1 “ኔን ኡንቱንቶ እማና ዎጋይ ሀዋ። 2 ኔን እብራዌ አይልያ ሻሞፐ፥ እ ነዉ ኡሱፑን ላይꬃ ኦꬆ፤ ሽን ላፑንꬃ ላይꬃን እ አይነ ቃንጸናን፥ አይለተꬃፐ ጮ ከሲደ ቦ። ዎጋ 25:39-46 3 እ ባረካ ዬዳዋ ግዶፐ ባረካ ቦ፤ ባረ ማቻትና ዬዳዋ ግዶፐ፥ አ ማቻታካ አናና ቡ። 4 አ ጎዳይ አዉ ማቻቶ እሜዳዋ ግዶፐነ ማቻታ አዉ አቱማ ናና ዎይ ማጫ ናና የሌዳዋ ግዶፐ፥ ሄ ማቻታነ እዝ ናናይ አ ጎዳዋ፤ እ ባረካ ከሲደ ቦ። 5 ሽን ሄ አይሊ፥ ‘ታን ታ ጎዳ፥ ታ ማቻቶነ ታ ናና ሲቃይ፤ ታን አይለተꬃፐ ከስከ ጎፐ፥’ 6 አ ጎዳይ አ ፕርድያዋንቱ ስንꬃ አꬆ፤ ሄዋፐ ጉይያን ፐንገ ዎይ ፐንገ ማቃንያኮ አ አፊደ፥ አ ሀይꬃ ጎꬃን ሉኮ። ስም እ ባረ ደኡዋ ላይꬃ ኡባን አዉ አይልያ ግዳናዋ።

7 “አሳይ ባረ ማጫ ናቶ አይለተꬃዉ ዛልኦፐ፥ አቱማ አይለቱ አይለተꬃፐ ከስያዋዳን እዛ ከሱፑ። 8 እዛ ባረና ማቼተꬃዉ ዶሪደ አፌዳ ጎዳዉ ሎአና ꬋዮፐ፥ ጎዳይ እዞ ዎዝሳናዉ ኮሼ። እ እዝዉ አማነትቤና ድራዉ፥ እዞ አላጋዉ ዛልአናዉ አዉ ማታይ ባዋ። 9 እ እዞ ባረ ናአዉ እማናዉ ዶሮፐ፥ ማጫ ናትዉ በስያዋ እዝዉ ኦꬆ። 10 እ ባረዉ ሀራ ማቻቶ አኮፐ፥ ኮይሮ ማቻትዉ ቁማ፥ ማዩዋ ዎይ አስናተꬃነ ማቼተꬃ ማታ ፓጭሶፖ። 11 እ ሀ ሄዙባቱዋ እዝዉ እማና ꬋዮፐ፥ አይነ ሻሉዋ ጭገናን አይለተꬃፐ ከሳደ ቡ።

12 “አሳ ሾጪደ ዎꬍያ አሳ ቱሙፐ ዎꬋናዉ በሴ። ዎጋ 24:17 13 ሽን ኤሪደ ግደናን እ ዎꬍያ ዎደ፥ ታን፥ ጾሳይ ጮኡ ጌዳዋ ግዶፐ፥ እ ባቃታና ሳኣ ኡንቱንቶ ታን ጊግሳና። ፓይ. 35:10-34፤ ዛረ. 19:1-13፤ ኢያሳ 20:1-9 14 ሽን ኦነ ቆፒደ ኤሪደ ሀራ ብታንያ ዎꬎፐ፥ ሄ ኡራ ታ ያርሹዋ ሳኣፐ ድጋደ፥ ሀራ ሳኣን ዎꬋ።

15 “ባረ አባ ዎይ ባረ ዳዮ ደችያ ኡራይ ኦንነ ቱሙፐ ሀይቆ።

16 “አሳ ዎልቃን ኦይቂደ ዛልእያ ኡራይ ዎይ ዎልቃን ኦይቄዳ አሳይ አ ኩሽያን ቤቴዳ አሳይ ቱሙፐ ሀይቃናዉ በሴ። ዛረ. 24:7

17 “ባረ አባ ዎይ ባረ ዳዮ ሸቂያዌ ቱሙፐ ሀይቆ። ዎጋ 20:9፤ ማቶሳ 15:4፤ ማር. 7:10

18-19 “ላኡ አሳቱ ዋላቀቶፐ፥ እቱ የንኩዋ ሹቻን ጫዶፐ ዎይ ቦክሶፐ፥ ሄ ደሸቴዳዌ ሀይቀናን አቶዋ ግዶፐነ ሀርጊደ ግሱዋን ጋምኦፐ፥ ደንዲደ ጉፍያና ካረ ሄራን ሀመቶፐ፥ ሄ ደቼዳዌ ሀይቁዋፐ አቴ፤ ግዶፐነ እ አ ኪታ ድጌዳ ድራዉ፥ ሻሉዋ ጭጋናዉነ አ ፓꬃናዉ ማዳና ኮሼ።

