49
ያቆብ ባረ ናና አንጄዳ
1 ሄዋፐ ጉየ፥ ያቆብ ባረ አቱማ ናና ጼስሲደ ሀዋዳን ያጌዳ፤ “ስንꬃፐ ህንተንቶ ሀናናባ ታን ህንተንቶ ኦዳና ማላ ሺቅተ።”
2 “ህንተንቶ ያቆባ ናናቶ፥
እትፐ ሺቂደ ስስተ፤
ህንተንቱ አዉ እስራኤሊ ህንተንቶ ኦድያዋ ሀይዝተ።
3 “ሮቤላ፥ ታ ባይራ ናአዉ፥
ኔን ታ ዎልቃ፤
ታ ምኖተꬃዉ ኮይሩዋ።
ኔን ቦንቹዋንካ ዎልቃንካ ኡባፐ አꬍያዋ።
4 ኔን ድኡዋ ማላ፤ ኤቆሳአን ደአካ፤
ኔን ኡባፐ አꬍያዋ ግዳካ።
አያዉ ጎፐ፥ ኔን ነ አዉዋ ግሱዋ ከሳዳ፤
ነ አዉዋ ግሱዋ ቱንሳዳ።
5 “ስሞንነ ሌዊ እሻቱዋ፤
ኡንቱንቱ ማሻይ ማካላተꬃዉ ኦላ ሚሻ።
6 ታን ኡንቱንቱ ዞረታን ገልከ፤
ታን ኡንቱንቱ ሺቁዋንካ ኡትከ፤
አያዉ ጎፐ፥ ኡንቱንቱ ባረንቱ ሀንቁዋን
አሳ ዎꬌድኖ ባረና አካ አካ ጊና፥
ቦራቱዋ ቃንጼድኖ።
7 ኡንቱንቱ ሱሎ ሀንቁ
ኡንቱንቱ መቀꬃ ኢታተꬃይነ ሸቀቴዳዋ ግዶ!
ታን ኡንቱንታ ያቆባ አሳ ግዱዋን ላላና፤
እስራኤልያ ቢታን ትስክ ኦꬃና።
8 “ይሁዳዉ፥ ነ እሻቱ ኔና ጋላታና።
ነ ኩሺ ነ ሞርከቱዋ ፕላንትያ ኦይቃና።
ነ አዉዋ ናናይ ነዉ ሆኪደ ጎይናና።
9 ይሁዳዉ፥ ኔን ዎዳላ ጋሞ። ፓይ. 24:9፤ ሳፃ 5:5
ታ ናአዉ፥ ኔን ሻንካፐ ዎꬍ ስሚደ፥
ጮጎቲደ ግሴዳ ጋሙዋ ማላ።
ኔን አሳ ቦሸረꬃናዉ ኮየና ማጫ ጋማት ማላ።
10 አይስያዌ ያና ጋካናዉ፥
ካዉተꬃ ጻምአይ ይሁዳፐ፥
ደርያ አይስያዋንቱ ጋትማይ አ ገድያ ግዶፐ ሻከተና።
ቃይ ደርያ አሳይ አዉ አዛዘታና።
11 እ ባረ ሀርያ ዎይንያ አኑዋን፥
ባረ ሀረ ማራ ሙሩታ ዎይንያ ቱራን ቃቻና።
እ ባረ አፍላ ዎይንያ ኤሳን፥
ባረ ማዩዋ ሱꬃ ማላትያ ዎይንያ ኤሳን ሜጫና።
12 አ አይፊ ዎይንያ ኤሳፐ አꬍ ዞአና፤
አ አቻይካ ማꬃፐ አꬍ ቦጻና።
13 “ዛብሎነ አባ ዶናን ደአና፤
እ አባ ዶናን ማርካባቱ ኤቂያ ሳኣ ግዳና፤
አ ዛዋይ ሲዶና ጋካናዋ።
14 “ይሳኮረ ምኖ ሀርያ፤
ጫንያ ላኡ ዶንያቱዋ ግዱዋን ግስ ባሼ
15 እ ባረ ሸምፕያሳ ሎአ ግድያዋነ
ባረ ቢታይ ናሸችያዋ ግድያዋ በእያ ዎደ፥
ጫና ቶካናዉ ባረ ሀሽያ ሆክሲደ፥
አይለተꬃ ኦሱዋ ኦꬃና።
16 “ዳን እስራኤልያ ዛራቱዋፐ
እቱዋ ግዴዳ ባረ አሳ ቦላ ዳናታናዋ።
17 ዳን ኦግያ ዶናን ደእያ ሾሻ፤
