1 “ኦዶሩዋፐ ያርሽያ ሳኣ ኬጻ። ሄ ያርሽያ ሳአዉ ጌሳይ እቼሹ ዋꬋ ግዶ፤ ጎምፓይነ እት ልከ፥ እቼሹ እቼሹ ዋꬋ፤ ꬎቃተꬃይ ሄዙ ዋꬋ፥ ኦይዱ ጋጻና ደኦ። 2 ዉርሰꬃ ጋጻን ጋጻን እት እት ካጭያ መꬋ፤ ካጨቱ ያርሽያ ሳኣና እትፐ ኦይቀቲደ መትኖ። ያታደ ያርሽያ ሳኣ ናሃስያ ብራታን ሼሻ። 3 አን ጎኤትያ ሚሻቱዋ፥ ብድንꬃ ከስያ ባልደቱዋ፥ አካፋቱዋ፥ ሱꬃ ትግያ ኩይጻሮቱዋ፥ ቃጲያ፥ ሴልያባ ኦይቂያ ሚሻ ናሃስያ ብራታፐ መꬋ። 4 ያታደ ናሃስያ ብራታፐ ዛዝርያ መꬋ፤ ቃይ አ ኦይዱ ጋጻን ኦይዱ ሳጋየቱዋ መꬋ። 5 ያታደ ያርሽያ ሳአዉ ግዶ ባጋን ኦይꬃደ ዎꬃ 6 ኦዶሩዋፐ ያርሽያ ሳአዉ ካሶቱዋ ከሳደ፥ ናሃስያ ብራታን ሼሻ። 7 ያርሽያ ሳኣ ቶክያ ዎደ ማዳና ማላ፥ ሄ ካሱዋ ላኡ ምይያና ደእያ ሳጋየቱዋን አꬃ። 8 ታን ኔና ደርያ ቦላን በሴዳዋዳን፥ ያርሽያ ሳኣ ጻዉላፐ መꬊደ፥ ጎምፓ መላ ከስኖ።

9 “ጾሳ ዱንካንያዉ አሳይ ሺቅያ ዳባባ ጊግሳ። ዳባባይ ገድሳ ባጋና ጼቱ ዋꬋ አዱቆ፤ ሄ ዳባባዉ ሊቆ ሊኑዋፐ ዳደቴዳ ጋርዳቱዋ ጊግሳ። 10 አዉ ናሃስያ ብራታፐ ላታሙ ቱሳቱዋነ ቱሳቱ ኤቂያ ላታሙ ፖꬃይ ገልያ ሉኩዋ ኦꬃ፤ ኡንቱንቱ ሁጲያን ቃይ ብራፐ ካቂያዋንታነ ቱሳቱዋ ሁጲያን ቃችያዋንታ ኦꬃ። 11 ሄዋዳንካ፥ ዳባባዉ ሁጲሳ ባጋና ጼቱ ዋꬋ አዱቆ፤ ቃይ ላታሙ ቱሳቱዋናነ ሄ ቱሳቶ ላታሙ ናሃስያ ፖꬃይ ገልያ ሉኮቱዋና ደእያ ጋርዱ ደኦ። ያቲደ ብራፐ ኦሰቴዳ ካቂያዋንቱነ ቱሳቱዋ ሁጲያን ቃችያዋንቱ ዳባባዉ ደእኖ።

12 “ዳባባዉ አዋይ ዉልያ ባጋ ጎምፓይ እሻታሙ ዋꬋ አኮ፤ ታሙ ቱሳቱነ፥ ቱሳቶ ታሙ ፖꬃይ ገልያ ሉካቱ ደእያ ጋርዶቱ አዉ ደእኖ። 13 ቃይ አዋይ ዶልያ ባጋ ዳባባ ጎምፓይካ እሻታሙ ዋꬋ ግዶ። 14 ዳባባ ገልያ ሳኣፐ አዋይ ዶልያ ባጋና ታማነ እቼሹ ዋꬋ አዱቂያ ጋርዶቱ ደእኖ፤ ኡንቱንቶ ሄዙ ቱሳቱነ ሄዙ ፖꬃይ ገልያ ሉኮቱ ደእኖ። 15 ሄዋዳንካ፥ ህንኮ ባጋና ጋርዶቱ ታማነ እቼሹ ዋꬋ አዱቂያ ጋርዶቱ ደእኖ፤ ኡንቱንቶ ሄዙ ቱሳቱነ ቱሳቶ ሄዙ ፖꬃይ ገልያ ሉኮቱ ደእኖ።

16 “ዳባባ ገልያ ሳአዉ ላታሙ ዋꬋ አዱቂያ ጋርዱዋ ጊግሳ፤ ሄዌካ ሳሉዋ ማላትያ፥ ኦቻ ቴራ ማላትያነ፥ ሾሎላ ዞኦ ቃጭናፐነ ሊቆ ሊኑዋፐ ዳደቴዳዋ፥ ጽልፕያን አሌቅስያዋን ጊግሳ። ኦይዱ ቱሳቱዋነ ቱሳቶ ኦይዱ ፖꬃይ ገልያ ሉኮቱዋ ጊግሳ። 17 ዳባባ ዩሹዋን ደእያ ቱሳቱዋ ኡባዉ ብራፐ ኦሰቴዳ ቃችያዋንቱነ ካቂያዋንቱ፥ ናሃስያፐ ኦሰቴዳ ፖꬃይ ገልያ ሉኮቱ ደእኖ። 18 ዳባባይ አዱሳተꬃይ ጼቱ ዋꬋ፥ ጎምፓይ እሻታሙ ዋꬋ ግዶ፤ ፑድያ እቼሹ ዋꬋ ꬎቂያ ሊቁዋን ዳደቴዳ ሊኑዋፐ ኦሰቴዳ ጋርዶቱ ደእኖ፤ ያቲደ ቱሳቱዋ ናሃስያፐ ኦሰቴዳ ፖꬃይ ገልያ ሉኮቱ ግድኖ።

19 “ጾሳ ዱንካንያን ኦꬅያ ኦሶ ጎኤትያ ሚሻ ኡባይ፥ ኡንቱንቱ ጎአይ አያ ግዶፐነ፥ ጾሳ ዱንካንያ ꬎገቱ ኡባናነ ዳባባ ꬎገቱ ኡባናካ ጉጅና፥ ናሃስያ ብራታፐ መቲኖ።

20 “ጾምፒ ቶኤናን ኤጺደ ደአና ማላ፥ አዉ ኮሽያ ጽሎ ዛይትያ ዎጋራ ቴራ ጫዲደ ጉምእና ከሴዳዋ ነዉ አሀና ማላ፥ እስራኤላቱዋ አዛዛ። 21 አሮነነ አ ናናይ፥ ጾምፒ ጾሳ ስንꬃን ቃሜዳ ሳአይ ዎንታና ጋካናዉ ፖአና ማላ፥ መꬍና ጎዳ ዱንካንያ ግዶን፥ ማርካተꬃ ታቦታ ስንꬃን ደእያ ጋርዱዋፐ ካረና ኤꬅኖ። ሀዌ እስራኤልያ አሳዉ መꬍናዉ ዎꬆ ዎጋ ግዲደ ደኦ።