1 መꬍና ጎዳይ ሙሳ ሀዋዳን ያጌዳ፤ 2 “ባይራ የለቴዳ አቱማዋ ኡባ ታዉ ዱማያ። እስራኤልያ አሳ ግዶን ኡሉዋፐ የለቴዳ ባይራ ኡባይ፥ መህያ ግድና አሳ ግድና፥ ኡባይካ ታዋ” ያጌዳ። ፓይ. 3:13፤ ሉቃሳ 2:23

3 ሄዋፐ ጉይያን ሙሴ አሳ፥ “ግብጼፐ፥ አይለተꬃ ጋድያፐ ህንተንቱ ከሴዳ ጋላሳ፥ ሀ ጋላሳ ሀሳይተ፤ አያዉ ጎፐ፥ መꬍና ጎዳይ ባረ ዎልቃማ ኩሽያን ህንተንታ ከሴዳ፤ ሄዋ ድራዉ፥ እርሹ ገሌዳዋ ኡባካ ሞፕተ። 4 ህንተንቱ ሀቼ፥ ላይꬃዉ ኮይሮ ግዴዳ አቢባ አግናን ከሲታ። 5 መꬍና ጎዳይ ካናነቱዋ፥ ሂተቱዋ፥ አሞራዋናቱዋ፥ ሂዌቱዋነ ያቡሳዋናቱዋ ጋድያ ህንተንታ ጋꬅያ ዎደ፥ ህንተንቱ ሀ ፓስጋ ሀ አግናን ቦንቺታ። ሄ ቢታይ ጾሳይ ህንተዉ እማና ማላ፥ ካሰ ህንተንቱ አዋቶ ጫቂ ዎꬄዳ ቢታ። ሄ ቢታይ ማꬃይነ ኤሳይ ጎግያ ቢታ። 6 ህንተንቱ ላፑን ጋላሳይ ጋካናዉ እርሹ የገትቤና ኡክꬃ ማንታ፤ ላፑንꬃ ጋላሳይ መꬍና ጎዳ ባላ ግዳናዋ። 7 ሄ ላፑን ጋላሳቱዋን እርሹ የገትቤና ኡክꬃ ህንተንቱ ማና፤ ህንተንቱ ግዶን እርሹዋና ደእያባይ አያይነ ቤቶፖ፤ ነ ቢታ ዛዋን ሀቃንነ እርሹ ቤቶፖ።

8 “ሄ ጋላስ ኔን ነ ናአዉ፥ ‘ታን ሀዋ ኦꬅያዌ፥ ታን ግብጼፐ ከስያ ዎደ፥ መꬍና ጎዳይ ታዉ ኦꬄዳዋ ሀሳያናሳ’ ያጋደ ኦዳ። 9 መꬍና ጎዳይ ህንተንታ ባረ ዎልቃማ ኩሽያን ግብጼፐ ከሴዳ ድራዉ፥ መꬍና ጎዳ ዎጋይ ህንተንቱ ዶናፐ ዎናዳን፥ ሀ ቦንቼትያ ጋላሳይ ነ ኩሽያን ቃቼዳነ ነ ዴሙዋን ዎꬄዳ ሀሳይስያዋ ማላ ግዳና። 10 ሄዋ ድራዉ፥ ህንተንቱ ሀ ዎጋ ላይꬃን ላይꬃን አ ዎድያን ቦንችተ።

