1-2 ሄዋፐ ጉይያን ሙሳ መꬍና ጎዳይ ሀዋዳን ያጌዳ፤ “ግብጼ ካትያኮ ባ፤ አያዉ ጎፐ፥ ታን ግብጼቱዋ ግዶን ማላነ ዎልቃማ ማላታ ታ ዎታ ኦꬄደንቶ ህንተንቱ ህንተንቱ ናናዉነ ህንተንቱ ናና ናናቶ ኦዳና ማላ፥ ቃይ ህንተንቱካ ታን መꬍና ጎዳ ግድያዋ ኤራና ማላ፥ ታ ዎልቃማ ማላታ ኡንቱንቱ ግዶን ኦꬃናዉ አ ዎዛናነ አ ኦሳንቻቱዋ ዎዛና ታን ዶንጭልሳ ዎꬃድ” ያጌዳ።

3 ሙሴነ አሮነ ካትያኮ ገሊደ አ፥ “መꬍና ጎዳይ፥ እብራዌቱዋ ጾሳይ ኔና ሀዋዳን ያጌ፤ ‘ኔን ታዉ አዛዘተናን አዉደ ጋካናዉ እጻይ? ታዉ ጎይናና ማላ ታ አሳ የዳ። 4 ኔን ኡንቱንታ የደናን እጾፐ፥ ነ ቢታ ቦላ ታን ዎንት ቦልያ አሀና፤ 5 ቦሊ ኦንነ ቢታ ደማናዉ ዳንዳየናዳን ቢታ ካማናዋ። ህንተንቶ ሻቻፐ አቴዳ ጉꬃባ፥ ጋደን ድጭያ ምꬃይካ አተናን ኡባ ማናዋ። 6 ነ ጎለን ነ ሱንꬃቱዋ ጎለንነ ግብጼ አሳ ኡባ ጎለን ኡንቱንቱ ኩማናዋንታ፤ ሄዌ ነ አዎቱዋ፥ ዎይ ነ ማይዛ አዎቱ ሀ ቢታን ኡቶደፐ ሀኖ ጋካናዉ ሙለ በእቤናባ’ ያጌ” ያጌድኖ። ሄዋፐ ጉይያን ሙሴ ካትያ ስንꬃፐ ከሲደ ቤዳ።

7 ካትያ ሱንꬃቱ ካትያ፥ “ሀ ብታኒ ኑዉ አዉደ ጋካናዉ መቱዋ ጋሶ ግዳናዌ? ኡንቱንቱ መꬍና ጎዳዉ፥ ባረንቱ ጾሳዉ፥ ጎይናና ማላ፥ ኔን አሳ የዳ፤ ግብጼ ቢታይ ባዬዳዋ ኔን ሀእካ አኬክኪ?” ያጌድኖ። 8 ሄዋ ድራዉ፥ ካቲ ሙሳነ አሮና ጉየ ዛሪደ፥ “ቢተ፤ መꬍና ጎዳዉ፥ ህንተንቱ ጾሳዉ ጎይንተ፤ ሽን ብያዋንቱ ኦና ኦኔ?” ያጌዳ።

9 ሙሴ፥ “ኑን ኑ ጭማ አሳነ ኑ ጉꬃ ናናቱዋና፥ ኑ ዶርሳ ዉደቱዋናነ ሚዛ ዉደቱዋና እትፐ ባና፤ አያዉ ጎፐ፥ ኑን ብያሳን መꬍና ጎዳ ባላ ቦንቻናዉ ኮሼ” ያጌዳ።

10 ካቲ፥ “ታን ህንተንታ ህንተንቱ ናናነ ህንተንቱ ማቼቱዋ የድያዋ ግዶፐ፥ መꬍና ጎዳይ ህንተንታ ናጋናዉ ኮሼ። ሽን በእተ፤ ህንተንቱ ህንተንቱ ዎዛናን ኢታባ ቆፔዳዌ ቆንጭያን ኤረቴ። 11 ቱይት፥ ህንተንቱ፥ ‘ጾሳዉ ጎይናና’ ጊደ ኦችያዋ ግዶፐ፥ አቱማ አሳ ጻላላይ ቢደ መꬍና ጎዳዉ ጎይንተ” ያጌዳ። ሄዋፐ ጉይያን ሙሰነ አሮነ ካትያ ስንꬃፐ የደርሰቲደ ከሴድኖ።

12 መꬍና ጎዳይ ሙሳ፥ “ቦሊ ግብጼ ጋድያን ከሳናዳን፥ ሻቻፐ አቲደ ጋደን ድጭያባ ኡባ ልምእ ኦꬃና ማላ፥ ነ ኩሽያ ግብጼ ጋድያ ቦላን ምጫ” ያጌዳ።

