1 ያቆባና ግብጼ ቤዳ እስራኤልያ አቱማ ናና ሱንꬃይ ሀዋፐ ካሊደ ጻፈቴዳ፤ ኡንቱንቱ ኡባይካ ባረንቱ ሶይ አሳ አኪደ ቤድኖ። ዶመꬃ 46:8-27 2 ሄዋንቱካ: ሮቤላ፥ ስሞና፥ ሌዋ፥ ይሁዳ፥ 3 ይሳኮራ፥ ዛብሎና፥ ቢንያማ፥ 4 ዳና፥ ንፍታሌማ፥ ጋዳነ አሴራ። 5 ያቆባ ዘረꬃቱ ኡባይ ላፑን ታማ፤ ዮሴፎ ካሰካ ግብጼ ብ ኡቴዳ። 6 ዮሴፎ፥ አ እሻቱነ ሄ የለታ ኡባይ ሀይቄዳ፤ 7 ሽን እስራኤልያ ዘረꬃይ አይፌድኖነ ሎይꬅ ዳሬድኖ፤ ሄ ቢታ ኩማና ጋካናዉ ኡንቱንቱ ሎይꬅ ጮራቴድኖ። ኪታ 7:17

8 ሄዋፐ ጉይያን፥ ዮሴፎ ኤረና ኦራꬃ ካቲ ግብጼ ጋድያን ደንዴዳ። ኪታ 7:18 9 እ ባረ አሳ፥ “በእተ፤ ሀ እስራኤላቱ ኑፐ ሎይꬅ ጮራቴድኖነ ዎልቃሜድኖ። 10 ሃ ዪተ፥ አነ ኑን ኡንቱንታ ሂላን ኦይቆይተ፤ ሄዌ ꬋዮፐ ኡንቱንቱ ካሰዋፐ ያ ዳራና። ኦን ኤር ኦላይ ደንዶፐ፥ ኡንቱንቱ ኑ ሞርከቱዋና ዳንꬂደ፥ ኑና ኦላናነ ጋድያ የጊደ ከስ አኪደ ባናዋንታ” ያጌዳ። ኪታ 7:19

11 ሄዋ ድራዉ፥ ዴጾ ኪታን ኡንቱንታ ቱጋያና ማላ፥ ኡንቱንቱ ቦላ መቀꬅ ባይና ካፖቱዋ ሱንꬄድኖ። ኡንቱንቱ ካትያዉ ፒቶማነ ራምሳ ጌተትያ ሚሻ ምንጅያ ካታማቱዋ ኬጼድኖ። 12 ሽን ግብጼቱ ኡንቱንታ ኡንኡዋ ዳርያ ዎደ፥ ኡንቱንቱ ጮራት የለቴድኖነ ቢታ ጋኬድኖ። ሄዋ ድራዉ፥ ግብጼቱ እስራኤላቶ ያዬድኖ፤ 13 ቃረታይ ባይና ሀኖታን አይለተꬃን ኪትሴድኖ። 14 ቃረታይ ባይና ዎልቃማ ኪታን፥ ስምንቱዋንነ ጹብያ መꬉዋን፥ ቃይ ሾይቃን ኦꬅያ ኡባ ቆሞ ኪታን፥ ኡንቱንቱ ደኡዋ ጫምሴድኖ።

15 ግብጼ ካቲ እብራዌ ማጫዋንታ ማርስያ ጽፓሮነ ፑሆ ጌተትያ ላኡ ማጫዋንታ ሀዋዳን ያጌዳ፤ 16 “እብራዌ ማጫ አሳቱ የልያ ዎደ ህንተንቱ ማርሲደ፥ የልሶዌ አቱማ ናኣ ግዶፐ፥ ዎꬍተ፤ ሽን ማጫ ናቶ ግዶፐ ዎꬎፕተ” ያጌዳ። 17 ሽን ማርስያዋንቱ ጾሳዉ ያዪደ፥ ግብጼ ካቲ ኡንቱንታ አዛዜዳዋዳን ኦꬅበይክኖ። ኡንቱንቱ አቱማ ናና ሸምፑዋና አሼድኖ። 18 ሄዋፐ ጉይያን ግብጼ ካቲ ሄ ማርስያዋንታ ጼሲደ፥ “ህንተንቱ አያዉ ሀዋዳን ኦꬂቴ? አቱማ ናና አያዉ ሸምፑዋና አጊቴ?” ያጊደ ኡንቱንታ ኦቼዳ። 19 ማርስያዋንቱ ዛሪደ፥ “እብራዌ ማጫ አሳቱ ግብጼ ማጫዋንቱ ማላ ግድክኖ፤ ኡንቱንቱ ምና ግድያ ድራዉ፥ ማርስያዋንቱ ጋካናፐ ካሰቲደ የል ድጊኖ” ያጌድኖ። 20 ሄዋ ድራዉ፥ ጾሳይ ማርስያዋንቶ ኬኬዳ። አሳ ፓይዱካ ጉጅ ጉጅ ቢደ፥ ካሰዋፐ ያ ጮራቴዳ። 21 ቃይ ማርስያዋንቱ ጾሳዉ ያዬዳ ድራዉ፥ ጾሳይ ኡንቱንቶ ሎኦባ ኦꬄዳ። እቶ እቶካ ሶ አሳ እሜዳ።

22 ሄዋፐ ጉይያን ካቲ ባረ አሳ ኡባ፥ “እብራዋቱዋፐ የለትያ አቱማ ናና ኡባ ናይለ ሻፋ ሃꬃን ኦልተ፤ ሽን ማጫ ናናይ የለቶፐ፥ ሸምፑዋና አግ ባሽተ” ያጊደ አዛዜዳ። ኪታ 7:19