1 ሚድያማ ጋደ ቄሲ፥ ሙሴ ቦሉ ዮቶረ፥ ጾሳይ ሙሴዉነ አ አሳ እስራኤልያዉ ኦꬄዳባ ኡባነ መꬍና ጎዳይ እስራኤልያ ግብጼፐ ከሴዳዋ ስሴዳ።

2-3 ሄ ዎደ ሙሴ ቦሉ፥ ዮቶረ፥ ሙሴ አኮ የዲደ ቤዳ አ ማቻቶ ጽፓሮነ እዝ ላኡ ናና አሄዳ። ኡንቱንቱፐ እቱዋ ሱንꬃይ ገርሾማ፤ *ገርሾማ፦ ሀ ሱንꬃ ብለꬃይ እብራዌꬁዋ ቃላን “በትያ” ግያዋ። አያዉ ጎፐ፥ ሙሴ፥ “ታን አሳ ጋድያን በተ ግዳድ” ያጌዳ። ከሳ 2:21-22 4 ላኤንꬁዋ ሱንꬃይ ኤልኣዛራ፤ †ኤልኣዛራ፦ ሀ ሱንꬃ ብለꬃይ እብራዌꬁዋ ቃላን “ጾሳይ ታና ማዴ” ግያዋ። አያዉ ጎፐ፥ እ፥ “ታ አዉዋ ጾሳይ ታና ማዴዳዋ፤ እ ታና ግብጼ ካትያ ማሻፐ አሼዳ” ያጌዳ።

5 ሙሴ ቦሉ ዮቶረ አ አቱማ ናናነ አ ማቻትና ጾሳ ደርያ ማታን ደእያ ሙሴኮ መላ ቢታ ዬዳ። 6 እ ሙሳ፥ “ታን፥ ነ ቦሉ ዮቶረ፥ ነ ማቻትናነ እዝ ላኡ ናናቱዋና ኔኮ ያይ” ያጊደ አኮ ኪት ዎꬄዳ።

7 ሄዋ ድራዉ፥ ሙሴ ባረ ቦሉዋና ጋከታናዉ ከሲደ፥ አዉ ጎይኔዳ፥ አ የሬዳ። ኡንቱንቱ እቱ እቱዋ ሳሮꬂደ፥ ዱንካንያ ግዶ ገሌድኖ። 8 መꬍና ጎዳይ እስራኤልያ አሳ ድራዉ፥ ካትያ ቦላነ ግብጼቱዋ ቦላ ኦꬄዳ ኡባ፥ ኦግያን ኡንቱንታ ጋኬዳ ዳቡራባ ኡባነ መꬍና ጎዳይ ኡንቱንታ አሼዳዋ ሙሴ ባረ ቦሎ ኦዴዳ።

9 እስራኤልያ አሳ ግብጼቱዋ ኩሽያፐ አሻናዉ መꬍና ጎዳይ ኦꬄዳ ሎኦ ኦሶቱዋባ ኡባ ስሲደ፥ ዮቶረ ናሸቴዳ። 10 ያቲደ “ህንተና ግብጼቱዋ ኩሽያፐነ ካትያ ኩሽያፐ አሼዳ መꬍና ጎዳይ፥ ግብጼቱዋ ኩሽያፐ አሳ ከስ አኬዳዌ፥ እ ጋላተቶ። 11 መꬍና ጎዳይ ሀራ ጾሳቱዋፐ ኡባፐ ዎልቃማ ግድያዋ ታን ሀእ ኤራድ፤ አያዉ ጎፐ፥ እ ሀ እስራኤልያ አሳ ቦላ ኦተረቴዳ ግብጼ ጾሳቱዋ ቦላ ሀዋ ኦꬄዳ” ያጌዳ። 12 ሄዋፐ ጉይያን ዮቶረ፥ ሙሴ ቦሉ፥ ሹከቲደ ፖሎ ጹገትያ እት መህያ ያርሹዋነ ሀራ ያርሾ ሹከቴዳ አሹ ሜተትያ መህያ ያርሹዋ ጾሳዉ አሄዳ፤ አሮነነ እስራኤልያ ጭማቱ ኡባይ ጾሳ ስንꬃን ሙሴ ቦሉዋና ቁማ ማናዉ ዬድኖ።

