1 “ቃይ ሊቆ ፑቱዋፐ ሳሉዋ ማላትያ፥ ኦቻ ቴራ ማላትያነ ሾሎላ ዞኦ ቃጭናፐ ዳደቴዳ ታሙ ጋርዳቱዋ ጾሳ ዱንካንያ ጊግሳ። ሄ ጋርዳቱዋን እት ሂላን ክሩበቱዋ ምስልያ ዳድሳ። 2 ጋርዶቱ ኡባይ እት ልከ ግድኖ፤ ጌሳይ ላታማነ ሆስፑን ዋꬋ፤ ጎምፓይ ኦይዱ ዋꬋ ግዶ። 3 እቼሹ ጋርዳቱዋ እትፐ ጋꬃደ ስካ፤ የንኮ አቴዳ እቼሹ ጋርዳቱዋካ ኡንቱንቱዋዳን ኪተታ። 4 እትፐ ጋከቲደ ስከቴዳ ጋርዳቱዋፐ እት ጋርዱዋ ዉርሰꬃ ጋጻን ሳሉዋ ማላትያ ጫርቂያፐ ማጫራ መꬋ፤ ቃይ እትፐ ጋከት ስከቴዳ የንኮ ጋርዱዋንካ ሄዋዳን ኪተታ። 5 እትፐ ጋከቴዳ እት ጋርዱዋ ቦላ እሻታሙ ማጫራ፥ ቃይ እትፐ ጋከቴዳ የንኮ ጋርዱዋ ቦላካ እሻታሙ ማጫራ መꬋ፤ ሄ ማጫራቱ ኡባይካ እቱ እቶ ማራን ደእኖ። 6 ሄዋፐ ጉይያን ዎርቃፐ እሻታሙ ኦይቂያዋንታ መꬋደ ጾሳ ዱንካኒ እቱዋ ግዳና ማላ፥ ሄ ጋርዳቱዋ ጋጻ ጋጻ ሄ ኦይቂያዋንቱን ኦይꬃ።

7 “ቃጭናፐ መቴዳ ጾሳ ዱንካንያ ቦላና ካማና ማላ፥ ታማነ እት ጋርዳቱዋ ዴሻ እስክያፐ ዳዳደ፥ እት ዱንካንያ መꬋ። 8 ታማነ እት ጋርዳቱካ እት ልከ ግድኖ፤ እት እት ጋርዱዋ ጌሳይ ሀታሙ ዋꬋ፥ ጎምፓይ ኦይዱ ዋꬋ ግዶ። 9 እቼሹ ጋርዳቱዋ እት ባጋና፥ ኡሱፑን ጋርዳቱዋ ቃይ የንኮ ባጋና ጋꬃደ ስካ። ኡሱፑንꬃ ጋርዱ ዳኮቲደ፥ ዱንካንያዉ ስንꬃ ባጋና ዳቡለቶ። 10 ጋꬅ ስኬዳ ጋርዳቱዋፐ እት ጋርዱዋ ጋጻን እሻታሙ ማጫራ መꬋ፤ ቃይ ጋꬅ ስኬዳ የንኮ ጋርዳቱዋፐ ጋጻን እሻታሙ ማጫራ መꬋ። 11 እሻታሙ ናሃስያ ኦይቂያዋ መꬋደ፥ ማጫራቱዋ ግዶ ገልሳ፤ ያታደ ዱንካንያ እትፐ ጋꬃ ኦይꬃ። ያቶፐ ሀ ላኡ ኦይቀቴዳ ካምያዋንቱ እቱዋ ግዳና። 12 ሀ ዱንካንያ ጋርዳቱዋፐ ፓላሄዳ ባጋ ጋርዱ ጾሳ ዱንካንያዉ ጉየና ካቀቶ። 13 ዱንካንያ ጋርዶቱ ላኡ ባጋናካ እት እት ዋꬋ ኬሻ ፓላህኖ፤ ሄ ፓላሄዳዋንቱ ጾሳ ዱንካንያ ካማና ማላ፥ ላኡ ባጋ ምይያና ካቀትኖ።

14 “ዴሻ አጎዛፐ መቴዳ ዱንካንያ ቦላና ካማናዉ ዶርሳ ኦርግያ ጋልባ ዞኦ ቃላምያን የግ ከሴዳዋ ጊግሳ፤ ቃይ አ ቦላና ካማናዉ ቁምእያ ሀራ ጋልባፐ ጊግሳ።

