1 “እት አሳይ ቦራ ዎይ ዶርሳ ዉኢደ ሹኮፐ፥ ዎይ ዛልኦፐ፥ ቦራ ድራዉ እቼሹ ቦራ፥ ዶርሳ ድራዉ ኦይዱ ዶርሳ ጭጎ።

2 “ካይሱ ጎልያ ቦኪደ ኦይቀቶፐነ ሾጨቲደ ሀይቂንቶ፥ ሾጬዳዌ ሱꬃ ጉሴዳዎ ኦሸተና። 3 ሽን ሄዌ ጻልቂ ዶል ክችና ሀኖፐ፥ እ ሄ ጉኬዳ ሱꬃ አጩዋን ኦሸቴ። ካይሱ ባረ ዉኤዳዋ ዛሮ፤ ሽን አዉ አያይነ ꬋዮፐ፥ ባረ ዉኤዳዋ ዛራናዉ እ ዛልኤቶ። 4 እ ዉኤዳ መሂ ፓጻ ደኢደ አ ኩሽያን ቤትንቶ፥ ቦራ፥ ዎይ ሀርያ፥ ዎይ ዶርሳ ግዶፐነ፥ እ ባረ ዉኤዳዋ ላኡ ኩሽያ አꬂደ ጭጎ።

5 “እት አሳይ ባረ መህያ ደምባን ዎይ ዎይንያ ቱራ ግዶን ሄምሽን፥ መሂ ሀራ አሳ ሾይቃፐ ሞፐ፥ እ ባረ ሾይቃፐ ዎይ ባረ ዎይንያ ቱራ ኡባፐ ሎእያዋ አፍላማ ጭጎ።

6 “ጻራጋይ ደንዲደ አጉንꬃ ቡራና ላኢደ፥ ዶርያን ደእያ ካꬃ፥ ዎይ ኤቁዋን ደእያ ካꬃ፥ ዎይ ጎሻ ኡባ ምያዋ ግዶፐ፥ ኮይሮ ጻራጋ ኦይꬄዳ ብታኒ አጫ ጭጎ።

7 “እት አሳይ ብራ ዎይ ሀራ ሚሻ ናግሳናዉ ባረ ሾሮ ሀዳራ እምና፥ ሾሩዋ ሶፐ ሄ ሚሻይ ዉኤቶፐነ ካይሱ ኦይቀትንቶ፥ ካይሱ ሄ ሚሻዉ ላኡ ኩሽያ አꬂደ ጭጎ። 8 ሽን ካይሱ ቤተናን ꬋዮፐ፥ ጎልያ ጎዳይ ፕርድያዋንቱኮ ሺቂደ ባረ ሾሩዋ ሚሻ ቦላ ባረ ኩሽያ ዎꬅቤናዋ ጫቆ።

9 “አሳይ አይ ሞቱዋንካ፥ ቦራ ጋሱዋን፥ ዎይ ሀርያ ጋሱዋን፥ ዎይ ዶርሳ ጋሱዋን፥ ዎይ ማዩዋ ጋሱዋን፥ ዎይ ሀራ ባዬዳዋ ጋሱዋን፥ ‘ሀዌ ታዋ’ ጊደ ሞተቶፐ፥ ላኡ ባጋይካ ባረንቱ ሞቱዋ ፕርድያዋንቱ ስንꬃ አꬅኖ፤ ፕርድያዋንቱ ባይዛንቻ ጌዳ ኡራይ ባረ ሾሮ ላኡ ኩሽያ አꬂደ ጭጎ።

10 “አሳይ ባረ ሾሮ ሀርያ፥ ዎይ ቦራ፥ ዎይ ዶርሳ፥ ዎይ ሀራ መህያ ናግሳናዉ ሀዳራ እምና ሀይቂንቶ፥ ዎይ ደሸትንቶ፥ ዎይ ኦንነ በኤናን ቦንቃንቻይ አፎፐ፥ 11 ሀዳራ ናግያዌ ባረ ሾሩዋ መህያ ቦላ ባረ ኩሽያ ዎꬅቤናዋ መꬍና ጎዳ ስንꬃን ጫቂና፥ ኡንቱንቱ ግዶን ደእያ የዉ ማየቶ። ሄ መህያ ጎዳይ ጫቁዋ አኮ፤ ጭጋ እማናዉ ኮሸና። 12 ሽን መሂ ሾሩዋፐ ዉኤቴዳዋ ግዶፐ፥ እዛዎ ጭጎ። 13 ሄ መህያ ዶአይ መንሬꬂደ ሜዳዋ ግዶፐ፥ ማርካ ግዳናዳን ዶአይ ሚሽን አቴዳዋፐ አኪደ ዮ፤ ያቲደ መኤረቴዳ መህያ ድራዉ ጭጎፖ።

