1 ሙሴዉ መꬍና ጎዳይ፥ “ታን ግብጼ ካትያ ቦላነ አ አሳ ቦላ እት ሀራ ቦሻ የዳና፤ ሄዋፐ ጉይያን እ ህንተንታ ሀ ጋድያፐ ከስ የዳናዋ፤ እ ህንተንታ እቱነ አተናን ኡባካ የደርሳናዋ። 2 እስራኤልያ አሳይ፥ ማጫዌ አቱማዌ ባረ ሾሮቱዋፐ ብራፐነ ዎርቃፐ መቴዳ ሚሻቱዋ ኦቻና ማላ፥ ኡንቱንቶ ኦዳ” ያጌዳ። 3 መꬍና ጎዳይ እስራኤልያ አሳቱ ግብጼቱዋ ስንꬃን ናሸታናዳን ኦꬄዳ። ቃይ ሙሴ ባረ ሁጲያዉካ ግብጼ ጋድያን ካትያ ኦሳንቻቱዋንነ አሳን ሎይꬅ ዳሮ ቦንቼቴዳ አሳዳን ጼለቴዳ።

4 ሙሴ ካትያ ሀዋዳን ያጌዳ፤ “መꬍና ጎዳይ ሀዋዳን ያጌ፤ ‘ቃማ ግዶ ብላህያን ታን ግብጼ ግዱዋና አꬋና፤ 5 ግብጼ ጋድያን ደእያ ባይራ አቱማ ናናይ ኡባይ፥ ካዉተꬃ ኦይድያን ኡትያ ካትያ ባይራ ናኣፐ ዶሚደ፥ ዎጻን ጋጭያ ቆማት ባይራ ናኣ ጋካናዉ ባይራ የለቴዳ መሂካ አተናን ኡባይ ሀይቃናዋ። 6 ግብጼ ቢታ ኡባን ሀዋፐ ካሰ ባጋን ሀንቤናነ ስንꬃፐካ ሀነና ዎልቃማ ዬኩ ዬከታናዋ። 7 ሽን እስራኤላቱ ግዱዋን፥ አሳ ቦላ ዎይ መህያ ቦላ ካናይነ ቦጨና’ ያጌ። ሄ ዎደ መꬍና ጎዳይ ግብጼቱዋንነ እስራኤልያ ግዱዋን ሻኮታ መꬍያዋ ኔን ኤራናሳ። 8 ሀ ነ ኦሳንቻቱ ኡባይ ታኮ ዪደ፥ ታ ስንꬃን ጉፋን ጎይኒደ፥ ‘ከሳደ ባርኪ! ኔና ካልያ አሳይ ኡባይካ ቦ!’ ጋናዋንታ። ሄዋፐ ጉይያን ታን ባና” ያጌዳ። ሄዋፐ ጉይያን ሙሴ ሀንቁዋን ኤጸቲደ፥ ካትያ ስንꬃፐ ከሲደ ቤዳ።

9 ሙሴዉ መꬍና ጎዳይ ኮይሮ፥ “ታ ማላልስያ ማላታይ ግብጼ ጋድያን ዳራና ማላ፥ ካቲ ህንተንቱ ኦድያዋ ስሰናን እጻናዋ” ያግ ዎꬄዳ። 10 ሙሴነ አሮነ ሀ ማላልስያ ማላታ ኡባ ካትያ ስንꬃን ኦꬄድኖ፤ ሽን መꬍና ጎዳይ ካትያ ዎዛና ዶንጭልሴዳ፤ ያትና እ እስራኤላቱዋ ባረ ጋድያፐ የደናን እጼዳ።