1 መꬍና ጎዳይ ግብጼ ጋድያን ሙሳነ አሮና ሀዋዳን ያጌዳ፤ ዎጋ 23:5፤ ፓይ. 9:1-5፤ 28:16፤ ዛረ. 16:1-2 2 “ሀ አግናይ ህንተንቶ ላይꬃዉ ኮይሮ አግና ግዶ፤ 3 እስራኤልያ አሳዉ ኡባዉ ሀዋ ኦድተ፤ ሀ አግናይ ገሌዳ ታማንꬃ ጋላሳን፥ እት አሳይ ባረ ሶይ አሳዉ እት ኮልያ ዶርሳ ዎይ እት ኮልያ ዴሻ አሆ። 4 ሄ ጎለ አሳ ፓይዱ ሄ ዶርሳ ዉርስ ማናዉ ጉጾፐ፥ እነ አዉ ኡባፐ ማታትያ ሾሩ ባረንቱ ሶ አሳ ፓይዲደ እት እት አሳይ ማናዉ ዳንዳይያ ኬሻ አኬኪደ፥ ሄ መህያ ሹኪደ እትፐ ሚኖ። 5 ህንተንቱ ዶር አክያ መሂ የለቶደፐ እት ላይꬃ ግዴዳዋ፥ አ ቦላን አይ ፓጫይነ ባይና አቱማዋ ግዶ። ህንተንቱ ዶርሳፐ ዎይ ዴሻፐ አካናዉ ዳንዳዪታ። 6 ሀ አግናዉ ታማነ ኦይደንꬆ ጋላሳ ጋካናዉ ኡንቱንታ ሄምተ፤ ሄ ጋላስ ኦማርስ እስራኤልያ አሳይ ኡባይ ኡንቱንታ ሹካናዉ ኮሼ። 7 ያቲደ ሱꬃፐ አማሬዳዋ አኪደ፥ ኡንቱንቱ ምያ ጎለዉ ላኡ ማቃንያነ ጉባንያ ኦክኖ፤ 8 አሹዋ ሄ ጋላስ ቃማ ታማን ጺጽ ጺጺደ፥ ጫምያ ቦንጭያናነ ኡኬዳ ኡክꬃና ሚኖ። 9 አሹዋ ቃይያ ዎይ ዶይሲደ ሞፕተ፤ ሁጲያካ ገደቱዋካ ቃንꬃ ግዶ አሹዋካ ኡባ ቃንጸናን ሙምያ ጺጽተ፤ 10 ሄ አሹዋፐ ሳአይ ዎንታና ጋካናዉ አይነ አሾፕተ፤ ሽን አማሬዳዌ አቶፐ፥ ሄዋ ጹጋናዉ ኮሼ። 11 ሙሳ ሚደ፥ ኦግያዉ ጊግያ ማዩዋ ማዪደ፥ ህንተንቱ ጫማ ህንተንቱ ገድያን ዎꬂደ፥ ህንተንቱ ጋትማ ህንተንቱ ኩሽያን ኦይቂደ ሚታ። ኤሌል ኤሌል ሚተ፤ ሀዌ መꬍና ጎዳ ፓስጋ።

12 “ታን ሄ ጋላስ ቃማና ግብጼን አꬋደ ባይራ የለቴዳ ኡባ፥ አሳካ፥ መህያካ ዎꬋና፤ ግብጼ ኤቃቱዋ ኡባ ቦላካ ታን ፕርዳና፤ ታን መꬍና ጎዳቴ። 13 ሄ ሱꬃይ ህንተንቱ ደእያ ጎልያ ኤርስያ ማላ ግዳናዋ። ታን ሄ ሱꬃ በኦ ዎደ፥ ህንተንታ አጋደ አꬋና፤ ታን ግብጼ ጋድያ ቦሻን ሾጭያ ዎደ፥ ህንተንታ አይ ቦሻይካ ቦቼና።