20 “አሳይ ባረ አቱማ አይልያ ዎይ ማጫ አይላቶ ጻምአን ሾጮፐነ ሄዋ ጋሱዋን ሄ ኡራይ ሄ ጎዳ ኩሽያን ሀይቂንቶ፥ ሾጬዳዌ ቱሙፐ ሙረታናዉ በሴ። 21 ሽን ሄ ደሸቴዳዌ እት ዎይ ላኡ ጋላሳን ደንዶፐ፥ ሄ አይሊ አ ሚሻ ግድያ ድራዉ፥ እ ሙረተና።

22 “ላኡ አሳቱ እቱ እቱዋና ዋቲደ ሻሃራ ምሽራቶ ደቾፐነ እዛ ቦሸቶፐ፥ ሄዋፐ ሀራ ኢታ ደሸꬃይ ꬋዮፐ፥ ሄ ምሽራት አስናይ ኦቼዳዋነ ዳናቱ ፕርዴዳዋ አያነ ጭጎ። 23 ሽን እዝዉ ደሸꬃይ ዳሮፐ፥ ሸምፑ ሀይቂንቶ ሸምፑዋ፥ 24 አይፍያ ድራዉ አይፍያ፥ አቻ ድራዉ አቻ፥ ኩሽያ ድራዉ ኩሽያ፥ ገድያ ድራዉ ገድያ፥ 25 ጹገꬃ ድራዉ ጹገꬃ፥ ማዱꬃ ድራዉ ማዱꬃ፥ ቆኤዳ ድራዉ ቆኡዋ አካናዉ ኮሼ። ዎጋ 24:19-20፤ ዛረ. 19:21፤ ማቶሳ 5:38

26 “እት አሳይ ባረ አቱማ አይልያዉ ዎይ ማጫ አይላትዉ አይፍያ ባቂደ ቶይሶፐ፥ ሄ አይፍያ ድራዉ አይለተꬃፐ ከስ የዶ። 27 ሄዋዳንካ፥ ባረ አይልያ አቻ ዎይ ባረ አይላት አቻ መንꬆፐ፥ ሄ አቻ ድራዉ አይለተꬃፐ ከስ የዶ።

28 “ቦራይ ማጫ አሳ ዎይ አቱማ አሳ ቃይጪደ ዎꬎፐ፥ ሄ ቦራይ ሹቻን ጫደቲደ ሀይቆ፤ አ አሹ ሜተቶፖ። ሽን ቦራ ጎዳይ ሙረቶፖ። 29 ሽን ቦራይ ካሰካ ቃይጭያ ሜዚ ደእያዋ ግዲና፥ አሳይ አ ጎዳዉ ኦድ ዎꬅና፥ አ ጎዳይ ቃቼናን እጽና፥ ቦራይ አቱማ አሳ ዎይ ማጫ አሳ ዎꬎፐ፥ ሄ ቦራይ ሹቻን ጫደቲደ ሀይቆ፤ ቃይ አ ጎዳይካ ሀይቆ። 30 ሽን እ ባረና ዎዛናዳን ኦሸቶፐ፥ ኡንቱንቱ ኦቼዳዋ አያነ ጭጊደ፥ ባረ ሸምፑዋ ዎዞ። 31 ቦራይ አቱማ ናኣ ዎይ ማጫ ናቶ ቃይጪደ ዎꬎፐካ፥ ፕርዳይ እት ማላ ግዶ። 32 ቦራይ አቱማ አይልያ ዎይ ማጫ አይላቶ ቃይጪደ ዎꬎፐ፥ ቦራ ጎዳይ አይልያ ጎዳዉ ሀታሙ ብራ ሳንትምያ ጭጎ። ቦራይ ሹቻን ጫደቲደ ሀይቆ።

33 “እት አሳይ ኦላ ቁምእያ ፖኪደ፥ ዎይ ኦላ ቦኪደ ቁምኤናን አጎፐ፥ ቦራይ ዎይ ሀሪ ሄ ኦላን ኩንዶፐ፥ 34 ሄ ኦላ ጎዳይ መህያ ጋትያ ጭጎ። እ አ ጎዳዉ ጋትያ ጭጊደ፥ ሀይቄዳ መህያ ባረዉ አኮ።

35 “እት አሳ ቦራይ ሀራ ቦራ ቃይጪደ ዎꬎፐ፥ ፓጻ ቦራ ዛልኢደ፥ አ ጋትያነ ሀይቄዳ ቦራ ልክያን ሻክ አክኖ። 36 ሽን ሄ ቦራይ ቃይጭያዋ ግድያዌ ካሰት ኤረትሽን፥ አ ጎዳይ አ ቃቼናን አጌዳዋ ግዶፐ፥ አ ጎዳይ ቦራ ጭጎ። ያቲደ ሄ ሀይቄዳዋ ባረዉ አኮ።