ጌሻ ዱንካንያነ ጎይና ዎጋ
25
(25:1—40:38)
ጾሳ ዱንካንያ ቶካናዉ እመቴዳ እሞታ
(ከሳ 35:4-9)
1 መꬍና ጎዳይ ሙሴዉ ሀዋዳን ያጌዳ፤ 2 “ታዉ እምያዋ አሀናዳን ኔን እስራኤላቶ ኦዳ፤ ታዉ እማናዉ አ ዎዛናይ አ እማ እማ ግያ አሳ ኡባ እሞታ ኔን ታዉ አካ። 3 ህንተንቱ ኡንቱንቱፐ አካና እሞታይ ሀዋ: ዎርቃ፥ ብራ፥ ናሃስያ ብራታ፥ 4 ሳሉዋ ማላትያ፥ ኦቻ ቴራ ማላትያነ፥ ዞኦ ሊቆ ቃጭና፥ ዴሻ እስክያ፥ 5 ዶርሳ ኦርግያ ጋልባ ዞኦ ቃላምያን የግ ከሴዳዋ፥ ሀራ ጋልባ፥ ኦዶሩዋ፥ 6 ጾምፕያዉ ዎጋራ ዛይትያ፥ ኦክያ ዛይትያነ እጻና ሳዌꬅያ ቅማምያ፤ 7 ቄሳቱዋ ካፑዋ ኤፉድያንነ ትራን ዎꬅያዋን የግያ ማርግድያ ጌተትያ ሹቻቱዋነ ሀራ ጶልያ አልኦ ሹቻቱዋ አሆ።
8 “ያቲደ ታን ኡንቱንቱ ግዶን አቃናዳን፥ ኡንቱንቱ ታዉ ጌሻ ሳኣ ጊግስኖ። 9 ልከ ታን ኔና በሴዳ ሌምሱዋ ኡባዳን ጾሳ ዱንካንያነ አ ግዶን ደእያ ሚሻቱዋ ኦꬅተ።
ቃላ ጫቁዋ ታቦታ
(37:1-9)
10 “ኡንቱንቱ ኦዶሩዋ ምꬃፐ አዱሳተꬃይ ላኡ ዋꬋነ ባጋ፥ ጎምፓይ እት ዋꬋነ ባጋ፥ ጌሳይ ቃይ እት ዋꬋነ ባጋ ግዴዳ ታቦታ መꬍኖ። 11 ሶያነ ካርያ ዋላካይ ባይና ዎርቃን ሼሻ፤ አ ዩሹዋካ ዎርቃ ትገꬃን ዩሻ አꬃ። 12 ሄ ታቦታዉ ኦይዱ ዎርቃ ሳጋየቱዋ ትጋደ ኦይዱ ገደቱዋን እት ባጋና ላኡ ሳጋየቱዋ፥ ቃይ የንኮ ባጋና ላኡ ሳጋየቱዋ አꬃ። 13 ሄዋፐ ጉይያን ኦዶሩዋፐ ካሱዋ ከሳደ ዎርቃን ሼሻ። 14 ታቦታ ቶካናዉ፥ ታቦታ ምይያን ደእያ ሳጋየቱዋን ካሱዋ አꬃ። 15 ቶክያ ካሶቱ ታቦታ ሳጋየቱዋ ግዶን ደእኖ፤ ኡንቱንቱ ሄዋፐ ኡባካ ከሶፕኖ። 16 ታቦታ ግዶን ታን ነዉ እምያ፥ ታሙ አዛዛቱ ጻፈት ኡቴዳ ላኡ ማሰቴዳ ማርካተꬃ ሹቻቱዋ ዎꬃ።
17 “ዋላካይ ባይና ዎርቃፐ ላኡ ዋꬋነ ባጋ አዱቂያ፥ እት ዋꬋነ ባጋ አክያ አቶ ግያ ሳኣ ቁምእያ መꬋ።እብራ. 9:5 18 ቁምእያዉ ዉርሰꬃ ላኡ ባጋ ጋጻን ላኡ ክሩቤልያ፥ ቆጸቴዳ ዎርቃፐ መꬋ። 19 እት ክሩብያ እት ባጋ ጋጻን፥ ላኤንꬆ ክሩብያ የንኮ ባጋ ጋጻን ላኡዋካ ቁምእያና ጋꬃ ኦይꬃደ መꬋ። 20 ክሩበቱ ባረንቱ ቀፍያ ደንꬂደ፥ አቶ ግያ ሳኣ ቁምእያ ባረንቱ ቀፍያን ኩዋይ ዎꬅኖ፤ ቃይ እቱ እቱዋኮ ስም ኡቲደ፥ ቁምእያ ጼልኖ። 21 ቁምእያ ታቦታዉ ቦላ ባጋን ዎꬃ፤ ቃይ ታን ነዉ እምያ አዛዛቱ ጻፈቲደ ማሰቴዳ ሹቻቱዋ ታቦታ ግዶን ዎꬃ። 22 ማርካተꬃ ታቦታ ቦላ ቁምእያ ቦላ ደእያ ላኡ ክሩበቱዋፐ ግዱዋን ታን ኔናና ጋከታደ እስራኤልያ አሳዉ ታን እምያ አዛዙዋ ኡባ ያን ነዉ እማና።
