1 ግብጼፐ ከሴዳ ላኤንꬆ አግናን፥ ታማነ እቼሻንꬆ ጋላሳን እስራኤልያ አሳ ኩመንꬃይ ኤሊማፐ ደንዲደ፥ ኤሊማፐነ ሲናፐ ግዱዋን ደእያ “ሲን” ጌተትያ መላ ቢታ ዬዳ። 2 እስራኤልያ አሳ ኡባይ መላ ቢታን ሙሴ ቦላነ አሮና ቦላ ዙዙሜድኖ። 3 እስራኤላቱ ኡንቱንታ፥ “ኑን ግብጼ ጋድያን መꬍና ጎዳ ኩሽያን ሀይቄዶ ግዴሮኮሻ! ያን ኑን ኑዋ አሹዋ ከርያ ዩይ አꬍ ኡቲደ፥ ኑን ኮዮ ቁማ ኡባ ሜዶ፤ ሽን ህንተንቱ ኑና ከሲደ፥ ኡባቱዋ ኮሻን ዎꬋናዉ መላ ቢታ አሄድቴ?” ያጌድኖ።

4 መꬍና ጎዳይ ሙሳ፥ “ታን ህንተንቶ ሳሉዋፐ ኡክꬃ ቡክሳና፤ አሳይ ኡባ ጋላስካ ከሲደ፥ ሀቼ ሀቼዉ ግድያዋ ጻላላ ማጻናዉ ኮሼ። አሳይ ታ አዛዙዋ ካልንቶ ካለነንቶ ታን ኡንቱንታ ሄዋን ፓጫና። ዮሃ. 6:31 5 ኡሱፑንꬃ ጋላስ ኡንቱንቱ ሀሮደ ማጽያዎ ላኡ ኩሽያ ማጺደ፥ ካꬂኖ” ያጌዳ።

6 ሄዋ ድራዉ፥ ሙሴነ አሮነ እስራኤልያ አሳ ኡባዉ፥ “ህንተና ግብጼ ጋድያፐ ከሴዳ መꬍና ጎዳ ግድያዋ ኦማርስ ህንተንቱ ኤራና፤ 7 ቃይ መꬍና ጎዳ ቦንቹዋ ዎንታ ህንተንቱ በአና፤ አያዉ ጎፐ፥ አ ቦላ ህንተንቱ ዙዙሜዳዋ እ ስሴዳ፤ ህንተንቱ ኑ ቦላ ዙዙማናዉ ኑን ኦኔ?” ያጌድኖ። 8 ሄዋፐ ጉይያን ሙሴ፥ “እ ህንተንቶ ማናዉ ኦማርስ አሹዋ እሚናነ ህንተንቱ ኮይያ ኡክꬃ ኡባ ህንተንቶ ዎንታ እምና፥ እ መꬍና ጎዳ ግድያዋ ህንተንቱ ሄዋን ኤራና። አያዉ ጎፐ፥ ህንተንቱ አ ቦላ ዙዙሜዳዋ እ ስሴዳ። ኑን ኦኔ? ህንተንቱ ኑ ቦላ ዙዙምክታ፤ ህንተንቱ መꬍና ጎዳ ቦላ ዙዙሚታ” ያጌዳ።

9 ሙሴ አሮና፥ “ኔን እስራኤልያ አሳ ኡባ፥ ‘መꬍና ጎዳይ ህንተንቱ ዙዙንꬃ ስሴዳ ድራዉ፥ መꬍና ጎዳ ስንꬃ ሃ ሺቅተ’ ያጋ” ያጌዳ። 10 አሮነ እስራኤልያ አሳ ኡባዉ ኦድያ ዎደ፥ ኡንቱንቱ መላ ቢታኮ ስሚደ ጼሌድኖ፤ ሄዋን መꬍና ጎዳ ቦንቹ ሻርያ ግዶን ቆንጭያዋ በኤድኖ። 11-12 መꬍና ጎዳይ ሙሳ፥ “ታን እስራኤላቱ ዙዙንꬃ ስሳድ፤ ኔን ኡንቱንቶ፥ ‘ኦማርሳን አሹዋ ህንተንቱ ማና፤ ዎንታ ኡክꬃ ህንተንቱ ካላና፤ ሄ ዎደ ህንተንቱ ታን መꬍና ጎዳ ህንተንቱ ጾሳ ግድያዋ ኤራና’ ያጋደ ኦዳ” ያጌዳ።