14 “ሀ ጋላሳይ ህንተንቶ ቆፕ ቆፕ ቦንችያ ጋላሳ ግዶ፤ ህንተንቱ የለታይ ኡባይ መꬍና ጎዳ ባላ ቦንችተ፤ ሀዋ ዎጋ ኦꬂደ ኡባ ዎደ ቦንችተ። ከሳ 23:15፤ 34:18፤ ዎጋ 23:6-8፤ ፓይ. 28:17-25፤ ዛረ. 16:3-8

15 “ላፑን ጋላሳይ ጋካናዉ እርሹዋ የግቤና ኡክꬃ ሚተ፤ ሽን ኮይሮ ጋላስ እርሹዋ ህንተንቱ ሶፐ ድግተ። ሄ ኮይሮ ጋላሳፐ ዶሚደ ላፑንꬃ ጋላስ ጋካናዉ፥ እርሹዋና ደእያ ኡክꬃ ምያ አሳይ እስራኤልያ አሳ ግዶፐ ቦሄቶ። *ቦሄቶ፦ ግያዌ ሀይቁዋካ በሴ። 16 ኮይሮ ጋላስ ጌሻ ሽቁዋ ሺቅተ፤ ሀራ ጌሻ ሽቁዋ ቃይ ላፑንꬃ ጋላሳን ሺቅተ፤ አሳይ ማናዉ ቁማ ካꬃናዋፐ አትና፥ ሀ ጋላሳ ኡባን አይነ ኦꬆፕተ፤ ህንተንቱ ኦꬃናባይ ሄዋ ጻላላ።

17 “እርሹ ገልቤና ኡክꬃ ባላ ቦንችተ፤ አያዉ ጎፐ፥ ታን ህንተንቱ ጩጉዋ ግብጼ ጋድያፐ ከሴዳዌ ሄ ጋላሳና። ሄ ጋላሳ፥ የለታፐ የለታይ ጋካናዉ ፕን ከስያ ዎጋ ኦꬂደ ቦንችተ። 18 ኮይሮ አግናን፥ ሄ አግናዉ ታማነ ኦይደንꬆ ጋላሳ ኦማርሳፐ ዶሚደ፥ ላታማነ እተንꬁዋ ኦማርስ ጋካናዉ እርሹ ገልቤና ኡክꬃ ሚተ። 19 ላፑን ጋላሳይ ጋካናዉ እርሹ ህንተንቱ ሶን ቤቶፖ፤ እርሹ ገሌዳዋ ምያ አሳይ በተ ግድና ዎይ ሄ ቢታ አሳ ግድና፥ እስራኤልያ ግዶፐ ቦሄቶ። 20 እርሹ ገሌዳዋ አያነ ሞፕተ፤ ህንተንቱ ደእያ ሳኣን ሀቃንካ እርሹ ገልቤና ኡክꬃ ማናዉ ኮሼ” ያጌዳ።

21 ሄዋፐ ጉይያን ሙሴ እስራኤልያ ጭማቱዋ ኡባ ጼስሲደ ኡንቱንታ ሀዋዳን ያጌዳ፤ “ህንተንቱ ኤለካ ቢደ፥ ህንተንቱ ሶ አሳዉ ፓስጋዉ ኮልያ፥ ዶርሳ ዎይ ዴሻ ሹክተ። 22 ህሶጵያ ጌተትያ ሀይꬃፐ ዳንክ አኪደ፥ ከርያን ደእያ ሱꬃን ናቂ ከሲደ፥ ሄ ሱꬃ ላኡ ማቃንያንነ ጉባንያ ኦክተ፤ ህንተንቱፐ እት አሳይነ ሳአይ ዎንታና ጋካናዉ ባረ ጎልያ ፐንግያፐ ካረ ከሶፖ። 23 መꬍና ጎዳይ ግብጼቱዋ ሾጭ ዎꬋናዉ ሄ ቢታና አꬍያ ዎደ፥ ሱꬃ ጉባንያንነ ላኡ ማቃንያን በአና፤ ያቲደ ካረና አꬋና፤ ዎꬍያዌ ህንተንቱ ሶ ገሊደ፥ ህንተንታ ዎናዳን አ ህንተንቱ ሶ ገልሰና። እብራ. 11:28

