1 መꬍና ጎዳይ ሙሳ ሀዋዳን ያጌዳ፤ “ግብጼ ካትያኮ ባደ፥ ‘መꬍና ጎዳይ፥ እብራዌቱዋ ጾሳይ ኔና፥ “ኡንቱንቱ ታዉ ጎይናና ማላ ታ አሳ የዳ” ያጌ። 2 ኔን የደናን እጻደ፥ ኡንቱንታ ኦይቃ ኡትያዋ ግዶፐ፥ 3 መꬍና ጎዳ ኩሺ ደርያን ደእያ ነ መህያ ቦላ፥ ፓራቱዋ ቦላ፥ ሀረቱዋ ቦላ፥ ጋሎቱዋ ቦላ፥ ምያ ቦላ፥ ዶርሳቱዋ ቦላነ ዴሻቱዋ ቦላ ዎልቃማ ኢታ ሀርግያ የዳና። 4 ሽን ታን መꬍና ጎዳይ እስራኤልያ መህያ ግዱዋንነ ግብጼቱዋ መህያ ግዱዋን ሻኮታ መꬋና። እስራኤላቱ መህያፐ እቱነ ሀይቀና’ ያጋ” ያጌዳ። 5 መꬍና ጎዳይ ዎድያ ኬሪደ፥ “ታን ዎንት ሀዋ ሀ ጋድያ ቦላን ኦꬃና” ያጌዳ። 6 ዎንተꬃ ጋላስ መꬍና ጎዳይ ሄዋ ኦꬄዳ። ግብጼ አሳ መህያ ኡባይ ሀይቄዳ፤ ሽን እስራኤልያ አሳ መህያፐ እቱነ ሀይቂቤና። 7 ካቲ ሀ የዉዋ ፓጫናዉ አሳ ኪቲደ፥ እስራኤለቱዋ መህያፐ፥ ሀራይ አቶ፥ እቱነ ሀይቂቤናዋ ኤሬዳ። ግዶፐነ ካትያ ዎዛናይ ዶንጭሎ ሳኣፐ ስመናን እጽና፥ አሳ የደናን ድጌዳ።

8 ሜꬍና ጎዳይ ሄዋፐ ጉይያን፥ ሙሳነ አሮና፥ “ህንተንቱ ኩሽያ ኩንꬂደ ጮጭያፐ ብድንꬃ ኡጭተ፤ ሙሴ ካቲ ጼልሽን፥ ሄዋ ፑደ ጫርኮ ላሎ፤ 9 ሄዌ ግብጼ ቢታ ኡባ ቦላ ሊቆ ባና ግዳናዋ፤ ግብጼ ቢታ ኡባን አሳ ቦላነ መህያ ቦላ ጊይያ ጺባይ ዎꬋናዋ” ያጌዳ። 10 ኡንቱንቱ ጮጭያፐ ብድንꬃ አኪደ፥ ካትያ ስንꬃን ኤቄድኖ፤ ሙሴ ሄዋ ፑደ ጫርኩዋን ላልና፥ አሳ ቦላነ መህያ ቦላ ጊይያ ጺባይ ዎꬍ አጌዳ። ሳፃ 16:2 11 ሻሬቻቱካ ኡንቱንቱ ቦላነ ግብጼ አሳ ኡባ ቦላ ዎꬌዳ ጺባይ ኤሱዋ ድግና፥ ሙሴ ስንꬃን ኤቃናዉ ዳንዳይበይክኖ። 12 ሽን መꬍና ጎዳይ ሙሴዉ ጌዳዋዳንካ፥ ካትያ ዎዛና ዶንጭልሴዳ ድራዉ፥ ሙሴነ አሮነ ኦድያዋ ካቲ ስሰናን እጼዳ።

13 ሄዋፐ ጉይያን መꬍና ጎዳይ ሙሳ፥ “ጉራን ደንዳ ባደ፥ ካትያና ጋከታደ አ፥ ‘መꬍና ጎዳይ፥ እብራዌቱዋ ጾሳይ ኔና፥ “ታዉ ጎይናና ማላ ታ አሳ የዳ። 14 ሄዌ ꬋዮፐ፥ ነ ቦላ፥ ነ ኦሳንቻቱዋ ቦላነ ነ አሳ ቦላ ታ ቦሻዉ ደእያ ኩመንꬃ ዎልቃ ታን ኪታና፤ ሳኣን ኡባን ታ ማል ባይናዋ ኔን ሄዋን ኤራናሳ። 15 ታን ሀኖደ ታ ኩሽያ የዳደ፥ ኔናነ ነ አሳ ኢታ ሀርግያን ሀ ሳኣ ቦላፐ ምልጽ ኡዳናሽን። 16 ታን ኔና ታ ዎልቃ በሳናዉነ ታ ሱንꬃይ ሳኣ ኡባ ቦላን ኦደታናዉ፥ ሄዎ ታን ኔና ካተ ኦꬃደ ዎꬃድ።ሮመ 9:17 17 ኔን ሀእካ ኦቶረታደ፥ ታ አሳ የደናን እጻዳ። 18 ሄዋ ድራዉ፥ ታን ዎንት ሀኖደ ግብጼ ግብጼ ግዶደፐ ሀቼ ጋካናዉ ኡባካ ዎꬍ ኤረና፥ ዳሪ ዎልቃማ ሻቻ ቡክሳና። 19 ሀእ ኔን ነ መህያነ ጋደን ነዉ ደእያዋ ኡባ ኤለካ ሶ ገልሳናዳን አዛዛ፤ አያዉ ጎፐ፥ ሶይ ገለናን ብሮ ጋደን ደእያ አሳ ኡባ ቦላነ መህያ ኡባ ቦላ ሻቻይ ዎꬋናዋ፤ ኡንቱቱ ሀይቃና” ያጌ’ ያጋ” ያጌዳ። 20 ካትያ ኦሳንቻቱዋፐ መꬍና ጎዳ ቃላዉ ያዬዳዋንቱ ባረንቱ አይለቱዋነ ባረንቱ መህያ ኤሌሊደ ሶይ ገልሴድኖ። 21 ሽን መꬍና ጎዳ ቃላ ካꬌዳዋንቱ ባረንቱ አይለቱዋነ ባረንቱ መህያ ጋደን አግ ባሼድኖ።

