1 ሄ ጋላስ አሳይ ኡባይ ስስሽን፥ ሙሴ ማጻፋይ ናባበቴዳ፤ ሄ ዎደ ኡንቱንቱ፥ “ሞኣበ ጋድያ አሳይነ አሞና ጋድያ አሳይ ጾሳ ማባራን ጋከታናዉ በሰና” ግያ ሳኣ ማጻፋ ግዶን ደሜድኖ። ዛረ. 23:3-5 2 አያዉ ጎፐ፥ እስራኤልያ አሳይ ግብጼፐ ከሲደ፥ ካናነ ብያ ዎደ፥ ሞኣባነ አሞና ጋድያ አሳይ ኡንቱንቶ ካꬃነ ሃꬃ እመናን እጼድኖ። ሄዋ ቦላካ ቃይ እስራኤልያ አሳ ሸቃና ማላ፥ ባላማዉ ሻሉዋ እሚደ ሻሜድኖ። ግዶ ሽን፥ ኑ ጾሳይ ሸቃ አንጆ ላሜዳ። ፓይ. 22:1-6 3 ሀ ህግያ እስራኤልያ አሳይ ስሴዳ ዎደ፥ አላጋ ዛርያ ዋላካይ ደእያ ኡባ እስራኤልያፐ ሻኬዳ።

4 ሄዋፐ ካሰቲደ፥ ጌሻ ጎልያን ሚሻቱዋ ዎꬅያ ክፍለቶ ካፑዋ ግዴዳ ኤልያሽብ ጾቢያና ዳቦታ መꬍ ዎꬄዳ። 5 ሄዋፐ ደንደዳዋን ካꬃ እሞታ፥ እጻና፥ ጌሻ ጎልያን ደእያ ዱማ ዱማ ሚሻቱዋ፥ ካꬃፐ ዎይንያፐነ ዛይትያፐ ሌዋቶ፥ ማዝሙርያ የጽያዋንቶነ ፐንግያ ናግያዋንቶ እምያ አስራታነ ቄሳቶ እምያ ቆሙዋ ዎꬅያ ዎጋ ክፍልያ ኤልያሽብ ጾቢ አቃና ማላ፥ አዉ ጊግሴዳ።

6 ሀ ኡባባይ ሀንያ ዎደ ታን የሩሳላመን ደእከ። አያዉ ጎፐ፥ አርጸክሲስ ባብሎነ ጋድያን ካተቴዳ ሀታማነ ላኤንꬆ ላይꬃን ታን ስማደ ባብሎነ ጋድያ ካትያኮ ባ ክቻድ። ግዶ ሽን፥ ጉꬃ ዎድያፐ ጉይያን፥ ካትያ ኦቻደ፥ 7 የሩሳላመ ስማደ ያድ። ጾሳ ጌሻ ጎሊ ደእያ ሳኣን ኤልያሽብ ጾቢያዉ አቅያ ክፍልያ ጊግሲደ፥ እ ኦꬄዳ ኢታባ አኬካድ። 8 ሎይꬃ ሀንቀታደ፥ ጾቢያ ሶይ ሻሉዋ ኡባ ክፍልያፐ ከሳደ፥ ካረ ኦላድ። 9 ክፍልያካ ቃይ ዎጋዳን ጌሻና ማላ አዛዛድ። ጾሳ ጌሻ ጎልያ ሚሻቱዋ፥ ካꬃ፥ እሞታነ እጻና ዛራደ ሄ ሳኣ ገልሳድ።

10 ቃይ አሳይ ሌዋቶነ ማዝሙርያ የጽያዋንቶ በስያ ቁማዉ እምቤና ድራዉ፥ ሌዋቱነ ማዝሙርያ የጽያዋንቱ ኡባይ ባረንቱ ኪታ አጊደ፥ ጎሻዉ ጉየ ቤዳዋ በኣድ። ዛረ. 12:19 11 ሄዋ ድራዉ፥ ታን ካፓቱዋ፥ “ጾሳ ጌሻ ጎልያ ኦሱዋ አያዉ ኦል አጌድቴ?” ያጋደ ሀንቀታድ። ሄዋፐ ጉይያን፥ ኡንቱንታ ጼጋደ ኡባካ ኡንቱንቱ ኦሶ ኦሱዋ ዛራድ። 12 ያትና፥ ይሁዳ አሳይ ኡባይ ካꬃፐ፥ ዎይንያፐነ ዛይትያፐ እምያ አስራታ ጌሻ ጎልያ ሚሻቱዋ ዎꬅያ ጎልያ ዛሪደ፥ አሁዋ ዶሜዳ። ሚልክ. 3:10 13 ታን ቄስያ ሸሌምያ፥ ጻፍያ ጻዶቃነ ሌዊያ ፓዳያ ሚሻ ዎꬅያ ጎልያዉ ካፑዋ ኦꬃደ ሱንꬃድ። ቃይ ማታንያ ናኣ ናኣ ዛኩራ ናአይ ሀናን ኡንቱንታ ማድያዋ። ሀዋንቱ ኡባይካ ኮሽያዋ ኡባ ባረንቱ እሻቶ ሻክ ሻክ እምያዋን አማነትያዋንታ ግዴድኖ።

