1 ዮሴፎ ባረ አዉዋ አሃ ቦላ ኩንዲደ፥ ዬኬዳነ አ የሬዳ። 2 ሄዋፐ ጉየ፥ ዮሴፎ ꬋልያ ሺሽያ ባረ ኦሳንቻቱዋ ባረ አዉዋ እስራኤልያ አሃ ሳዊያ ሽቱዋ ኦኪደ መልሳና ማላ አዛዜዳ፤ ኡንቱንቱ ኦኪደ መልሴድኖ። 3 ሽቱዋ ኦክያዌ ኦይታሙ ጋላሳ ኩመንꬃ ዉርሴዳ፤ አያዉ ጎፐ፥ ሄዌ ጋድያ ዎጋን ኦይታሙ ጋላሳ አኬዳ። ግብጼ አሳቱ አዉ ላፑን ታሙ ጋላሳ ዬኬድኖ።

4 ዬኩዋ ጋላሳቱ አꬌዳ ዎደ፥ ዮሴፎ ግብጼ ካትያ ጎለ አሳ፥ “ታን ህንተንቱ ስንꬃን ናሸቴዳዋ ግዶፐ፥ ህንተንቱ ካትያዉ ሀዋዳን ያጊደ ኦድተ፤ 5 ‘ታ አዉ ታና እት ጫቁዋ ጫቂሴዳ፤ እ ታና፥ “ታን ሀያና ሀናይ፤ ታን ታዉ ካናነ ቢታን ቦኬዳ ጎንጎሎ ዱፉዋን ታና ሞጋ” ያጌዳ። ሄዋ ድራዉ ሀእ ታን ፑደ ባደ ታ አዉዋ ሞጋና ማላ የዳርኪ! ሄዋፐ ጉየ ታን ስማና’ ያግተ” ያጌዳ። ዶመꬃ 47:29-31

6 ካቲ፥ “እ ኔና ጫቂሴዳዋዳን ፑደ ባደ ነ አዉዋ ሞጋ” ያጌዳ።

7 ዮሴፎ ባረ አዉዋ ሞጋናዉ ፑደ ቤዳ። ካትያ ኦሳንቻቱ ኡባይ፥ አ ካትያ ጎለን ደእያ ዎልቃማ አሳይ ኡባይነ ግብጼ ቢታን ደእያ ዎልቃማ አሳይ ኡባይ ዮሴፋ ካሊደ ቤድኖ። 8 ቃይ ዮሴፎ ሶ አሳይ ኡባይ፥ አ እሻቱዋነ አ አዉዋ ሶ አሳይ ቤድኖ፤ ኡንቱንቱ ናናይ፥ ኡንቱንቱ ሚዛይነ ኡንቱንቱ ዶርሳ ዉዲ ጻላላይ ገሴመን አቴዳ። 9 ፓራ ጋረቱካ ፓራ አሳቱካ አናና ፑደ ቤድኖ፤ አ ካሊደ ቤዳ አሳይ ሎይꬅ ዳራ።

10 ኡንቱንቱ ዮርዳኖሳ ሻፋ ማታን ደእያ አጻደ ግያ ኡዱማ ጋኪደ፥ ባረንቱ ቃላ ꬎቁ ኦꬂደ፥ አዉ ዝላሌድኖነ ዬኬድኖ፤ ያን ዮሴፎ ባረ አዉዋ ዬኩዋን ላፑን ጋላሳ ኡቴዳ። 11 ሄ ቢታን ደእያ ካናነ አሳቱ አጻደ ግያ ኡዱማን ሄ ዬኩዋ በኤዳ ዎደ፥ “ግብጼቱ አያ ይባታ ዬኩዋ ዬክኖ!” ያጌድኖ። ሄዋ ድራዉ ዮርዳኖሳ ማታን ደእያ ሄ ሳአይ፥ አቤል-ምጽራይማ ጌተቴዳ።

12 ያቆባ ናናይ ባረንቱ አዉ ኡንቱንታ አዛዜዳዋዳን ኦꬄድኖ፤ 13 ኡንቱንቱ አ አሃ ካናነ ጋድያ አፊደ፥ ማምረ ማታን ደእያ ማክጴላ ግያ ጎንጎሉዋን፥ አብራሃመ ሂትያ ኤፍሮናፐ ሞጎ ሻሜዳ ጋድያን አ ሞጌድኖ። ኪታ 7:16 14 ዮሴፎ ባረ አዉዋ ሞጌዳዋፐ ጉየ፥ ባረ እሻቱዋናነ አ አዉዋ ሞጋናዉ አናና ቤዳ ሀራ አሳቱዋ ኡባቱዋና ግብጼ ስሜዳ።

