1-2 ሄዋፐ ጉይያን ሙሳ መꬍና ጎዳይ፤ “ኡንቱንቱ ጉየ ስሚደ ምግዶላፐነ አባፐ ግዱዋን፥ ፕሃህሮታ ማታን ኡታናዳን ኦዳ፤ ኡንቱንቱ አባ ላንቂያን ባኣል-ጻፎና ስንꬃ መላ ቢታን ኡትኖ ያጌዳ። 3 ካቲ፥ ‘እስራኤላቱ መላ ቢታይ ጎርድና፥ ሀንያባ ꬋዪደ ቢታን ጮ ቶይላካቲኖ’ ያጊደ ቆፓናዋ። 4 ታን ካትያ ዎዛና ዶንጭልሳና፤ እ ኡንቱንታ የደርሳና፤ ታን ካትያንነ አ ኦላንቻቱዋ ኡባን ቦንቼታና፤ ግብጼቱካ ታን መꬍና ጎዳ ግድያዋ ኤራና” ያጌዳ። እስራኤላቱ እ ኦዴዳዋዳን ኦꬄድኖ።

5 አሳይ ባቃት ድጌዳዋ ግብጼ ካትያዉ ኦድና፥ እነ አ ሱንꬃቱ እስራኤላቶ ቆፔዳ ባረንቱ ቆፋ ላሚደ፥ “ኑን ሀዋ ዋቴቶ? ኑን እስራኤላቱዋ የዲደ፥ ኡንቱንቱ ኑዉ ኦꬅያ ዎልቃፐ መላ አቴዶ” ያጌድኖ። 6 ሄዋ ድራዉ፥ እ ባረ ፓራ ጋርያ ኮሪደ፥ ባረ ኦላንቻቱዋ ባረናና አኪደ ደንዴዳ። 7 እ ኡሱፑን ጼቱ ዶረቴዳ ፓራ ጋረቱዋ፥ ግብጼ ጋድያን ደእያ ሀራ ጋረቱዋ ኡባና፥ ኡንቱንቱ ኡባዉ ካፑዋ ካፑዋ ሱንꬂደ አኪደ ቤዳ። 8 መꬍና ጎዳይ ግብጼ ጋደ ካትያ፥ ዎዛና ꬉልስና፥ ጾሳ ዎልቃን ከሳ ቦላ ደእያ እስራኤልያ አሳ የደርሴዳ። 9 ሄዋፐ ጉይያን ግብጼ አሳቱ፥ ካትያ ፓራቱ ኡባይነ ፓራ ጋረቱ፥ ፓራ አሳቱነ ኦላንቻቱ እስራኤላቱዋ ካሊደ የደርሴድኖ። አባ ዶናን ባኣል-ጻፎና ስንꬃ ባዙዋን ደእያ ፕሃህሮታ ማታን ኡንቱንቱ ኡቴዳዋንታ ደሜድኖ።

10 ካቲ ማት ድግና፥ እስራኤላቱ ꬎቁ ግ ጼልያ ዎደ፥ ግብጼቱ ኡንቱንቱ ጌዱዋ ካሊደ ዬዳዋ በኤድኖ፤ ያቲደ ዳሮፐ ያዪደ፥ መꬍና ጎዳኮ ዋሴድኖ። 11 ኡንቱንቱ ሙሳ፥ “ኔን ኑና ግብጼን ዱፉ ꬋይና መላ ቢታን ሀይቃናዳን ከሳዲየ? ኑና ግብጼፐ አያዉ አሃድ? 12 ግብጼን ደኢደ ኑን፥ ‘ኑና አጋ ባሻ፤ ኑን ግብጼቶ ሞደታና’ ያጊደ ነዉ ኦድበይኮየ? መላ ቢታን ሀይቃናፐ ኡንቱንቶ ሞደትያዌ ኑዉ ሎአ ሽን” ያጌድኖ።

13 ሽን ሙሴ አሳ፥ “ያዮፕተ፤ ምን ኤቂተ፤ መꬍና ጎዳይ ሀቼ ህንተንታ አሽያ አሹዋ ህንተንቱ በአና። ሀቼ ህንተንቱ በእያ ግብጼቱዋ ላኤንꬆ ኡባካ በእክታ። 14 ህንተንቱ ድራዉ መꬍና ጎዳይ ኦለታናዋ፤ ህንተንቱፐ ኮየትያዌ ጮኡ ጉሳ ጻላላ” ያጌዳ።

15 መꬍና ጎዳይ ሙሳ፥ “ኔን ታኮ አያዉ ዋሳይ? እስራኤላቱ ስንꬃዉ ሀመታና ማላ ኦዳ። 16 ነ ጻምኣ ደንꬃደ አባ ቦላ ምጫ፤ ሃꬃይ ላኡ ከሲደ ሻከታናዋ፤ እስራኤላቱካ መላ ቢታና አባ ፕኒደ ባናዋንታ። 17 ታን ግብጼቱዋ ዎዛና ዶንጭልስና፥ ኡንቱንቱ ህንተንቱ ጌዱዋ ካሊደ አባን ገላናዋንታ። ታን ካትያነ አ ኦላንቻቱዋ ኡባ ቦላን፥ አ ፓራ ጋረቱዋነ አ ፓራ አሳቱዋ ቦላን ቦንቹዋ ታዉ ደማና። 18 ታን ካትያ ቦላን፥ አ ፓራ ጋረቱዋ ቦላንነ አ ፓራ አሳቱዋ ቦላን ታዉ ቦንቹዋ ደሜዳ ዎደ፥ ታን መꬍና ጎዳ ግድያዋ ግብጼቱ ኤራናዋንታ” ያጌዳ።