24 “ህንተንቱ ሀ አዛዙዋ ህንተንቶነ ህንተንቱ ዘረꬃዉ ኡባ ዎደ ዎጋ ኦꬂደ አዛዘትተ። 25 መꬍና ጎዳይ ካሰ እማና ጌዳዋዳን እ እምያ ቢታ ህንተንቱ ገልያ ዎደ፥ ሀ ዎጋ ናግተ። 26 ህንተንቱ ናናይ ህንተንታ፥ ‘ሀ ቦንቾ ባላ ብርሸꬃይ አዬ?’ ያጊደ ኦችያ ዎደ፥ 27 ህንተንቱ ኡንቱንታ፥ ‘ሀዌ ጾሳ ቦንቻናዉ ያርሽያ ፓስጋ ያርሹዋ፤ አያዉ ጎፐ፥ መꬍና ጎዳይ ግብጼ ጋድያን እስራኤልያ አሳ ጎልያ አግ አꬍ ቢደ፥ ግብጼቱዋ ዎꬊደ፥ ኑና አሼዳ ድራሳ’ ያግተ” ያጌዳ።

ሄዋፐ ጉይያን አሳይ ጉልባቲደ ጎይኔዳ። 28 እስራኤላቱ መꬍና ጎዳይ ሙሳነ አሮና አዛዜዳዋዳን ኦꬄድኖ።

29 ቃማ ግዶ ብላህያን መꬍና ጎዳይ ግብጼን ባይራ የለቴዳ ኡባ፥ ካዉተꬃ ኦይድያን ኡቴዳ ካትያ ባይራ ናኣፐ ዶሚደ፥ ቃሾ ጎለን ደእያ ኦሞደቴዳዋንቱ ባይራ ናኣ ጋካናዉ፥ ቃይ ባይራ የለቴዳ መህያ ኡባ ድፕ ኦꬄዳ።ከሳ 4:22-31 30 ካቲ፥ አ ኦሳንቻቱ ኡባይነ ግብጼ ጋድያ አሳይ ኡባይ ቃማ ደንዴድኖ። ግብጼ ጋድያን አሳይ ሀይቂቤና ጎሊ ኡባካ ባይና ድራዉ፥ አሳይ ኮሻ ꬎቁ ኦꬂደ ዎልቃማ ዬኩዋ ዬኬዳ። 31 ሄ ጋላስ ቃማ ካቲ ሙሳነ አሮና ጼሲደ፥ “ደንድተ! ህንተካ እስራኤልያ አሳይካ ታ አሳ ግዱዋፐ ከስ ቢደ ህንተንቱ ኦቼዳዋዳንካ መꬍና ጎዳዉ ጎይንተ! 32 ህንተንቱ ጌዳዋዳንካ ህንተንቱ ዶርሳ ዉድያነ ህንተንቱ መህያ ዉድያ አኪደ ቢተ! ቃይ ታዉካ ዎስተ” ያጌዳ።

33 ግብጼ አሳይ እስራኤላቱ ጋድያፐ ኤለካ ከሳና ማላ ድርቢሴድኖ። አያዉ ጎፐ፥ ኡንቱንቱ፥ “ሄዌ ꬋዮፐ፥ ኑን ኡባይካ ዉሬቶ” ያጌድኖ። 34 ሄዋ ድራዉ፥ እስራኤልያ አሳቱ ባረንቱ እርሹ ገልቤና ሙናቃ ከርያን ኩንꬂደ፥ ባረንቱ ማዩዋን ጻጺደ፥ ሀሽያን ቶኬድኖ። 35 እስራኤለቱ ሙሴ ኡንቱንታ አዛዜዳዋዳን፥ ግብጼቱዋ ብራ ሚሻቱዋ፥ ዎርቃ ሚሻቱዋነ ማዩዋ፥ “እምተ” ጊደ ኦቼድኖ። ከሳ 3:21-22 36 መꬍና ጎዳይ ግብጼቱዋ ስንꬃን ሄ አሳይ ሳበታናዳን ኦꬅና፥ ግብጼቱ ኡንቱንቱ ኦቼዳዋ እሜድኖ። ሄዋዳን ያቲደ ኡንቱንቱ ግብጼ አሳቱዋ ማጹዋ ቦንቂ አኪደ ቤድኖ።

