1 “ዎርዶ ኦዱዋ ፑኮፓ፤ ዎርዱዋ ማርካ ግዳደ፥ ኢታ አሳ ማዶፓ። ከሳ 20:16፤ ዎጋ 19:11-12፤ ዛረ. 5:20 2 ኢታባ ኦꬃናዉ ጮራ አሳ ካሎፓ፤ ፕርዳ ጌላያናዉ ጮራ አሳና እታ ግዳደ ማርካቶፓ። 3 ህዬሳይ ፕርዳዉ ሺቆፐ፥ ሞቱዋን አ መቱዋ ጼላደ ማዶፓ። ዎጋ 19:15

4 “ነ ሞርክያ ቦራይ ዎይ ሀሪ ባዬዳዋ ደሞፐ፥ ዛራደ አዉ አፋ። ዛረ. 22:1-4 5 ኔና እጽስያ ብታንያ ሀሪ ጫናና ኩንዴዳዋ በኦፐ፥ ሄዋን አጎፓ፤ ማዳደ አናና ደንꬃ።

6 “ፕርዳ ዳባባን ማዳደ፥ ህዬሳ አሳ ፕርዳ ጌላዮፓ። ዎጋ 19:15፤ ዛረ. 16:19 7 ዎርዶ የዉዋ ኡባፐ ሃካ፤ ጌሻ ዎይ ጽሉዋ ዎꬎፓ፤ አያዉ ጎፐ፥ ኮባ ኦꬄዳዋ ታን ሳሮ የድከ። 8 ማታይያ (ማጋንጻ) አኮፓ፤ አያዉ ጎፐ፥ ማታዪ ጼልያዋንቱ አይፍያ ቆቅሴነ ጽላቱዋ ቃላ ምርቄ።

9 “በትያ ናቆፕተ፤ በተ ግድያዌ አይ ኬሻ ካዮይንቶ ኤሪታ፤ አያዉ ጎፐ፥ ህንተንቱ ህንተንቱ ሁጲያዉ በተ ግዲደ ግብጼ ጋድያን ደኤድታ። ከሳ 22:21፤ ዎጋ 19:33-34፤ ዛረ. 24:17-18፤ 27:19

10 “ኔን ነ ጋድያ ኡሱፑን ላይꬃዉ ጎሻደ፥ ዘራደ ካꬃ ቆይጫ አካ። ዎጋ 25:1-7 11 ላፑንꬃ ላይꬃን ጋድያ ጎሸናን ሻቻ፤ ያቶፐ፥ ነ አሳ ግዶን ደእያ ህዬሳቱ ሄዋፐ ምያባ ደማና፤ ቃይ ኡንቱንቱፐ አትያዋ ዶአቱ ማና። ኔን ነ ዎይንያ ቱራካ ነ ዎጋራካ ሄዋዳን ኦꬃ። 12 ኡሱፑን ጋላሳ ነ ኪታ ኪተታ፤ ነ ቦራይነ ነ ሀሪ ሸምፓና ማላነ ነ ሶን የለቴዳ አይሊነ በቲ፥ ሸምፓና ማላ፥ ላፑንꬃ ጋላስ ኦሱዋ ኦꬆፓ።ከሳ 20:9-11፤ 31:15፤ 34:21፤ 35:2፤ ዎጋ 23:3፤ ዛረ. 5:13-14

13 “ታን ህንተንታ ጌዳዋ ኡባ ምንሲደ ኦꬅተ፤ ሀራ ጾሳቱዋ ሱንꬃ ጼሶፕተ፤ ህንተንቱ እንጻርሳፐ ሄዌ ስሰቶፖ።

14 “ላይꬃን ሄዙ ገደ ህንተንቱ ታዉ ባላ ቦንችተ። 15 ማጋገ ኡክꬃ ባላ ቦንችተ፤ ታን ህንተንታ አዛዜዳዋዳን፥ ላፑን ጋላሳ እርሹዋ የግቤና ኡክꬃ ሚተ፤ ህንተንቱ አቢባ ጌተትያ አግናን ኬሬዳ ጋላሳቱዋን ሀ ባላ ቦንችተ፤ አያዉ ጎፐ፥ ህንተንቱ ግብጼፐ ከሴዳዌ ሄ አግናና።

“ህንተፐ እት አሳይነ ታ ስንꬃን መላ ኩሸ ቤቶፖ። ከሳ 12:14-20፤ ዎጋ 23:6-8፤ ፓይ. 28:17-25

16 “ቃይ ህንተንቱ ህንተንቱ ጋደን ዘርና፥ ኮይሮ ጋኬዳ ካꬃ ጫክያ ዎደ፥ ካꬃ ጫክያ ባላ ቦንችተ። ዎጋ 23:15-21፣ 39-43፤ ፓይ. 28:26-31

“ቃይካ ላይꬃ ዉርሰꬃን፥ ካꬃ አይፍያ ጋደፐ ሺሽያ ዎደ፥ ሺሹዋ ባላ ቦንችተ። 17 አቱማ አሳይ ኡባይ ኡባ ሞድያ መꬍና ጎዳ ስንꬃን ላይꬃን ሄዙ ገደ ቤቶ።