13 ሙሴ ባረ ጋትማ ግብጼ ጋድያ ቦላን ምጭና፥ መꬍና ጎዳይ አዋይ ዶልያ ባጋ ጫርኩዋ ሄ ጋላሳነ ቃማ ኡባ ሄ ጋድያ ቦላን ጫርክሴዳ፤ ዎንቴዳ ዎደ ሄ ጫርኩ ቦልያ አሄዳ። 14 ቦሊ ግብጼ ቢታ ኡባ ቦላ ሻምእ ጊደ፥ ቢታ ኡባ ሳን ከስ ኡቴዳ። ሀዋ ኬሻ ቦልያ ቦሻይ ሄ ቢታን ሀዋፐ ካሰና ሀንቤና፤ ዎይ ሀዋፐ ስንꬃዉነ ዛረꬂደ ሀነና። ሳፃ 9:2-3 15 ቢታይ ካረጻና ጋካናዉ ቦሊ ቢታ ኡባ ካሜዳ። ሄ ቦሊ ሻቻፐ አቲደ ጋደን ድጭያባ ኡባነ ምꬃ ቦላን ደእያ አይፍያ ኡባ ምልጽ ኦꬄዳ። ያትና ምꬃ ቦላን እርጻ ሀይꬃይ፥ ዎይ ጋደን አታክልቲ ግብጼ ቢታ ኡባን አያይነ አትቤና።

16 ካቲ ሙሳነ አሮና ኤለካ ጼስሲደ፥ “መꬍና ጎዳ ህንተንቱ ጾሳነ ህንተንታ ታን ናቃድ፤ 17 ስም ህንተንቱ ታዉ ታ ናጋራ ሀ እት ገደ ጻላላዉ አቶ ጊተ፤ ሀ ዎꬍያ ቦሻ ታፐ ድጋና ማላ፥ መꬍና ጎዳ ህንተንቱ ጾሳ ዎስተ” ያጌዳ።

18 ሙሴ ካትያ ማታፐ ከሲደ፥ መꬍና ጎዳ ዎስና፤ 19 መꬍና ጎዳይ ሄ ጫርኩዋ አዋይ ዉልያ ባጋ ዎልቃማ ጫርኮ ላምና ቦልያ ቶክ፥ ዞኦ አባኮ አፌዳ። ግብጼ ቢታ ኡባን እት ቦሊነ አትቤና። 20 ግዶፐነ፥ መꬍና ጎዳይ ካትያ ዎዛና ዶንጭልሴዳ ድራዉ፥ እስራኤላቱዋ የደናን እጼዳ።

21 መꬍና ጎዳይ ሙሳ፥ “ግብጼ ጋድያን አሳይ ቦች በአናዉ ዳንዳይያ ኬሻ ꬉማይ ꬉማና ማላ፥ ነ ኩሽያ ሳሉዋ ደንꬃ” ያጌዳ። 22 ሙሴ ባረ ኩሽያ ሳሉዋ ደንꬄዳ፤ ግብጼ ቢታ ኡባን ሄዙ ጋላሳ ኩመንꬃ ባራ ꬉማይ ꬉሜዳ።ማዝ. 105:28፤ ሳፃ 16:10 23 ሄ ሄዙ ጋላሳቱዋን አሳይ ኦንነ እቱ እቱዋ በኤናን፥ ዎይ ባረ ሳኣፐ ደንዲደ ቤናን ታኬዳ። ሽን እስራኤለቱ ደእያ ሳኣን ኡባን ኡንቱንቶ ፖኡ ደኤ። 24 ካቲ ሙሳ ጼስሲደ፥ “ቢተ፤ መꬍና ጎዳዉ ጎይንተ፤ ህንተንቱ ማቼቱካ ህንተንቱ ናናይካ ህንተናና ባናዉ ዳንዳዪኖ። ህንተንቱ ዶርሳ ዉድያነ ህንተንቱ ሚዛ ዉድያ ጻላላ የጊደ ቢተ” ያጌዳ። 25 ሽን ሙሴ አ፥ “ኑን ያርሹዋነ ጹጊደ ያርሽያ ያርሹዋ መꬍና ጎዳ፥ ኑ ጾሳዉ፥ ሺሻናዉ፥ መህያ ኑዉ እማደ የድያዌ ኔና ጉሳካ? 26 ኑ መሂ ኡባይካ ኑናና ባናዉ ኮሼ፤ ቅንጫፍለ እቱነ ጉየ አተና። መꬍና ጎዳ፥ ኑ ጾሳዉ፥ ጎይንያ ጎይናዉ ሄ መህያፐ ዶሪደ አካናዉ ኮሼ፤ ኑን ያ ጋከናን ደኢደ፥ መህያፐ ሀቃዋ ሀቃዋ መꬍና ጎዳዉ ያርሻነንቶ ኤራናዉ ዳንዳዮኮ” ያጌዳ። 27 ሽን መꬍና ጎዳይ ካትያ ዎዛና ዶንጭልስና እ ኡንቱንታ የዳናዉ ኮይቤና። 28 ሄዋፐ ጉይያን ካቲ ሙሳ፥ “ታ ማታፐ ክቻ! ላኤንꬆ ታ ስንꬃን ለምእ ጋደ ኔና ኤራ! ኔን ታ አይፍያ ታ ዴሙዋ በኤዳ ጋላሳይካ ነዉ ሀይቆ” ያጌዳ። 29 ሙሴ አ፥ “ቱማካ፤ ኔን ጌዳዋዳን ታን ኔና ላኤንꬆ ኡባካ በእከ” ያጌዳ።