19 ሄዋፐ ጉይያን ጾሳ ኪታንቻይ፥ እስራኤልያ ኦላንቻቱዋፐ ስንꬃና ሀመትያዌ፥ ጉየ አꬊደ ኡንቱንቱፐ ጉየና ሀመቴዳ። ሻርያ ቱሳይካ ኡንቱንቱ ስንꬃን ደእያ ሳኣፐ ጉየ ባጋ ዩዪደ፥ 20 ግብጼቱዋ ኦላንቻቱዋፐነ እስራኤለቱዋ ኦላንቻቱዋፐ ግዱዋን ኤቄዳ። ሄ ሻሪ ቃማ ኡባን እት ባጋና ꬉምሲደ፥ ህንኮ ባጋና ፖእሴዳ፤ ያትና ቃማ ኡባ እቱ እቱዋኮ ሺቅበይክኖ።

21 ሄዋፐ ጉይያን ሙሴ አባ ቦላን ባረ ኩሽያ ምጬዳ፤ መꬍና ጎዳይ ሄ ጋላስ ቃማ ኡባን አዋይ ዶልያ ባጋፐ ዎልቃማ ጫርኩዋ የዲደ፥ አባ ጉየ ዛሪደ መላ ቢታ ከሴዳ። ሃꬃይ ሻከቴዳ። 22 እስራኤለቱ አባ ግዱዋና መላ ቢታን ሀመቲደ፥ ሃꬃይ ኡንቱንቶ ኡሸቻናነ ሀድርሳና ጎዳዳን ኤቂና ቤድኖ። 1 ቆሮ. 10:1-2፤ እብራ. 11:29 23 ግብጼቱ ኡንቱንታ የደርሴድኖ፤ ካትያ ፓራ ኡባቱ፥ አ ፓራ ጋረቱነ አ ፓራ አሳቱ ኡንቱንታ ካሊደ፥ አባ ግዶ ገሌድኖ። 24 ብሮ ዎንታ ባካሊ ዶላናፐ ካሰቲደ፥ መꬍና ጎዳይ ታማነ ሻርያ ቱሳፐ ዱገ ዛሪደ፥ ግብጼቱዋ ኦላንቻቱዋ ጼሌዳ፤ ኡንቱንቱ ዎዛና ባይዜዳ። 25 ላጋይ ኡንቱንታ ዋይሳና ማላ፥ መꬍና ጎዳይ ኡንቱንቱ ፓራ ጋረቱዋ ጎማ ቃꬁዋ ድግና ግብጼቱ፥ “መꬍና ጎዳይ ኡንቱንታ ማዲደ ግብጻ ኦልያ ድራዉ፥ አነ ኑን እስራኤልያ አሳፐ ባቃቶይተ” ያጌድኖ።

26 መꬍና ጎዳይ ሙሳ፥ “ሃꬃይ ግብጼቱዋ ቦላ፥ ኡንቱንቱ ፓራ ጋረቱዋ ቦላነ ኡንቱንቱ ፓራ አሳቱዋ ቦላ ጉየ ጎጋና ማላ፥ ነ ኩሽያ አባ ቦላን ምጫ” ያጌዳ። 27 ሙሴ ባረ ኩሽያ አባ ቦላን ምጬዳ፤ ሳአይ ዎንትሽን፥ አባይ ባረ ካሰ ሳኣ ጉየ ስሜዳ፤ ግብጼቱ ያ አ ግዶ ባቃትሽን፥ መꬍና ጎዳይ ግብጼቱዋ አባ ግዱዋን አꬅ የጌዳ። 28 ሃꬃይ ጉየ ስሚደ፥ ፓራ ጋረቱዋ ፓራ አሳቱዋና እስራኤላቱዋ ካሊደ አባ ገሌዳ ካትያ ኦላንቻቱዋ ኡባ ምት ባሼዳ፤ ኡንቱንቱፐ እቱነ አትቤና። 29 ሽን እስራኤለቱ አባ ግዱዋና መላ ቢታን ሀመቲደ፥ ሃꬃይ ኡንቱንቶ ኡሸቻናነ ሀድርሳና ጎዳዳን ኤቂና ቤድኖ። 30 መꬍና ጎዳይ ሄ ጋላስ እስራኤልያ አሳ ግብጼቱዋ ኩሽያፐ ሀዋዳን አሼዳ። ቃይ እስራኤለቱ ግብጼቱ ሀይቂደ ግሴዳዋንታ አባ ዶናን በኤድኖ። 31 እስራኤላቱካ መꬍና ጎዳይ ግብጼቱዋ ቦላ በሴዳ ዎልቃማ ዎልቃ በኤዳ ዎደ፥ አሳይ መꬍና ጎዳዉ ያዪደ አካ አ ቆማ ሙሳካ አማኔዳ።