22 ሄዋፐ ጉይያን መꬍና ጎዳይ ሙሳ፥ “ግብጼ ቢታ ኡባ ቦላን: አሳ ቦላ፥ መህያ ቦላነ ግብጼ ጎሻቱዋን ድጭያባ ኡባ ቦላ ሻቻይ ዎꬋናዳን፥ ነ ኩሽያ ሳሉዋ ደንꬃ” ያጌዳ። 23 ሙሴ ባረ ጋትማ ሳሉዋ ዛሪደ ደንꬄዳ ዎደ፥ ጾሳይ ጉጉንꬃነ ሻቻ የዴዳ፤ ዋልቃንꬃይካ ዱገ ሳአዉ ዋልቃሜዳ። ጾሳይ ግብጼ ጋድያን ሻቻ ያት ቡክሴዳ። 24 ሻቻይ ዎꬌዳ፤ ዋልቃንꬃይ ያነ ሃነ ዋልቃሜዳ፤ ግብጼ ጋድያን ካቲ ካተቶደፐ ዶምና፥ ግብጼ ቢታ ኡባን ዎꬌዳ ሻቻ ኡባፐ ሄዌ አꬍያ ኢታ ሻቻ። ሳፃ 8:7፤ 16:21 25 ሄ ሻቻይ ግብጼ ቢታ ኡባ ጋደን ደእያ ኡባባ፥ አሳካ መህያካ ሾጬዳ፤ ጋደን ዶሌዳባ ኡባ ዱገ ዛሪደ ብዶዬዳ፤ ምꬃ ኡባ መንሬꬄዳ። 26 ሻቻይ ዎꬍቤና ጋዲ እስራኤላቱ ኡቴዳ ጎሸና ጋድያ ጻላላ።

27 ካቲ ኪት ሙሳነ አሮና ጼስሲደ፥ “ሀእ ስም፥ ታን ናጋራ ኦꬃድ፤ መꬍና ጎዳይ ቱማንቻ፤ ታንነ ታ አሳይ ባይዛንቻ። 28 ኑዉ ጉጉንꬃይነ ሻቻይ ዳሬዳ ድራዉ፥ መꬍና ጎዳ ዎስተ። ታን ህንተንታ የዳና፤ ስም ሀዋፐ ስንꬃን ህንተንቱ ሀዋን ጋምእክታ” ያጌዳ። 29 ሙሴ አ፥ “ታን ሀ ካታማፐ ከሴዳ ዎደ፥ ታን ዎሳናዉ ታ ኩሽያ መꬍና ጎዳኮ ምጫና፤ ያቶፐ ጉጉንꬃይ አጋናዋ፤ ቃይ ሻቻ ዎꬃይ ኤቃና፤ ሳአይ መꬍና ጎዳዋ ግድያዋ ኔን ሄዋን ኤራና። 30 ሽን ኔንነ ነ ኦሳንቻቱ መꬍና ጎዳዉ ጾሳዉ ሀእካ ያየናዋ ታን ኤራይ” ያጌዳ። 31 ታልባይ ጪሼዳ ድራዉነ ባንጋይ ትሼዳ ድራዉ፥ ታልባይነ ባንጋይ ሻቻን ባዬድኖ። 32 ሽን ዛርጋይነ ሞርገ ምꬃይ ካእያ ዎዲ ብራ ግዴዳ ድራዉ፥ ሻቻን ባይበይክኖ።

33 ሄዋፐ ጉይያን ሙሴ ካትያ ማታፐ ደንዲደ፥ ካታማፐ ጋጻ ከሴዳ። ባረ ኩሽያ መꬍና ጎዳኮ ምጬዳ፤ ያትና ጉጉንꬃይነ ሻቻይ አጌዳ፤ እራይካ ቢታ ቦላን ዱገ ትገትያዌ ኤቄዳ። 34 ሽን ካቲ እራይ፥ ሻቻይነ ጉጉንꬃይ አጌዳዋ በኤዳ ዎደ ዛሪደካ ናጋራ ኦꬄዳ፤ እካ አ ኦሳንቻቱካ ባረንቱ ዎዛና ዶንጭልሴድኖ። 35 መꬍና ጎዳይ ሙሴ ዶናን ሃሳዬዳዋዳንካ ካትያ ዎዛናይ ዶንጭልና፥ እስራኤላቱዋ እ የደናን እጼዳ።