14 “አሳይ ባረ ሾሩዋፐ መህያ ጋርጾፐነ አ ጎዳይ ባይና ሳኣን ሄ መሂ ደሸቶፐ ዎይ ሀይቆፐ፥ ሄ መህያ ጭጎ። 15 ሽን አ ጎዳይ አናና ደኦፐ፥ ጋርጼዳዌ ጭጎፖ፤ ከራዉ አኬዳዋ ግዶፐ፥ ከራዉ ጭግያ ሻሉ አጩዋ ጭጌዳ።

16 “እት አሳይ አስናዉ ጊጋቤና ዎዶራቶ ጭሚደ፥ እዝና ግስያዋ ግዶፐ፥ እዞ ጭሎሺደ ባረዉ ማቻቶ ኦꬆ።ዛረ. 22:28-29 17 እዝ አቡ እዞ አዉ እማናዉ እጾፐ፥ ዎዶራቶ አክያ ኡራይ ጭሎሽያዋ ኬሻ ብራ እ አቦ እሞ።

18 “ብትያ ምሽራቶ ፓጻ ዎꬆፓ።ዛረ. 18:10፣ 11

19 “መህያና ግስያ ኦንነ ቱሙፐ ሀይቆ። ዎጋ 22:19፤ 20:15-16፤ ዛረ. 27:21

20 “መꬍና ጎዳ ጻላላሳፐ አትና፥ ሀራ ጾሳዉ ያርሽያዌ ኦንነ ሙለ ꬋዮ።ዛረ. 17:2-7 21 በቲደ ዬዳ አሳ ቆሆፕተ ዎይ ኡንኦፕተ፤ አያዉ ጎፐ፥ ህንተንቱካ ግብጼ ጋድያን በተ ግዲደ ደኤድታ። ከሳ 23:9፤ ዎጋ 19:33-34፤ ዛረ. 24:17-18፤ 27:19 22 አስናይ ሀይቄዳ አምአቶነ አዉ ሀይቄዳ ህዬሳ ኡንኦፕተ። 23 ህንተንቱ ኡንቱንታ ኡንኤꬅና፥ ኡንቱንቱ ታኮ ዋሶፐ፥ 24 ታን ኡንቱንቱ ዋሱዋ ቱሙፐ ስሳና፤ ሄ ዎደ ታ ሀንቁ ህንተንቱ ቦላ ደንዳና፤ ታን ህንተንታ ማሻን ዉርሳና፤ ህንተንቱ ማቻቱ አምኤ ህንተንቱ ናናይካ አዉ ሀይቆዋንታ ግዳናዋንታ።

25 “ህንተንቱ ግዶን ደእያ ታ አሳፐ እት ህዬሳዉ ሻሉዋ ታልኦፐ፥ ሻሉዋ ድቻዉ እምያ አሳዳን ሀኖፕተ፤ ኔን ድቻ አ ኦቾፓ። ዎጋ 25:35-38፤ ዛረ. 15:7-11፤ 23:19-20 26 ኔን አጩዋ ድራዉ ነ ላግያ ማዩዋ ኦይቆፐ፥ አዋይ ዉለናን ደእሽን አዉ ዛራ፤ ዛረ. 24:10-13 27 አያዉ ጎፐ፥ እ ባረ ቦላ ካምያዌ ሄን ጻላላና፤ ሀራባ አያ ማዪደ አቃናዉ ዳንዳዪ? እ ታዉ ዋሶፐ፥ ታን ቃረትያዋ ግድያ ድራዉ፥ ስሳና።

28 “ጾሳ ቦላ ሸቃ ቃላ ሃሳዮፓ፥ ዎይ ነ ደርያ ሞድያዋ ሸቆፓ። ኪታ 23:5 29 ነ ካꬃ ጼራፐነ ነ ዎይንያ ጉምኤꬃ ኩመንꬃፐ ታዉ ያርሹዋ ሺሻ።

“ኔን ነ አቱማ ናና ግዶን ባይራትያ ናኣ ታዉ እማናዉ ኮሼ። 30 ሚዛፐካ ዶርሳፐካ ሄዋዳን ኦꬃ። ኡንቱንቱ ላፑን ጋላሳይ ጋካናዉ፥ ባረንቱ አየቱዋና አየቱዋና ጋምእኖ፤ ሆስፑንꬃ ጋላስ ኡንቱንታ ታዉ እማ።

31 “ህንተንቱ ታዉ ጌሻ አሳ ግዳናዉ ኮሼ፤ ሄዋ ድራዉ፥ ባዙዋ ዶአይ መንሬꬂደ ዎꬌዳ መህያ አሹዋ ሞፕተ፤ ሄዋ ካናዉ ኦልተ። ዎጋ 17:15