11 “መꬍና ጎዳይ ህንተንቱነ ህንተንቱ ማይዛ አዋቶ እማናዉ ጫቄዳዋዳን፥ እ ህንተንታ ካናነቱዋ ጋድያ ገልሲደ፥ ሄ ጋድያ ህንተንቶ እምያ ዎደ፥ 12 ኡሉዋፐ ባይራ የለቴዳ ኡባ መꬍና ጎዳዉ ዱማያ፤ ነ ሚዛ ባይራ የለትያ አቱማዋ ኡባይ መꬍና ጎዳዋ። ከሳ 34:19-20፤ ሉቃሳ 2:23 13 ባይራ የለትያ ሀርያ ኡባ ዶርሳ ማራን ዎዛ አካ። ዎዘናዋ ግዶፐ፥ አ ሞርግያ መንꬃ፤ ነ አቱማ ናና ግዶን ባይራ የለቴዳዋንታ ኡባ ዎዛ። 14 ስንꬃና ያና ዎድያን ነ ናአይ ኔና፥ ‘ሀዌ አዬ?’ ያጊደ ኦቾፐ፥ ኔን አ፥ ‘መꬍና ጎዳይ ኑና ዎልቃማ ኩሽያን ግብጼፐ፥ አይለተꬃ ጋድያፐ ከሴዳ፤ 15 ግብጼ ካቲ ዶንጭሊደ ኑና የደናን እጽና፥ መꬍና ጎዳይ ግብጼ ጋድያን ደእያ ባይራ ኡባ፥ አሳፐ ዶሚደ መህያ ባይራ ጋካናዉ ዎꬌዳ። ታን አት ኡሉዋፐ ኮይሮ የለቴዳ አቱማዋ ኡባ መꬍና ጎዳዉ ያርሽያዌነ ታ ባይራ አቱማ ናና ታን ዎዝያዌ ሄዋሳ’ ያጋ። 16 መꬍና ጎዳይ ኑና ባረ ዎልቃማ ኩሽያን ግብጼፐ ከሴዳዎ፥ ሀዌ ህንተንቶ ኩሽያን ቃቼዳነ ዴሙዋን ዎꬄዳ ማላ ማላ ግዳናዋ” ያጌዳ።

17 ካቲ አሳ የዴዳ ዎደ፥ ጾሳይ ኡንቱንታ ፕልስጼማ ቢታና አꬅያ ኦጊ ማታ ግዶፐነ ሄ ኦግያና ካለꬅቤና፤ አያዉ ጎፐ፥ ጾሳይ፥ “አሳይ ኦላ በኦፐ፥ ባረ ቆፋ ላሚደ፥ ጉየ ግብጼ ስመናዳን” ያጊደ ቆፔዳ። 18 ሄዋ ድራዉ፥ ጾሳይ አሳ መላ ቢታ ኦግያና ዩሺደ፥ ዞኦ አባኮ ካለꬄዳ። እስራኤለቱ ግብጼ ጋድያፐ ኦላዉ ጊጊደ ፑደ ከሴድኖ። 19 ዮሴፎ እስራኤልያ አሳ ጫቀꬅ ዎꬄዳ ድራዉ፥ ሙሴ አ መቀꬃ ባረናና አኪደ ቤዳ፤ ዮሴፎ ኡንቱንታ፥ “ጾሳይ ቱሙፐ ህንተንታ ማዳናዉ ያናዋ፤ ሄ ዎደ ህንተንቱ ታ መቀꬃ ሀ ሳኣፐ ፑደ ህንተናና አኪደ ቢተ” ያጊደ ኦድ ዎꬄዳ።ዶመꬃ 50:25፤ ኢያሳ 24:32

20 ኡንቱንቱ ሱኮተፐ ደንዲደ መላ ቢታ ዶናን ደእያ ኤታማን ኡቴድኖ። 21 መꬍና ጎዳይ ኡንቱንቱ ጋላስነ ቃማ ሀመታና ማላ፥ ጋላሳን ኡንቱንታ ኦግያ በሳናዉ ሻርያ ቱሳን፥ ቃማን ኡንቱንቶ ፖእሳና ማላ ታማ ቱሳን ኡንቱንታ ካለꬄዳ። 22 ጋላስ ሻርያ ቱሳይ ዎይ ቃማ ታማ ቱሳይ አሳ ስንꬃፐ ክችቤና።