15 “ጾሳ ዱንካንያ ጻጋግያዋንታ ስት ጌዳ ኦዶሩዋፐ ከሳ። 16 እት እት ጻጋግያዉ ጌሳይ ታሙ ዋꬋ፥ ጎምፓይ እት ዋꬋነ ባጋ ግዶ። 17 እት እት ጻጋግያዉ እቱዋ እቱዋና ጋꬅ ኦይꬅያ ላኡ ፖꬃ መꬋ። ጾሳ ዱንካንያ ጻጋገቱዋ ኡባካ ሄዋዳን ኪተታ፤ 18 ጾሳ ዱንካንያዉ ገድሳ ባጋና ላታሙ ጻጋግያዋ መꬋ። 19 እት እት ጻጋግያዉ ላኡ ፖꬃይ ገልያ ኦይታሙ ሉኩዋ፥ ኡባካ ብራፐ ጊግሳ። 20 ጾሳ ዱንካንያዉ ሁጲሳ ባጋና፥ ላታሙ ጻጋግያዋ መꬋ። 21 እት እት ጻጋግያዉ ላኡ ገደቱ፥ ሙለ ኦይታሙ ገደቱ፥ ብራፐ ጊግኖ። 22 ቃይ ጾሳ ዱንካንያዉ ጉየ ጋጻን አዋይ ዉልያ ባጋና ኡሱፑን ጻጋግያ መꬋ። 23 ጉየን ደእያ ጋጻቶ ላኡ ጻጋግያ ጊግሳ። 24 ሄዋ ድራዉ፥ እት ጻጱዋን ላኡ ፖꬃ ጊጋ ጼራ ጋካናዉ እታ ግድ ምግዱዋን ኦይቀታናዉ በሴ፤ ላኡ ጋጻ ኦይꬅያ ጻጋጋቱካ ሀራ ጻጋጊ ኦሰቶዋዳን ኦሰታናዉ በሴ። 25 ሄዋ ድራዉ እት እት ጻጋግያዉ ጋርሳና ላኡ ላኡ ፖꬃይ ገልያ ሉካቱ ደኢኖ፤ ኡባና ሆስፑን ጻጋገቱነ ብራፐ ኦሰቴዳ ታማነ ኡሱፑን ፖꬃይ ገልያ ሉካቱ ደኢኖ።

26 “ቃይ ኦዶሮቱዋፐ ቱቁመትያ ሜጋ ከሳ። ጾሳ ዱንካንያዉ እት ባጋ ምይያን ደእያ ጻጋገቶ እቼሹ ቱቁመትያ ሜጋ፥ 27 ቃይ የንኮ ባጋ ምይያን ደእያ ጻጋገቶ እቼሹ ቱቁመትያ ሜጋቱዋ ጊግሳ። ሄዋዳንካ፥ ጾሳ ዱንካንያዉ ጉየ አዋይ ዉልያ ባጋና ዉርሰꬃ ጋጻን ደእያ ጻጋገቶ እቼሹ ቱቁመትያ ሜጋ መꬋ። 28 ግዶ ቱቁመትያ ሜጋይ ጻጋገቶ ግዶ ሄራና ሀ ጋጻፐ ያ ጋጻ ጋካናዉ ፕን ከሳናዉ ኮሼ። 29 ጻጋገቱዋ ዎርቃን ሼሻደ፥ ቱቁመትያ ሜጋቱ አꬍያ ሳጋየቱዋ ዎርቃፐ መꬋ፤ ቃይ ቱቁመትያ ሜጋቱዋካ ዎርቃን ሼሻ። 30 ጾሳ ዱንካንያ ታን ኔና ደርያ ቦላን በሴዳዋዳን ኦꬃደ ቶካ።

31 “ሳሉዋ ማላትያ፥ ኦቻ ቴራ ማላትያነ ሾሎላ ዞኦ ቃጭናፐነ ሊቆ ሊኑዋፐ እት ጋርዱዋ ኪተታ፤ ሄ ጋርዱዋ ቦላ እት ሂላን ክሩበቱዋ ምስልያ ስክሳ። 32 ያታደ ዎርቃን ሼሼዳ ኦይዱ፥ ኦዶሩዋ ቱሳቱዋን ደእያ ዎርቃፐ ኦሰቴዳ ካቂያዋን ካቃ። ሄ ኦይዱ ቱሳቱ ብራፐ መꬌዳ ኦይዱ ፖꬃይ ገልያሳን ገልኖ። 33 ሄ ጋርዱዋ ጾሳ ዱንካንያ ካራን ደእያ ኦይቂያዋንቱፐ ጋርሳና ካቄዳ፥ ቃላ ጫቁዋ ታቦታ ጋርዱዋፐ ጉየ ባጋን ዎꬃ፤ ያቶፐ ሄ ጋርዱ ጌሻ ሳኣ ኡባፐ አꬌዳ ጌሻ ሳኣፐ ሻካና። እብራ. 6:19፤ 9:3-5 34 አቶ ግያ ሳኣ ቁምእያ ኡባፐ አꬌዳ ጌሻ ሳኣን ደእያ ቃላ ጫቁዋ ታቦታ ቦላ ዎꬃ። 35 ጻርጴዛ ጋርዱዋፐ ካረና፥ ጾሳ ዱንካንያን ጌሻ ሳኣ ግዱዋን ሁጲሳ ባጋን ዎꬃ፤ ጾምፕያ ዎꬅያ ባላ ቃይ አ ባጋን ገድሳ ባጋና ዎꬃ።

36 “ዱንካንያ ገልያ ፐንግያዉ ሳሉዋ ማላትያ፥ ኦቻ ቴራ ማላትያነ ሾሎላ ዞኦ ቃጭናፐነ ሊቆ ሊኑዋፐ ጽልፕያን አሌቅስያዋን ኦሰቴዳ ጋርዱዋ መꬋ። 37 ጋርዱዋ እቼሹ ቱሳቱዋ ኦዶሮቱዋፐ ከሳደ፥ ዎርቃን ሼሻ፤ ካቂያዋንቱካ ዎርቃፐ ኦሰቴዳዋንታ ግድኖ፤ ቱሳቶ ናሃስያ ብራታፐ ትጋደ እቼሹ ፖꬃቱ ገልያዋ መꬋ።