥ ባረ ቆማቱዋ ማሁማና፥ ብዝታ፥ ሀርቦና፥ ቢግታ፥ አባግታ፥ ዘታራነ ካርካሳ ጌተትያ ላፑን ጎይረቴዳዋንታ ጼሲደ፥ 11 “ካታቶ አስጺኖ ካዉተꬃ ካላቻ ዎስሲደ፥ ሃ አኪደ ዪተ” ያጊደ አዛዜዳ። አያዉ ጎፐ፥ አ ሎይꬃ ማላ ሎአ ግድያ ድራዉ፥ ካፓቱነ አሳይ ኡባይ እዞ በአና ማላ፥ ካቲ ኮዬዳ። 12 ሽን ካትያ አዛዙዋ ሱንꬃቱ ኦድና፥ ካታታ አስጺና ካትያ ስንꬃዉ ዬናን እጻዱ። ሄዌ ካትያ ሀንቁዋን ኤꬄዳ።

13-14 ሄዋ ድራዉ፥ ካቲ ባረ ስንꬃ ሺቃናዉነ ባረ ካዉተꬃ ጋርሳን ዎልቃማ ማታይ ደእያ ላፑን ፓርሰነ ሜዶና ሱንꬃቱዋ ጼሲደ ገልሴዳ። ኡንቱንቱ ካርሻና፥ ሸታራ፥ አድማታ፥ ታርሴሳ፥ መሬሳ፥ ማርሳናነ ማሙካና ጌተቲኖ። ሄ አሳቱ አꬌዳ ኤራንቻነ ሄ ጋድያ ህግያ ኡባነ ደኡዋ ዎጋ ምንሲደ ኤሪኖ። ሀዋ ማላባዉ ካቲ ኡባ ዎደካ ኡንቱንታ ኦቼ። 15 ካቲ ኡንቱንታ፥ “ታን፥ ካቲ አርጸክስስ፥ ታ ጎይረቶዋንቱ ቦላ ኪትና፥ ካታታ አስጺና ታ አዛዙዋ ፖለናን እጻዱ። ሄዋ ድራዉ፥ ህጊ ኦድያ ማራን እዞ ዋታናዉ በሲ?” ያጊደ ኦቼዳ።

16 ሄዋፐ ጉየ ኡንቱንቱፐ እቱ፥ ማሙካን ካትያ ስንꬃንነ ካፓቱ ስንꬃን ዛሪደ፥ ሀዋዳን ያጌዳ፤ “ካታታ አስጺና ካትያ ጻላላ ግደናን ደእሽን፥ አ ካፓቱዋ ኡባነ አ ካዉተꬃ ኡባ ግዱዋን ደእያ አሳ ኡባ ናቃዱ። 17 አያዉ ጎፐ፥ ሀ ካዉተꬃ ግዶን ደእያ ማጫ አሳይ ኡባይ ካታታ አስጺና ኦꬄዳዋ ስሲደ፥ ባረ አስና አስና ካꬋናዉ ዶማና። ኡንቱንቱካ፥ ‘ካቲ አርጸክስስ ባረኮ ያናዳን ጼግስና፥ ካታታ አስጺና እጻበይኬየ!’ ያጋና። 18 ሄዋ ጻላላ ግደናን፥ ፓርሰነ ሜዶና ካፓቱ ማቻቱ ሀዋ ስሴዳ ዎደ፥ ሀቼ አዋይ ዉላናዉካ ባረንቱ አስናቱዋ ሄዋዳን ጊደ ካꬋና። ሄዋን ማቼቱዋፐነ አስናቱዋፐ ግዱዋን ካꬊነ ሀንቁ ዳራና።

19 “ሄዋ ድራዉ ካትያዉ፥ ኔን ዶሶፐ፥ አስጺና ላኤንꬆ ነ ስንꬃ አናዳን ድግያ አዋዩዋ ከሳ፤ ሄ አዋዩካ ላኤንꬆ ላመተና ማላ፥ ፓርሰነ ሜዶና ህግያ ግዶን ጻፈቶ። ሄዋፐ ጉይያን፥ አ ካታቶ ግድያ ቦንቹዋ ኢፐ ኬክያ ሀራርዉ እማ። 20 አያዉ ጎፐ፥ ሀ ኔን አꬄዳ አዋዩ ሀ ዎልቃማ ካዉተꬃን ኡባን ኦደትያ ዎደ፥ እት እት ማቻታ ዱረ ግድና፥ ማንቆ ግድና፥ ሻከናን ባረ አስና ቦንቻና” ያጌዳ።

21 ሄዋፐ ጉየ ካቲነ አ ካፓቱ ሀ ዞርያን ናሸቴድኖ። ሄዋ ድራዉ፥ ማሙካን ጌዳዋዳን ካቲ ኦꬄዳ። 22 እ ባረ ካዉተꬃ ግዶን ደእያ ዱማ ዱማ ቢታቱዋ ኡባዉ ኡንቱንቱ ፕዶልያንነ ኡንቱንቱ ቃላን ጻፊደ፥ ዳብዳቢያ ኪቴዳ፤ ሄ አዋዩ፥ እት እት አስናይ ባረ ጎልያ ጎልያ አይሳናዉነ ባረ ቃላን ሃሳያናዉ ካፑዋ ግድያዋ ኦዴ።