1 ሄዋፐ ጉየ መꬍና ጎዳይ ሙሳ፥ “ኔን፥ አሮነ፥ ናዳበ፥ አቢህነ እስራኤልያፐ ላፑን ታሙ ጭማ አሳቱ መꬍና ጎዳኮ ደርያ ሁጲያ ፑደ ከሲደ ሃኩዋን ጎይንተ። 2 ሽን ሙሴ፥ ኔን ኔረካ መꬍና ጎዳኮ ሺቃ፤ ሀራ ጭማቱ ታ ማታ ዮፕኖ። ቃይ አሳይካ ኔናና ፑደ ከሶፖ” ያጌዳ።

3 ሙሴ ዪደ፥ መꬍና ጎዳ ቃላ ኡባነ አ ዎጋ ኡባ አሳዉ ኦድና አሳይ ኡባይ እት ቃላን፥ “መꬍና ጎዳይ ኦዴዳዋ ኡባ ኑን ኦꬃና” ያጌድኖ። 4 ሙሴ መꬍና ጎዳይ ኦዴዳዋ ኡባ ጻፌዳ።

ዎንተꬃ ጋላስ ዎንታ ጉራን ደንዲደ፥ ደርያ ጻጱዋን ያርሽያ ሳኣ ግምቢደ እስራኤልያ አሳ ያራ ታማነ ላኡዋ ሱንꬃን፥ ታማነ ላኡ ሹቻ ቱሳ ኤሴዳ። 5 እ እስራኤላቱዋፐ ያላጋ አቱማ አሳ ኪትና፥ ኡንቱንቱ ቢደ ጹግያ ያርሹዋ ሺሼድኖ፤ ቃይ እትፐተꬃ ያርሾ ኮሩማቱዋ መꬍና ጎዳዉ ያርሼድኖ። 6 ሙሴ ሱꬃፐ ባጋ አኪደ ከርያን ትጌዳ፤ አቴዳ ባካ ሱꬃ እ ያርሽያ ሳኣን ጫጫፌዳ። 7 ሄዋፐ ጉይያን ቃላ ጫቁዋ ማጻፋ አኪደ፥ አሳዉ ናባቤዳ፤ ኡንቱንቱ፥ “መꬍና ጎዳይ ኦዴዳዋ ኡባ ኑን ኦꬃና፤ ኑን አዛዘታና” ያጌድኖ።

8 ሄዋፐ ጉይያን ሙሴ ሄ ሱꬃ አኪደ፥ አሳ ቦላ ጫጫፊደ ኡንቱንታ፥ “በእተ፥ መꬍና ጎዳይ ሀ ቃላ ኡባን ህንተናና ዎꬄዳ ቃላ ጫቁዋ ሱꬃይ ሀዋ” ያጌዳ። ማቶሳ 26:28፤ ማር. 14:24፤ ሉቃሳ 22:20፤ 1 ቆሮ. 11:25፤ እብራ. 9:19-20፤ 10:29

9 ሙሴ፥ አሮነ፥ ናዳበ፥ አቢህነ እስራኤልያ ጭማቱዋፐ ላፑን ታሙ ፑደ ከሴድኖ። 10 እስራኤልያ ጾሳ በኤድኖ፤ አ ገድያፐ ጋርሳና ሳሉዋዳን ጌዬዳ ሳምፔርያ ጌተትያ ጶልያ ሹቻፐ ኦሰቴዳዋ ማላትያ ዉይግያ ማላባይ ደኤ። 11 ሽን ጾሳይ እስራኤልያ አሳ ካፓቱዋ ዎꬍቤና። ኡንቱንቱ ጾሳ በኤድኖ፤ አ ስንꬃን ሜድኖነ ኡሼድኖ።

12 መꬍና ጎዳይ ሙሳ፥ “ኔን ደርያ ፑደ ሃ ታኮ ከሳደ፥ ሀዋን ጋምአ፤ ያቶፐ ኔን ኡንቱንታ ታማርሳና ማላ፥ ታን ዎጋነ አዛዙዋ ጻፌዳ ሹቻ ነዉ እማና” ያጌዳ።

13 ሄዋፐ ጉይያን ሙሴ ባረ ቆማ ኢያሱና ባናዉ ደንዴዳ፤ ሙሴ ጾሳ ደርያ ፑደ ከሴዳ። 14 እስራኤልያ አሳ ጭማቱዋ እ፥ “ኑን ህንተንቱኮ ስማናዉ ሀዋን ደእሽተ፤ አሮነነ ሁር ሀዋን ህንተናና ደኢኖ፤ የዉ ደእያ ኦንነ ኡንቱንቱኮ ቦ” ያጌዳ።

15 ሙሴ ደርያ ፑደ ከሴዳ ዎደ፥ ሻሪ ደርያ ካሜዳ። 16 ቃይ መꬍና ጎዳ ቦንቹ ሲና ደርያ ቦላን ኡቴዳ፤ ሄ ሻሪ ኡሱፑን ጋላሳ ማዬዳ፤ ላፑንꬃ ጋላሳን ሄ ሻርያ ግዶፐ መꬍና ጎዳይ ሙሳ ጼሴዳ። 17 እስራኤላቶ መꬍና ጎዳ ቦንቹ ደርያ ሁጲያን ጹግያ ታማ ማላቲደ ቤቴዳ። 18 ሄዋፐ ጉይያን ሙሴ ሄ ሻርያ ግዶ ገሊደ፥ ደርያ ፑደ ከሲደ ደርያ ሁጲያን ኦይታሙ ጋላሳነ ኦይታሙ ቃማ ጋምኤዳ። ዛረ. 9:9