ኡክꬃ ዎꬅያ ጻርጴዛ
(37:10-16)
23 “ኦዶሩዋ ምꬃፐ አዱሳተꬃ ላኡ ዋꬋ፥ ጎምፓይ እት ዋꬋ፥ ጌሳይ ቃይ እት ዋꬋነ ባጋ ግድያ እት ጻርጴዛ መꬋ። 24 ያታደ ዋላካይ ባይና ዎርቃን ሼሻ፤ ቃይ አ ዩሹዋን ዎርቃ ትገꬃ ዩሻ አꬃ። 25 ሄዋዳንካ፥ ቃይ ጎምፓይ ታካ ግዴዳ ሻሽያ አ ቦላ ዩሻ አꬃ። ያታደ አ ቦላ ዎርቃ ትገꬃ ዩሻ። 26 ሄ ጻርጴዛዉ ኦይዱ ዎርቃ ሳጋየቱዋ መꬋደ፥ ጻርጴዛ ገደቱ ደእያ ኦይዱ ጋጻን ዎꬃ። 27 ጻርጴዛ ቶካናዉ ካሱዋ አꬅያ ሳጋየቱ ጻርጴዛዉ ሻሽያ ጋጻን ሺቂደ ደእኖ። 28 ሄ ቶክያ ካሱዋ ኦዶሩዋፐ ከሳደ፥ ዎርቃን ኡንቱንታ ሼሻ። 29 ሄዋዳንካ፥ ቃይ ሻታቱዋነ ጭልፓቱዋ፥ ዱቂያባቱዋነ ጹአቱዋ ዋላካይ ባይና ዎርቃፐ መꬋ። 30 ታ ስንꬃ አꬅያ ጌሻ ኡክꬃይ ኡባ ዎደካ ጻርጴዛ ቦላ ꬋዮፖ።ዎጋ 24:5-8
ጾምፕያ ዎꬅያ ባላ
(37:17-24)
31 “ጾምፕያ ዎꬅያ ባላ ቆጸቴዳ ዋላካይ ባይና ዎርቃፐ መꬋ፤ ሄ ባላይ ኤቂያ ገዲካ፥ ቃይ ግዶ ቶማይካ ኡባይ ቆጸቴዳ ዎርቃፐ ኦሰታናዉ ኮሼ። አ ዋንጫቱ፥ አ ኩኩሞቱ አ ጪሻቱ ኡባይ አናና እትፐ ኦይቀት መታናዉ ኮሼ። 32 ምይያና ኡሱፑን ማራቱ አዉ ከሲኖ፤ ማራቱዋፐ ሄዛቱ እት ባጋና፥ ቃይ ሄዛቱ የንኮ ባጋና ደእኖ። 33 ኡሱፑን ማራቶካ ሁጲያን ሁጲያን ሄዙ ሄዙ ኩኩሙነ ጪሻይ ደእያ ላዉዝያ ጪሻ ማላትያ ዋንጫይ ደኦ። 34 ጾምፕያ ዎꬅያ ባላዉ ግዶ ቶማይ፥ ኩኩሞቱዋ ጪሻቱ ደእያ ላዉዝያ ጪሻ ማላትያ ኦይዱ ዋንጫይ ደኦ። 35 ላኡ ላኡ እትፐ ዋꬃን ደእያ ሄዙ ማራቱዋፐ ጋርሳና እት እት ኩኩሙ ደኦ። 36 ኩኩማቱነ ማራቱ ኡባይ ጾምፕያ ዎꬅያ ባላና እትፐ፥ ኦይቀት እቱዋ ግዲደ፥ ዋላካይ ባይና ዎርቃፐ ቆጸቲደ መትኖ።
37 “ሄዋፐ ጉይያን ጾምፕያ ዎꬅያ ባላዉ ላፑን ጾምፐቱዋ ጊግሳደ፥ ኡንቱንቱ ስንꬃ ግዶዉ ፖአና ማላ ꬎቁ ኦꬃደ ዎꬃ። 38 ጾምፕያ ቶይስያ ቃጰቱዋነ ኡንቱንታ ዎꬅያዋንታ ዋላካይ ባይና ዎርቃፐ መꬋ። 39 ጾምፕያ ዎꬅያ ባላይነ አን ጎኤትያ ሚሻ ኡባይ ሀታማነ እቼሹ ኪሎ ግራመ ግዴዳ ዋላካይ ባይና ዎርቃፐ መቲኖ። 40 አኬካ፤ ታን ኔና ደርያ ሁጲያን በሴዳዋዳን ኪተታ። ኪታ 7:44፤ እብራ. 8:5