13 ሄ ጋላስ ኦማርሳን አሹ ሜተትያ ካፎቱ ዪደ፥ እስራኤልያ አሳይ ደእያ ሳኣ ማዬድኖ፤ ቃይ ዎንታ ኡንቱንቱ ዱንካነቱዋ ዩሹዋን ከተርሳይ ኩም ኡቴዳ። 14 ከተርሳይ ጽኤዳ ዎደ፥ ሳኣን ዎꬌዳ ሻቻ ማላትያ ሱፓ ፖቁ መላ ቢታ ቦላን ቤቴዳ። 15 እስራኤለቱ ሄዋ በኤዳ ዎደ፥ ኡንቱንቱ እቱ እቱዋ፥ “ሀዌ አዬ?”1 ቆሮ. 10:3 ያጌድኖ። አያዉ ጎፐ፥ ኡንቱንቱ እ አየንቶ ኤርበይክኖ።

ያትና ሙሴ ኡንቱንታ፥ “ህንተንቶ ማናዉ መꬍና ጎዳይ እሜዳ ኡክꬃይ ሀዋ። 16 መꬍና ጎዳይ ሀዋዳን ያጊደ አዛዜዳ፤ ‘ጎለ አሳዉ አዎትያዌ፥ እቶ እቶ ማናዉ ኮሽያዋ ኬሻ ሺሾ፤ ህንተንቱ ዱንካንያ ግዶን ደእያ አሳይ ሁጲያን ሁጲያን ላኡ ጻሳ ግድያዋ አክተ’ ጌዳ” ያጌዳ።

17 እስራኤላቱ ሙሴ ኡንቱንቶ ኦዴዳዋዳን ኦꬄድኖ፤ እቱ ዳርሲደ፥ እቱ ላፈꬂደ ሺሼድኖ። 18 ኡንቱንቱ ጻሳን ማኬዳ ዎደ፥ ዳርሲደ ሺሼዳዎ ፓላህቤና፤ ላፋ ሺሼዳዎ ፓጭቤና፤ ኡባይካ ሁጲያን ሁጲያን ባረዉ ምያዋ ኬሻ ሺሼዳ። 2 ቆሮ. 8:15 19 ሄዋፐ ጉይያን ሙሴ ኡንቱንታ፥ “ኦንነ አፐ ዎንትዉ አሾፖ” ያጌዳ። 20 ግዶ ሽን ኡንቱንቱፐ እቱ እቱ ሙሴ ኦድያዋ አከናን አጊደ፥ ሄዋ ዎንታ ጋካናዉ ዎꬄድኖ፤ ሄዌ ጉጹኒደ ጽንቄዳ። ሄዋ ድራዉ፥ ሙሴ ኡንቱንታ ሀንቀቴዳ። 21 ዎንታ ዎንታ አሳይ ኡባይ ባረዉ ኮሽያዋ ሺሼዳ፤ አዋይ ሆእያ ዎደ ሳኣን አቴዳዌ ሲል አጌዳ።