18 “ኔን ያርሹዋ ሱꬃ ታዉ ሺሻደ፥ እርሹዋ የጊደ ኡኬዳ ኡክꬃና ሺሾፓ። ታ ባላ ቦንችያ ጋላስ ያርሸቴዳ ሞꬉዋፐ ዎንታዉ አይነ አቶፖ። 19 ነ ጋደን ባይራ ካኤዳ ካꬃፐ ኡባፐ ሎእያዋ መꬍና ጎዳ ሶ፥ ነ ጾሳ ሶ አሀ። ከሳ 34:26፤ ዛረ. 14:21፤ 26:2 ዴሻ ማራ አ ዳይ ማꬃን ዶይሶፓ።

20 “ነ ኦግያን ኔና ናጋና ማላነ ታን ነዉ ጊግሴዳ ሳኣ ኔና አፋና ማላ፥ ታን ኪታንቻ ነ ስንꬃን ኪታና። 21 እ ኦድያዋ ሀይዛ አዉ አዛዘታ፤ አ ቦላ ማካሎፓ፤ ታ ሱንꬃይ አ ቦላ ደእያ ድራዉ፥ ህንተንቱ ናጋራ ኦꬅያዋ ግዶፐ፥ ህንተንቶ እ አቶ ጌና። 22 እ ኦድያዋ ህንተንቱ ምንሲደ ሀይዞፐነ ታን ኦድያዋ ኡባ ኦꬆፐ፥ ህንተንቱ ሞርከቱዋ ታን ሞርካና፤ ህንተናና ኤቀትያዋንቱና ታንካ ኤቀታና። 23 ታ ኪታንቻይ ህንተፐ ስንꬃና ቢደ፥ ህንተንታ አሞራዋናቱዋ ጋድያ፥ ሂተቱዋ ጋድያ፥ ፓርዛዋናቱዋ ጋድያ፥ ካናነቱዋ ጋድያ፥ ሂዌቱዋ ጋድያነ ያቡሳዋናቱዋ ጋድያ አሀና። ታን ኡንቱንቱ ኡባ ꬋይሳና። 24 ኡንቱንቱ ጾሳቱዋ ስንꬃን ሆኮፕተ፥ ዎይ ጎይኖፕተ፥ ዎይ ኡንቱንቱ ሀኑዋ ቁሎፕተ። ህንተንቱ ኡንቱንቱ ጾሳቱዋነ ኡንቱንቱ ሹቻ ምስለቱዋ መንሬꬃናዉ ኮሼ። 25 መꬍና ጎዳ፥ ህንተንቱ ጾሳዉ፥ ጎይንተ፤ ያቶፐ፥ እ ህንተንቱ ቁማነ ህንተንቱ ሃꬃ አንጃናዋ፤ ታን ሀርግያ ህንተንቱ ግዶፐ ድጋና። 26 ህንተንቱ ቢታን አይ ማጫ አሳይነ ቦሸተና፤ ማይነና። ታን ህንተንቱ ደአና ላይꬃ ፓይዱዋ አዱሳና።

27 “ታን ታ ያሻ ህንተንቱ ስንꬃን የዳና፤ ህንተናና ጋከትያ ካዉተꬃ ኡባ ዳጋንꬃና፤ ህንተንቱ ሞርከቱ ኡባይ ህንተንቶ ዞኪያ ዛሪደ፥ ባቃታናዳን ታን ኦꬃና። 28 ታን ህንተፐ ስንꬃዉ ዱክያ ካጅያ የዳና፤ ሂዌቱዋ፥ ካናነቱዋነ ሂተቱዋ ህንተንቱ ስንꬃፐ ላጋደ ከሳና። 29 ሽን ቢታይ መላ አተናዳንነ ባዙዋ ዶአይ ህንተንታ ዋይሰናዳን፥ እት ላይꬃን ኡንቱንታ የደርስከ። 30 ሽን ህንተንቱ ፓይዱዋን ዳሪደ፥ ሄ ጋድያ ላታና ጋካናዉ፥ ታን ኡንቱንታ ላፋ ላፋ ላጋደ ህንተንቱ ስንꬃፐ ከሳና። 31 ታን ህንተንቱ ዛዋ ዞኦ አባፐ ፕልስጼማ አባ፥ መላ ቢታፐ ኤፍራጺሳ ሻፋ ጋꬃና። ሄ ጋድያን ደእያ ኡባ ታን ህንተንቱ ኩሽያን አꬃደ እማና፤ ህንተንቱካ ኡንቱንታ ህንተንቱ ስንꬃፐ ላጊደ ከሳና። 32 ኡንቱንቱና ዎይ ኡንቱንቱ ጾሳቱዋና ጫቁዋ ዎꬆፕተ። 33 ኡንቱንታ ህንተንቱ ጋድያን ዎꬆፕተ፤ ሄዌ ꬋዮፐ ኡንቱንቱ ህንተንታ ታ ቦላ ናጋራ ኦስሳናዋንታ፤ አያዉ ጎፐ፥ ኡንቱንቱ ጾሳቶ ጎይንያዌ ቱሙፐ ህንተንቶ ጲረ ግዳናዋ” ያጌዳ።