1 እስራኤለቱዋ ማባራ ኡባይ መꬍና ጎዳይ አዛዜዳዋዳን፥ እት ሳኣፐ ሀራ ሳኣ ዩዪደ፥ ሲን መላ ቢታፐ ደንድ ቢደ፥ ራፍዲማ ጌተትያ ሳኣን ኡቴድኖ። ሽን አሳይ ኡሻናዉ ሃꬃይ ሄ ሳኣን ꬋዬዳ። 2 ኡንቱንቱ ሙሴና ዋላቀቲደ አ፥ “ኑዉ ኡሻናዉ ሃꬃ እማ” ያጌድኖ።

ሙሴ ዛሪደ፥ “ህንተንቱ ታናና አያዉ ዋላቀቲቴ? መꬍና ጎዳ ህንተንቱ አያዉ ፓጪቴ?” ያጌዳ።

3 ሽን አሳይ ያን ሃꬃ ሳመቲደ፥ ሙሴ ቦላ ዙዙሜድኖ። ኡንቱንቱ አ፥ “ኔን ኑና፥ ኑ ናናነ ኑ መህያ ሳሙዋን ዎꬋናዉ ግብጼፐ ከሳደ ፑደ አያዉ አሃድ?” ያጌድኖ።

4 ሙሴ፥ “ታን ሀ አሳ ዋቶ? ኡንቱንቱ ታና ሹቻን ጫዳና ሀኒኖ” ያጊደ መꬍና ጎዳኮ ዋሴዳ።

5 መꬍና ጎዳይ ሙሳ፥ “ኔን አሳፐ ስንꬃዉ ሀመታ፤ እስራኤልያ አሳ ጭማቱዋፐ ኔናና አፋ፤ እን ኔን ናይለ ሻፋ ሃꬃ ሾጬዳ ጻምኣ ነ ኩሽያን ኦይቃደ ባ። 6 ታን ሲና ደርያ ዛላ ቦላ ነ ስንꬃን ኤቃና፤ ኔን ሄ ዛላ ሾጫ፤ አሳይ ኡሻናዉ አፐ ሃꬃይ ከሳናዋ” ያጌዳ። ሙሴ እስራኤልያ ጭማቱዋ ስንꬃን ሄዋዳን ኦꬄዳ።

7 እስራኤላቱ፥ “መꬍና ጎዳይ ኑ ግዶን ደኢየ ባዌ?” ያጊደ ዋላቀቴዳ ድራዉነ መꬍና ጎዳ ፓጬዳ ድራዉ፥ ሄ ሳአይ ማሳሀነ ማሪባ ጌተቲደ ሱንቴዳ።

8 አማሌቃቱ ዪደ፥ ራፊድማን እስራኤላቱዋና ኦላ ጋከቴድኖ። 9 ሙሴ ኢያሳ፥ “ኔን ኑዉ አሳ ዶራደ፥ ከሳደ አማሌቃቱዋና ኦለታ፤ ታን ዎንት ጾሳ ጻምኣ ኦይቃደ፥ ዞዝያ ሁጲያን ኤቃና” ያጌዳ።

10 ሄዋፐ ጉየ ኢያሱ ሙሴ ጌዳዋዳን፥ አማሌቃቱዋና ኦለቴዳ። ሙሴ፥ አሮነነ ሁር ዞዝያ ሁጲያ ከሴድኖ። 11 ሙሴ ባረ ኩሽያ ደንꬅ ጋምኤዳ ኬናን ኡባን እስራኤላቱ ጾኒኖ፤ ሽን እ ባረ ኩሽያ ዱገ ዎꬄዳ ዎደ አማሌቃቱ ጾኒኖ። 12 ሙሴ ኩሺ አርጋጬዳ ዎደ፥ ኡንቱንቱ ሹቻ አክ ዪደ፥ ሙሳ አ ቦላ ኡትሴድኖ። አሮነነ ሁር እቱ እት ባጋና እቱ ህንኮ ባጋና ግዲደ፥ አ ኩሽያ ስት ኦꬂደ ኦይቄድኖ። ያትና አዋይ ዉላና ጋካናዉ አ ኩሺ ስት ጊደ ታኬዳ። 13 ሄዋ ድራዉ፥ ኢያሱ አማሌቃቱዋ ኦላንቻቱዋ ማሻን ጾኔዳ።

14 ሄዋፐ ስምና፥ ሙሳ መꬍና ጎዳይ ሀዋዳን ያጌዳ፤ “ሀዌ ኡባ ገደ ቆፈታና ማላ ሀዋ ማጻፋን ጻፋ። ያታደ ኢያሳ ስሰናን አጎፓ፤ አያዉ ጎፐ፥ ሳሉዋፐ ጋርሳን ታን አማሌቃ አሳቱዋ ዛር ቆፈተናዳን ጭራና ꬋይሳና” ያጌዳ። ዛረ. 25:17-19፤ 1 ሳሜላ 15:2-9 15 ሙሴ ያርሹዋ ያርሽያ ሳኣ ኬጺደ፥ “መꬍና ጎዳይ ታዉ ጾኑዋ እሜ” ጊደ ሱንꬄዳ። 16 እ ሀዋዳን ያጌዳ፤ “ኩሸቱ ፑደ መꬍና ጎዳ ካዉተꬃ አራታኮ ደንዴድኖ፤ የለታፐ የለታ ጋካናዉካ መꬍና ጎዳይ አማሌቃቱዋና ኦለታናዋ” ያጌዳ።