15
ሙሴ የꬃ
1 ሄ ዎደ ሙሴነ እስራኤልያ አሳይ ሀ የꬃ መꬍና ጎዳዉ የጼድኖ፤
“ቦንቹዋን ሎይꬅ ꬎቁ ꬎቁ ጌዳ ድራዉ፥
ታን መꬍና ጎዳዉ ማዝሙርያ የጻና።
ፓራነ ፓራ ጋርያነ ቶጌዳዋንታ አባን ኦሌዳ። ሳፃ 15:3
2 መꬍና ጎዳይ ታ ዎልቃነ ታ ማዝሙርያ፤
እ ታና አሽያዋ ግዴዳ። ማዝ. 118:14፤ ኢሳ. 12:2
እ ታ ጾሳ፤ ታን አ ሳባና።
እ ታ አዉዋ ጾሳ፤
ታን አ ꬎቁ ꬎቁ ኦꬃና።
3 መꬍና ጎዳይ ኤረቴዳ ኦላንቻ፤
አ ሱንꬃይካ መꬍና ጎዳ።
4 ግብጼ ካትያ ፓራ ጋረቱዋነ
አ ኦላንቻቱዋ አባን ኦሌዳ።
ግብጼ ካትያ ካፓቱ፥
ኡባፐ አꬍ ሎእያዋንቱ ዞኦ አባን ሙከቴድኖ።
5 ጪሞ ሃꬃይ ኡንቱንታ ካሜዳ፤
ኡንቱንቱ ሹቻዳን ጪሙዋን ምተቴድኖ።
6 “አቤት መꬍና ጎዳዉ፥ ነ ኡሸቻ ኩሺ
ዎልቃን ጎቤዳዋ፤
መꬍና ጎዳዉ፥ ነ ኡሸቻ ኩሺ
ሞርክያ መንሬꬄዳ።
7 ነ ቦንቹዋ ግታተꬃን
ኔናና ጋዳቴዳዋንታ ኦላዳ።
ነ ኤጽያ ሀንቁዋ ኔን የድና፥
እ ኡንቱንታ ዳላዳን ሜዳ።
8 ነ ሲꬍያና ከስያ ሸምፑዋን
ሃꬃይ ዶረቴዳ።
ጎግያ ሃꬃይካ ጎዳዳን ምን ኤቄዳ፤
ጪሞ ሃꬃይ አባ ጎምፓን እርኪደ ምኔዳ።
9 “ሞርኪ፥
‘ታን ኡንቱንታ የደርሳደ ኦይቃና።
ታን ኡንቱንቱ ማጹዋ ሻካደ፥
ታ ኮዬዳዋ ኡባ አካና።
ታን ታ ማሻ ሾዳደ፥
ኡንቱንታ ꬋይሳና’ ያጊደ ጬቀቴዳ።
10 “ሽን ነ ፔኑዋን ፑንና፥
አባይ ኡንቱንታ ካሜዳ።
ኡንቱንቱ ዎልቃማ ሃꬃን
ብራታይ ምተትያዋዳን ምተቴድኖ።
11 አቤት መꬍና ጎዳዉ፥ ጾሳቱዋ ግዶን
ነ ማላይ ኦኔ?
ጌሻተꬃን ቦንቼትያዌ፥
ቦንቹዋን ያየትያዌ፥
ማላልያባ ኦꬅያዌ ነ ማላይ ኦኔ?