ፓራ ቶጌዳዌ ጉየ ኩንዳና ማላ
ፓራ ግንድያ ዱክያ፥
ኦግያን ደእያ ሀሱዋ።
18 አቤት መꬍና ጎዳዉ፥ ታን ኔን አሻናዳን ናጋይ።
19 ጋድ ቦንቂያዋንቱን ደሸታናዋ፤
ሽን እካ ኡንቱንቱ ቃታማ ካሊደ
ኡንቱንታ ቦንቃናዋ።
20 አሴራ ኡክꬃይ ኦርዱዋ፤
ካትያዉ እ ሎኦ ቁማ እማና።
21 ንፍታሌመ ቃሸተናን የዳ ደእያ፥
ሎኦ ማራቱዋ የልያ ገንእያ።
22 ዮሴፎ አይፍያና ዮንዶዴዳ ዎይንያ ቱራ።
እ ፑልቱዋ ማታን ዮንዶዳ አይፍያና ደእያ፥
ዳሻይካ ጎዳፐ ቦላና ዛእያ ዎይንያ ቱራ።
23 ዎንዳፍያ ዱክያዋንቱ
አ ቦላ ዶዴድኖ፤
ባረንቱ ዎንዳፍያንካ፥
ዱኬድኖነ ማይትሴድኖ።
24 አ ዎንዳፊ ምን ኡቴዳ፤
አ ዎልቃይካ ምኒደ ጋምኤዳ።
ሄዌካ ያቆባ ጾሳ ዎልቃማ ኩሽያ ጋሱዋና፥
ነ ሄንꬃንቻ፥ እስራኤልያ ዛላ ጋሱዋና፥
25 ኔና ማድያ ነ አዎቱዋ ጾሳ ጋሱዋንነ፥
ኔና ቦላ ሳሉዋ አንጁዋን፥
ጋርሳ ጪማ አንጁዋን፥ ꬋንꬃ አንጁዋንነ
የልያ ኡሉዋ አንጁዋን አንጅያ፥
ኡባ ዳንዳይያ ጾሳ ጋሱዋና።
26 ነ አዉዋ አንጁ በን ደረቱዋ አንጁዋፐካ
መꬍናፐ ደእያ አንጁዋፐካ አꬌ።
ሀዌ ኡባይ ዮሴፎ ሁጲያን፥
ባረ እሻቱዋ ግዱዋን ካፑዋ ግድያዋ ሊጲያን ሸምፖ።
27 ቢንያመ ቦንቂያ ዋልያ።
ባረ ሻንካቴዳዋ ዎንታ ሜ፤
ባረ ኦሞዴዳዋ ኦማርስ ሻኬ” ያጌዳ።
28 ሀዋንቱ ታማነ ላኡ እስራኤልያ ዛራቱዋ፤ ቃይ ኡንቱንቱ አዉ ኡንቱንታ ሁጲያን ሁጲያን ኡንቱንቶ በስያ አንጁዋ አንጂደ ኡንቱንቶ ጌዳዌ ሀዋ።
ያቆባ ሀይቁዋ
29 ሄዋፐ ጉየ፥ እ ኡንቱንታ ሀዋዳን ያጊደ አዛዜዳ፤ “ታን ታ ማይዛ አሳቱዋን ጋከታናዉ ሀናይ፤ ታና ሂትያ ኤፍሮና ጋደን ደእያ ጎንጎሉዋን፥ ታ አዎቱዋና ሞግተ። 30 ሄዌካ ካናነ ቢታን፥ ማምረ ማታን ደእያ፥ ማክጴላ ግያ ጎንጎሉዋ፤ ሄዌ አብራሃመ ሂትያ ኤፍሮናፐ አ ጋድያና ሻሜዳ ጎንጎሉዋ። ዶመꬃ 23:3-20 31 አብራሃመነ አ ማቻታ ሳራ ያን ሞገቴድኖ፤ ይሳቅነ አ ማቻታ ርብቃ ያን ሞገቴድኖ፤ ታን ቃይ ልዮ ያን ሞጋድ። ዶመꬃ 25:9-10፤ 35:29 32 ሄ ጋዲነ አን ደእያ ጎንጎሉ ሂተቱዋፐ ሻመቴዳዋ” ያጌዳ።
33 ያቆብ ባረ ናናዉ አዛዙዋ ዉርሴዳ ዎደ፥ ባረ ገድያ ፑደ ባረ ሂጻዉ ሺሽ አኪደ፥ ሀይቂ አጌዳ፤ ባረ ማይዛን ጋከቴዳ። ኪታ 7:15