15 ኡንቱንቱ አዉ ሀይቂ ድጌዳዋ በኢደ፥ ዮሴፎ እሻቱ ባረንቱ ግዱዋን፥ “ኦን ኤሪ ዮሴፎ ኑና ባረ ኡሉዋን ሞርኮፐነ ኑን አዉ ኦꬄዳ ኢታባ ኡባዉ ሀሉዋ ከሳና ኮዮፐ፥ ኑን ዋናኔ?” ያጌድኖ። 16 ሄዋ ድራዉ ዮሴፎኮ ሀዋ ማላ ኪታ ኪቴድኖ፤ “ነ አዉ ሀይቃናፐ ካሰ፤ 17 ‘ህንተ ዮሴፎ፥ “ኔን ነ እሻቱዋ ናጋራነ ኡንቱንቱ ኔና ናቄዳ ኢታ ናቁዋ ሀያና አቶ ያጋ” ያጌዳ ጊደ ኦድተ’ ያጌዳ። ሄዋ ድራዉ ሀእ ሀያና፥ ኑ ናጋራ፥ ነ አዉዋ ጾሳ ቆማቱዋ ናጋራ አቶ ያጋ” ያጌድኖ። ኪታይ ባረኮ ጋኬዳ ዎደ፥ ዮሴፎ ዬኬዳ።

18 ሄዋፐ ጉየ አ እሻቱ ባረንቱ ሁጲያዉ አኮ ዪደ፥ አ ስንꬃን ጉፋኒደ፥ “ኑን ነ አይለቱዋ” ያጌድኖ።

19 ሽን ዮሴፎ ኡንቱንታ፥ “ያዮፕተ፤ ታና ህንተንቶ ጾሳ ጌድተየ? 20 ህንተንቱ ታዉ ኢታናዉ ኦꬄድታ፤ ሽን ሀቼዋዳን ዳሮ አሳይ ሀይቀናን አታና ማላ፥ ጾሳይ ሎኦተꬃዉ ሀዋ ኦꬄዳ። 21 ሄዋ ድራዉ ስም ህንተንቱ ያዮፕተ፤ ታን ህንተናነ ህንተንቱ ናና ምዛና” ያጊደ፥ እ ኡንቱንታ ምንꬂደ ሎኦ ቃላ ሃሳዬዳ።

22 ዮሴፎ ባረ አዉዋ ሶ አሳ ኡባና ግብጼን ጋምኤዳ፤ እ ጼታነ ታሙ ላይꬃ ደኤዳ፤ 23 ኤፍሬማ ናና፥ ሄዘንꬃ የለታ በኤዳ፤ ቃይ ምናሰ ናኣ ማኪና ናናነ እ ባረ ናና ኦꬄዳ።

24 ሄዋፐ ጉየ ዮሴፎ ባረ እሻቱዋ፥ “ታን ሀያና ሀናይ፤ ሽን ጾሳይ ህንተንታ ማዳናዉ ቱሙ ጾሞሳና፤ እ ህንተንታ ሀ ቢታፐ ከሲደ፥ አብራሃመዉ፥ ይሳቃዉነ ያቆባዉ እማና ጊደ ጫቄዳ ቢታ አፋና” ያጌዳ። 25 ዮሴፎ እስራኤልያ ናና፥ “ጾሳይ ህንተንታ ማዳናዉ ቱሙ ጾሞስያ ዎደ፥ ህንተንቱ ታ መቀꬃ ሀ ቢታፐ ፑደ አኪደ ቢተ” ያጊደ ጫቂሴዳ። ከሳ 13:19፤ ኢያሳ 24:32፤ እብራ. 11:22

26 ዮሴፎ ጼታነ ታሙ ላይꬃ ደኢደ ሀይቄዳ፤ ኡንቱንቱ ሽቱዋን አ አሃ ኦኪደ መልሴዳዋፐ ጉየ፥ ግብጼ ቢታን ሳጽንያን የጌድኖ።