12 ኔን ነ ኡሸቻ ኩሽያ ምጭና፥
ቢታይ ኡንቱንታ ምቴዳ።
13 “ኔን ዎዜዳ ነ አሳ
አገና ነ ሲቁዋን ካለꬃዳ።
ኔን ነ ዎልቃን
ኡንቱንታ ኔን ደእያ ጌሻ ሳኣ ገልሳዳ።
14 ካዉተꬃቱ ሄዋ ስሲደ
ኮኮሬድኖ።
ፕልስጼማ ጋድያ አሳቱካ
የሉ ኦይቄዳዋዳን ኡንኤቴድኖ።
15 ሄ ዎደ ኤዶማ ጋደ ካፓቱ ዳጋሜድኖ።
ሞኣበ ጋድያ ሞድያዋንታ
ያሻይ ኮኮርሴዳ።
ካናነ አሳቱዋ ሸኒ ሀይቄዳ።
16 አቤት መꬍና ጎዳዉ ዳጋማይነ ያሻይ ኡንቱንታ ኦይቂና፥
ኡንቱንቱ ነ ዎልቃ ግታተꬃ በኢደ፥
ነ አሳይ አꬋና ጋካናዉ፥
ኔን ዎዜዳ አሳይ አꬋና ጋካናዉ፥
ሹቻዳን ሙሚደ ኤቂኖ።
17 አቤት መꬍና ጎዳዉ ኔን ኡንቱንታ አሃደ፥
ነ ቡዞ ጋደን ደእያ ደርያ ሁጲያን ቶከቴዳ ምꬃዳ ዎꬃ።
ሄ ሳአይ
ኔን ነዉ ደአናዉ ኦꬄዳ ሳኣ፥
ሄ ጌሻ ሳአይ ኔን ነ ኩሽያን ምንሳደ ኤሴዳ ሳኣ።
18 መꬍና ጎዳይ መꬍናፐ መꬍናዉ ካዉታናዋ።”
19 ግብጼ ካትያ ፓራቱ፥ አ ፓራ ጋረቱነ አ ፓራ አሳቱ አባን ገሌዳ ዎደ፥ መꬍና ጎዳይ ኡንቱንቱ ቦላ አባ ሃꬃ ጉየ ዛሪደ ኡንቱንቱ ቦላ አሄዳ፤ ሽን እስራኤላቱ አባ ግዱዋና መላ ቢታን ሀመቲደ ቤድኖ ያግ የጼድኖ።
ማይራም የꬃ
20 አሮና ምቻታ፥ ናባታ ማይራማ ዳርቢያ አካዱ፤ ማጫ አሳይ ኡባይ ዳርቢያ ባቂደነ የጺደ እዞ ካሌድኖ። 21 ማይራማ ኡንቱንቶ የꬃ የጻደ፥
“መꬍና ጎዳይ ሎይꬅ ꬎቁ ꬎቁ ጌዳ ድራዉ፥
አዉ የጽተ።
ፓራነ ፓራ ቶጌዳዋ
እ አባን ኦሌዳ” ያጋደ የጻዱ።
ዞኦ አባፐ ሲና ደርያ ጋካናዉ
(15:22—18:27)
ጫምያ ሃꬃነ ሎኦ ጮራ ፑልቱዋ
22 ሄዋፐ ጉይያን ሙሴ እስራኤልያ ዞኦ አባፐ ካለꬅና፥ ኡንቱንቱ ሱር ጌተትያ መላ ቢታ ቤድኖ። ሄ መላ ቢታን ኡንቱንቱ ሃꬃ ደመናን ሄዙ ጋላሳ ሀመቴድኖ። 23 ኡንቱንቱ ማራ ግያ ሳኣ ጋኬዳ ዎደ፥ ማራ ሃꬃይ ጫሞ ግዴዳ ድራዉ፥ ኡሻናዉ ዳንዳይበይክኖ፤ ሄዋ ድራዉ፥ ሄ ሳአይ ማራ *ማራ፦ ሀ ሱንꬃ ብለꬃይ እብራዌꬁዋን “ጫሙዋ” ግያዋ። ጌተቴዳ። 24 ሄዋ ድራዉ፥ አሳይ፥ “ኑን አያ ኡሻኔ?” ያጊደ ሙሴ ቦላ ዙዙሜዳ። 25 ሙሴ መꬍና ጎዳዉ ዋሴዳ፤ መꬍና ጎዳይ አ እት ምꬃ በሴዳ፤ ሙሴ ሄ ምꬃ ሃꬃ ግዶ ኦልና፥ ሃꬃይ ማልኤዳ። መꬍና ጎዳይ ኡንቱንቶ ካለሰትያ ዎጋ እሜዳ፤ ያን ጾሳይ ኡንቱንታ ፓጬዳ። 26 እ ኡንቱንታ ሀዋዳን ያጌዳ፤ “መꬍና ጎዳይ ህንተንቱ ጾሳይ ኦድያዋ ምንሲደ ስሶፐነ አ አይፍያ ስንꬃን ልከባ ኦꬆፐ፥ ህንተንቱ አ አዛዙዋ ሀይዞፐነ አ ዎጋ ኡባ ናጎፐ፥ ታን ግብጼቱዋ ቦላ አሄዳ ሀርግያፐ እቱዋነ ህንተንቱ ቦላ አህከ፤ አያዉ ጎፐ፥ ታን ህንተንታ ፓꬅያ መꬍና ጎዳቴ” ያጌዳ።
27 ሄዋፐ ኡንቱንቱ ኤላማ ጋድያ ዬድኖ፤ ያን ታማነ ላኡ ሃꬃ ፑልቶቱነ ላፑን ታሙ ዛምባ ምꬃቱ ደኢኖ። ኡንቱንቱ ያን ሃꬃ ዶናን ኡቴድኖ።