37 እስራኤላቱ ራምሳ ጌተትያ ካታማፐ ደንዲደ ሱኮታ ጌተትያ ሳኣ ገድያን ሀመቲደ ቤድኖ። አሳይ ናናነ ማጫዋንታ ጉጀናን ፓይድና፥ ኡሱፑን ጼቱ ሻአ። 38 ቃይ ኡንቱንቱና ሀራ ዳሮ አሳይ፥ ዳሮ መሂነ ዶርሳ ዴሻ ዉዲ ላገቲደ ቤዳ። 39 ግብጼፐ ኡንቱንቱ አኪደ ከሴዳ ሙናቃ እርሹ ገልቤና ኡክꬃ ኡኬድኖ፤ አያዉ ጎፐ፥ ኡንቱንቱ ግብጼፐ ድርባን ከሴድኖ፤ ባረንቶ ሽንቃ ካꬃናዉካ፥ ሙናቃይ ደንድና ኡካናዉካ ኡንቱንታ ጋꬅቤና።

40 እስራኤላቱ ግብጼ ጋድያን ደኤዳ ላይꬃይ ኦይዱ ጼታነ ሀታማ። ዶመꬃ 15:13፤ ጋላ. 3:17 41 ሄ ኦይዱ ጼታነ ሀታሙ ላይꬃይ ዉርያ ሄ ዉርሰꬃ ጋላሳን፥ መꬍና ጎዳ ጩጉ ኡባይ ግብጼ ጋድያፐ ከሴዳ። 42 መꬍና ጎዳይ ባረ አሳ ናጊደ፥ ግብጼ ጋድያፐ ከስያ ዎደ ሳአይ ቃማ፤ ሄ ቃማይ የለታፐ የለታ ጋካናዉ፥ እስራኤልያ አሳይ ቤጎቲደ ናጊደ አቅያ፥ መꬍና ጎዳዉ ዱማቴዳ ቃማ።

43 መꬍና ጎዳይ ሙሳነ አሮና፥ “ፓስጋ ጋላሳ ቦንችያ ዎጋይ ሀዋ፤ በተ አሳይ አፐ ኡባካ ሞፖ። 44 ህንተንቱ ሻሉዋን ሻሜዳ አይሊ ህንተንቱ አ ቃጻሮዋፐ ጉይያን አፐ ሞ። 45 ሽን እማꬃተꬃን ህንተናና ጋምእያ እማꬃይነ ከራ ኦꬅያ እማꬃይ አፐ ኡባካ ሞፖ።

46 “ሀ ፓስጋ ህንተንቱ እት ጎለን ሚተ፤ ህንተንቱ ሄ አሹዋፐ አያነ ካረ ከሶፕተ። መቀꬃቱዋፐ እቱዋነ መንꬆፕተ።ፓይ. 9:12፤ ዮሃ. 19:36 47 እስራኤልያ ማባራይ ኡባይ ፓስጋ ቦንቻናዉ ኮሼ።

48 “በቲ ዪደ ህንተንቱ ግዶን ደእያ አሳይ መꬍና ጎዳ ፓስጋ ቦንቻናዉ ኮዮፐ፥ ኮይሮ ሄ አቱማ አሳይ ኡባይ ቃጻረቶ። ሄዋፐ ጉይያን እ ሄ ቢታን የለቴዳ አሳዳን ሺቂደ፥ ፓስጋ ቦንቻናዉ ዳንዳዬ። ሽን ቃጻረትቤና አሳይ ኡባካ አፐ ሞፖ። 49 ህንተንቱ ቢታን የለቴዳዎካ ህንተንቱ ግዶን በተ ግዲደ ደእያዋዉካ ሄ ዎጋይ እቱዋ” ያጌዳ።

50 እስራኤላቱ ኡባይ መꬍና ጎዳይ ሙሳነ አሮና አዛዜዳዋዳንካ ኦꬄድኖ። 51 ሄ ጋላስካ መꬍና ጎዳይ እስራኤላቱዋ ኡንቱንቱ ጩጉዋን ጩጉዋን ግብጼ ጋድያፐ ከሴዳ።