14 “ታ ጾሳዉ ታና ቆፓ፤ ቃይ ነ ጌሻ ጎልያ ኪታይ ጊጋና ማላ፥ ታን ኦꬄዳ ሎኦ ኦሱዋካ ዶጎፓ” ያጋደ ታን ዎሳድ።

15 ሄ ዎድያን ታን ይሁዳን ደእያ አሳይ ሳምባታ ጋላስ ዎይንያ ጉምእሽን በኣድ፤ ሀራቱካ ቃይ ካꬃ፥ ዎይንያ ኤሳ፥ ዎይንያ አይፍያ፥ ባላስያ አይፍያነ ሄዋንታ ማላትያባቱዋ ባረንቱ ሀርያን ጫኒደ፥ ሳምባታ ጋላሳን የሩሳላመ አህያዋ በኣድ። ሄዋ ድራዉ፥ ኡንቱንቱ ሳምባታ ጋላሳን ዛልኤናዳን ታን ኡንቱንቶ ምንሳደ ኦዳድ። ከሳ 20:8-10፤ ዛረ. 5:12-14፤ ኤር. 17:21-22 16 ሄዋ ቦላካ ቃይ የሩሳላመን ደእያ ጺሮሳ ጋድያ አሳቱ ሞልያነ ሀራ እት እት ዛልኤ ሚሻቱዋ አሂደ፥ ሳምባታን የሩሳላመን ይሁዳ አሳዉ ዛልኢኖ። 17 ሄዋ ድራዉ፥ ታን ይሁዳ ካለꬅያዋና ሀዋዳን ያጋ ዋላቀታድ፤ “ሀዋ ማላ ኢታ ኦሱዋ ኦꬂደ፥ ሳምባታ አያዉ ቱንሲቴ? 18 ጾሳይ ሀዋ ማላ መቱዋ ኑ ቦላንነ ኑ ካታማ ቦላን አሄዳዌ፥ ካሰ ህንተንቱ አዎቱ ሄዋ ማላ ኢታባ ኦꬂና ግደኔየ? ሀእ ህንተንቱ ቃይ ሳምባታ ቱንሲደ፥ እስራኤልያ ቦላን ሀራ ሀንቁዋ አሀናዉ ሀኒታ” ያጋድ።

19 ሄዋፐ ጉይያን፥ ሳምባታ ጋላሳፐ ካሰቲደ ደእያ ጋላሳን ሳአይ ለለምእያ ዎደ፥ የሩሳላመ ግምቢያ ፐንገቱ ጎርደታናዳንነ ሳምባታይ አꬋናዉ ዶየተናዳን ታን አዛዛድ። ቃይ ሳምባታ ጋላሳን አይ ዛልእያነ አኪደ ገለናዳን ናጋና ማላ፥ ታ ቆማቱዋፐ እቱዋ እቱዋ ግምቢያ ፐንግያን ኤሳድ። 20 ሄዋ ድራዉ፥ ዱማ ዱማ ዛልኤ ሚሻቱዋ አህያ ዛልአንቻቱ እቱዋፐ ቢደ ላኡዋ ጋካናዉ፥ የሩሳላመ ግምቢያፐ ጋጻ ባጋና አቄድኖ። 21 ሽን ታን ኡንቱንታ ሀዋዳን ያጋደ ሴራድ፤ “ግምቢያፐ ጋጻና ዋናናዉ አቂቴ? ህንተንቱ ላኤንꬆ ሄዋዳን ኦꬆፐ፥ ታን ዎልቃንካ ህንተንታ ተአና” ያጋድ። ሄ ጋላሳፐ ጉይያን፥ ላኤንꬆ ሳምባታ ጋላስ ሙለ ይበይክኖ። 22 ሌዋቱ ባረንቱ ሁጲያ ጌሻናዳንነ ሳምባታ ጋላሳይካ ጌሻ ግዳና ማላ፥ ግምቢያ ፐንገቱዋ ናጋናዳን ታን አዛዛድ።