22 ኡሱፑንꬃ ጋላሳን ኡንቱንቱ ካሰዋፐ ላኡ ኩሽያ ሺሼድኖ። ያትና ኡንቱንቱ ካፓቱ ኡባቱ ዪደ ሄዋ ሙሴዉ ኦዴድኖ። 23 እ ኡንቱንታ፥ “መꬍና ጎዳይ አዛዜዳዌ ሀዋ፤ ዎንት ኪታይ ባይና ሸምፖ ጋላሳ፥ መꬍና ጎዳዉ ጌሻ ሳምባታ። ሄዋ ድራዉ፥ ህንተንቱ ኡክያዋ ኡክተ፤ ህንተንቱ ዶይስያዋነ ዶይስተ፤ ፓላሄዳዋ ዎንትዉ አሽተ” ያጌዳ። ከሳ 20:8-11 24 ሄዋ ድራዉ፥ ኡንቱንቱ ሙሴ አዛዜዳዋዳን ዎንትዉ ዎꬅና ጽንቂቤና ዎይ ጉጹንቤና። 25 “ሀቼ ሚተ፤ አያዉ ጎፐ፥ ሀቼ መꬍና ጎዳ ሳምባታ፤ ህንተንቱ አ ሀቼ ደምባን ደምክታ። 26 ህንተንቱ ኡሱፑን ጋላሳን አ ሺሻናዉ ዳንዳዪታ፤ ሽን ላፑንꬃ ጋላሳይ ሳምባታ። ሳምባታን አያይነ ደኤና” ያጌዳ።

27 ላፑንꬃ ጋላሳን እት እት አሳይ ሺሻናዉ ከሴዳ፤ ሽን ኡንቱንቱ አይነ ደምበይክኖ። 28 መꬍና ጎዳይ ሙሳ፥ “ታ አዛዛቱዋነ ታ ህግያ ናግያዋ አዉደ ጋካናዉ እጺቴ? 29 መꬍና ጎዳይ ህንተንቶ ሳምባታ እሜዳዋ አኬክተ፤ ኡሱፑንꬃ ጋላሳን እ ህንተንቶ ላኡ ጋላሳ ኡክꬃ እምያዌ ሄዋ ድራሳ። ላፑንꬃ ጋላስ ኡባይ ባረ ደእያ ሳኣን ደእያ ሳኣን ጋምኦ፤ ኦንነ ካረ ከሶፖ” ያጌዳ። 30 ሄዋ ድራዉ፥ አሳይ ላፑንꬃ ጋላሳን ሸምፔዳ።

31 እስራኤልያ አሳይ ሄ ኡክꬃ ማና *ማና፦ ሀ ቃላ ብለꬃይ እብራዌꬁዋን “ሀዌ አዬ” ግያዋ። ጊደ ሱንꬄዳ። ማናይ ዴቡዋ አይፍያዳን ቦꬃ፤ ኤሳና ኡኬዳ ኡክꬃዳን ማልኤ። 32 ሙሴ እስራኤልያ አሳ፥ “መꬍና ጎዳይ አዛዜዳዌ ሀዋ፤ ‘ታን ህንተንታ ግብጼ ጋድያፐ ከሴዳ ዎደ፥ ዎራን ምዜዳ ኡክꬃ ኡንቱንቱ በአና ማላ፥ ማናፐ ላኡ ጻሳ ግድያዋ ህንተንቱ ያና የለታዉ አሽ ዎꬅተ’ ያጊደ አዛዜዳ” ያጌዳ።

33 ሙሴ አሮና፥ “እት ጻሩዋ አካደ ላኡ ሊትሮ ኩመንꬃ ማና አን ቆላ፤ ያታደ ያና የለታዉ ምንጀታና ማላ፥ መꬍና ጎዳ ስንꬃን ዎꬃ” ያጌዳ። እብራ. 9:4

34 መꬍና ጎዳይ ሙሳ አዛዜዳዋዳን ምንጀታና ማላ፥ አሮነ ማና ጾሳ ስንꬃን ዎꬄዳ። 35 እስራኤላቱ ባረንቱ ደእያ ጋደ ያና ጋካናዉ ኦይታሙ ላይꬃ ማና ሜድኖ፤ ኡንቱንቱ ካናነ ጋደ ባጋ ጋካናዉ ማና ሚደ ደኤድኖ። ኢያሳ 5:12 36 አሳይ ማክያ ኤረቴዳ ቁንአይ ላኡ ጻሳፐ ታሙ ዳኩዋ ዳሬ።