13 ዎንተꬃ ጋላስ ሙሴ አሳዉ ፕርዳናዉ ኡቴዳ፤ አሳይ ሙሴ ዩሹዋን ዎንታፐ ኦማርስ ጋካናዉ ኤቄዳ። 14 ሙሴ ቦሉ ሙሴ አሳዉ ኦꬅያዋ ኡባ በኢደ፥ “ኔን ሀ አሳዉ ኦꬅያዌ ሀዌ አዬ? አሳይ ኡባይ ዎንታፐ ዶሚደ ኦማርስ ጋካናዉ ነ ዩሹዋን ኤቂደእሽን፥ ኔን ኔረካ ዳናዳን አያዉ ኡታድ?” ያጌዳ።

15 ሙሴ ባረ ቦሉዋ፥ “አሳይ ጾሳ ሸንያ ኦቻናዉ ታኮ ይያ ድራሳ። 16 ኡንቱንቶ የዉ ደኦፐ ታኮ ዪኖ፤ ታን እት ኡራ ግዱዋንነ አ ሾሩዋ ግዱዋን ፕርዳይ፤ ጾሳ አዛዙዋነ ዎጋ ኡንቱንታ ኤርሳይ” ያጌዳ።

17 ሙሴ ቦሉ፥ “ሀዌ ኔን ኦꬅያባይ ሎኤና። 18 ኔንነ ኔናና ደእያ አሳይ ዳቡራ ጻላላ ግዲታ፤ ሀ ኪታይ ነዉ ሎይꬅ ዴጾ፤ ኔን ሀዋ ኔረካ ኦꬃናዉ ዳንዳያካ። 19 አነ ሀእ ታን ኦድያዋ ስሳ፤ ታን ኔና ዞራና፤ ጾሳይ ኔናና ግዶ። ኔን ሀ አሳ ድራዉ ጾሳ ስንꬃ አꬋ፤ ኔን ኡንቱንቱ የዉዋ ጾሳኮ አሀ። 20 አዛዙዋነ ዎጋ ኡንቱንታ ኔን ታማርሳ፤ ኡንቱንቱ ደአና ማራነ ኦꬃና ኦሱዋ ኡባ ኡንቱንታ በሳ። 21 ቃይ አሳ ኡባ ግዶን ዳንዳይያ አሳቱዋ፥ ጾሳዉ ያይያዋንታ፥ አማነቴዳዋንታነ ማጋንጻ ምያዋ እጽያዋንታ ዶራደ ኡንቱንቱፐ አሳዉ ሻኣ ካፓቱዋ፥ ጼቱዋ ካፓቱዋ፥ እሻታሙዋ ካፓቱዋነ ታሙዋ ካፓቱዋ ሱንꬃ። 22 ኡንቱንቱ ኡባ ዎደ አሳዉ ፕርድኖ፤ ሽን ዋይስያ የዉዋ ኡባ ኔኮ አህኖ፤ ዋይሰና የዉዋ ኡባ ኡንቱንቱ ዉርስኖ። ኡንቱንቱ ኔናና ሻከትያ ድራዉ፥ ቶኩ ነዉ ካዉሻናዋ። 23 ኔን ሄዋዳን ኦꬆፐነ ሀዌ ጾሳ አዛዞ ግዶፐ፥ ኔን ዳንዳያና። ቃይ ሀ አሳይ ኡባይካ ባረ አላሊ ፖለትና፥ ባረ ሶ ባረ ሶ ባናዋ” ያጌዳ።

24 ሙሴ ባረ ቦሉዋ ቃላ ስሴዳ፤ እ ጌዳዋ ኡባካ ኦꬄዳ። 25 ሙሴ እስራኤልያ ኡባ ግዶፐ ዳንዳይያ አሳቱዋ ዶሪደ አሳ ካለꬅያ ሻኣ ካፓቱዋ፥ ጼቱዋ ካፓቱዋ፥ እሻታሙዋ ካፓቱዋነ ታሙዋ ካፓቱዋ ሱንꬄዳ። 26 ኡንቱንቱ አሳዉ ኡባ ዎደ ፕርዴድኖ፤ ኡንቱንቱ ባረና ዴጼዳ የዉዋ ሙሴኮ አሄድኖ፤ ሽን ዴጸና የዉዋ ኡባ ኡንቱንቱ ዉርሴድኖ።

27 ሄዋፐ ጉይያን ሙሴ ባረ ቦሉዋ ሞይዝና ዮቶረ ባረ ጋድያ ስሜዳ።