“ታ ጾሳዉ፥ ሀ ኡባባ ድራዉ፥ ኔን ታና ቆፓ፤ ቃይ ነ አገና ሲቁዋ ድራዉ፥ ኔን ታዉ ቃረታ” ያጋደ ዎሳድ።

23 ሄ ዎደ ቃይካ ታን ይሁዳ አቱማ አሳፐ እቱ እቱ ማችያ አሽዶዳ፥ አሞናነ ሞኣበ ጋደቱዋፐ አኬዳዋ በኣድ። ከሳ 34:11-16፤ ዛረ. 7:1-5 24 ኡባ ቃይ ኢታባይ ኡንቱንቱ ናናቱዋፐ ባጋይ አሽዶዳ ጋድያ ዎይ እት እት ሀራ ጋድያ ቃላን ሃሳዪኖፐ አትና፥ ባረንቱ ጋድያ፥ ይሁዳ ቃላን ሃሳያናዉ ዳንዳይክኖ። 25 ታን ኡንቱንቱና ኦሸታድነ ኡንቱንታ ሸቃድ፤ ቃይ ኡንቱንቱፐ እቱዋ እቱዋ ደቻደ፥ ኡንቱንቱ ሁጲያ ብናና ሾዳድ። ሄዋ ጻላላ ግደናን ኡንቱንቱ ላኤንꬆ ባረንቱ ማጫ ናና ኡንቱንቱ አቱማ ናናቶ እመናዳንነ ኡንቱንቱ ማጫ ናናካ ባረንቶነ ባረንቱ አቱማ ናናቶ አከናዳን ጾሳ ሱንꬃን ጫቀታድ። 26 ቃይካ ኡንቱንታ ሀዋዳን ያጋድ፤ “ካትያ ሶሎሞነ ናጋራ ኦꬄዳዌ አላጋ ጋድያ ማጫ አሳቱዋፐ ደንዴዳዋና ግደኔየ? ሶሎሞነ ማላ ካቲ ሀራ ዳሮ ጋድያ ካተቱዋ ግዶንካ ባዋ፤ ጾሳይካ አ ዶሴዳ ድራዉ፥ እስራኤልያ አሳ ኡባ ቦላን ካተዬዳ። ግዶ ሽን፥ ሀራይ አቶ አካ አላጋ ጋድያ ማጫ አሳቱ ሀዋ ማላ ናጋራ ኦስሴድኖ። 2 ሳሜላ 12:24-25፤ 1 ካታ. 11:1-8 27 ያትና፥ ኑንካ ቃይ ህንተንቱ ዞርያ ስሲደ፥ አላጋ ማጫ አሳ አኪደነ ሄዋ ማላ ኢታባ ኦꬂደ፥ ጾሳ ናቃኔየ?” ያጋድ።

28 ቄስያ ኡባቱዋ ካፑዋ ኤልያሽባ ናናቱዋፐ እቱ ዮያዳአ፤ ሽን አ ናናቱዋፐ እቱ ቤት-ሆሮና ካታማ አሳ ግድያ ሳንባላጻ ናቶ አኬዳ። ያትና፥ ታን አ ታ ደእያ ሳኣፐ የደርሳድ። ናህ. 4:1

29 “ታ ጾሳዉ፥ ሀዋንቱ ቄሰተꬃ ዎጋ ቱንሴዳዋነ ኔን ቄሳቱ ዋናነ ሌዋቱዋና ዎꬄዳ ቃላ ጫቁዋ ኮሌዳዋ በአ” ያጋደ ታን ዎሳድ።

30 ኡንቱንታ አላጋ ግዴዳ የዉዋ ኡባፐ ጌሾዋፐ ጉይያን፥ ቄሳቶነ ሌዋቶ ኡንቱንቱ ኦሱዋ ኦሱዋ እማድ። 31 ቃይ ያርሹዋ ጹግያ ምꬃይካ ዎድያን ዎድያን ያና ማላነ አሳይካ ባረዉ አይፌዳዋፐ ኮይሮ አይፍያ እሞታ ኦꬂደ አሀና ማላ፥ ዎጋ ዎꬃድ።

“ታ ጾሳዉ፥ ነ ሎኦተꬃን ታና ቆፓ” ያጋደ ታን ዎሳድ።