1 “ነ እሻ አሮናነ አ ናና ናዳባ፥ አቢሀ፥ ኤልኣዛራነ እታማራ ኔኮ አሃደ፤ ኡንቱንቱ ቄሳቱዋ ግዲደ ታዉ ኦꬃና ማላ፥ እስራኤልያ አሳ ግዶፐ ኡንቱንታ ዱማያ። 2 አዉ ቦንቹዋነ ፑላ እማና ማላ፥ ነ እሻ አሮናዉ ቄሳተꬃ ማዮቱዋ ጊግሳ። 3 ታን አꬌዳ ኤራ እሜዳ ኩሽያ ሂላ ኤርያ አሳ ኡባ ጼሳደ፥ አሮናዉ ማዮቱዋ ጊግሳና ማላ ኦዳ፤ እ ቄሴ ግዲደ፥ ታዉ ኦꬃናዉ ዱማታናዋ። 4 ኡንቱንቱ ጊግሳና ማዮቱካ ሀዋንታ: ትራን ዎꬅያዋ፥ ኤፉድያ፥ አዱሳ ማዩዋ፥ አሌቀቲደ ዳደቴዳ አዱሳ ሻምጭያ፥ ሻሽያነ ሀራ ዳንጩዋ። ነ እሻይ አሮነነ አ ናናይ ቄሳቱዋ ግዲደ ታዉ ኦꬂደ ጌሻ ማዮቱዋ ማያና ማላ፥ ስክያዋንቱ ጊግሲኖ። 5 ኩሽያ ሂላ ኤርያዋንቱካ ሀ ማዮቱዋ ጊግሳናዉ ዎርቃ፥ ሳሉዋ ማላትያ፥ ኦቻ ቴራ ማላትያነ ሾሎላ ዞኦ ቃጭናነ ሊቆ ሊኑዋ ጎኤትኖ።

6 “ኤፉድያ ጌተትያ ማዩዋ ዎርቃፐ፥ ሳሉዋ ማላትያ ቃጭናፐ፥ ኦቻ ቴራ ማላትያ ቃጭናፐ፥ ሾሎላ ዞኦ ቃጭናፐነ ሊቆ ሊኑዋ ቃጭናፐ ኩሽያ ሂላንቻቱ አሌቂሲደ ጊግሲኖ። 7 ላኡ ባጋይ ጋከቲደ እቱዋ ግዳና ማላ፥ ላኡ ሀሽያ ቦላ ጋꬂደ ኦይꬅያ ጫርቂ ደኦ። 8 ሂላንቻይ አሌቂሲደ ዳዴዳ ዳንጩካ ኤፉድያና እታ ግዲደ፥ ዎርቃፐ፥ ሳሉዋ ማላትያ፥ ኦቻ ቴራ ማላትያነ ሾሎላ ዞኦ ቃጭናፐነ ሌእስ ባቄዳ ሊኑዋፐ ኦሰቶ።

9 “ማርግድያ ጌተትያ ላኡ ሹቻቱዋ አሃደ፥ እስራኤልያ ናናቱዋ ሱንꬃ ኡንቱንቱ ቦላ ዎጫደ ጻፋ። 10 ኡንቱንቱ የለታ ማራዳን እት ሹቻ ቦላ ኡሱፑን ሱንꬃ፥ ህንኮ ሹቻ ቦላ ቃይ አቴዳ ኡሱፑናቱዋ ሱንꬃ ዎጫደ ጻፋ። 11 ማታፋ ቦላ ሱንꬃ ዎጪደ ጻፍያዋዳን፥ ሄ ላኡ ሹቻቱዋ ቦላ እስራኤልያ ናናቱዋ ሱንꬃ ዎጫደ ጻፋ፤ ሄ ሹቻቱዋ ዎርቃፐ መꬌዳ ሹቻ ኦይቂያዋ ቦላ ዎꬃ። 12 ያታደ ታማነ ላኡ እስራኤልያ ዘረꬃ ሀሳይያዋ ግዳና ማላ፥ ሀ ላኡ ሹቻቱዋ ኤፉድያና ኦይꬄዳ ሀሽያ ጫርቂያን ዎꬃ፤ ያቶፐ መꬍና ጎዳ ስንꬃን ኡባደ ቆፈታና ማላ፥ ሀ ሱንꬃቱዋ አሮነ ባረ ሀሽያን ቶኮ። 13 ሄ ሹቻቱዋ ኦይቂያዋ ዎርቃፐ መꬋ። 14 ቃይ ዋላካይ ባይና ዎርቃፐ ዎዶሩዋዳን ዶቄዳ ላኡ ሳንሳላታቱዋ ጊግሳደ፥ ሄ ላኡ ሹቻ ኦይቂያዋንቱና ጋꬃ ኦይꬃ።

15 “ጾሳ ሸኒ አየንቶ ኦቺደ ኤርያ ትራን ዎꬅያዋ ኩሽያ ሂላንቻን ኦስሳ። ሄ ትራን ዎꬅያዋ ኤፉድያ ዳዴዳዋዳን፥ ዎርቃፐ፥ ሳሉዋ ማላትያ፥ ኦቻ ቴራ ማላትያነ ሾሎላ ዞኦ ቃጭናፐነ ሊቆ ሊኑዋፐ ዳዳ። 16 አዉ ኦይዱ ጋጻይ ደኤ፤ ጌሳይካ ጎምፓይ እት እት ታካ ግዲደ ዳኮቶ። 17 ሄዋፐ ጉይያን አ ቦላ ኦይዱ ማራን አልኦ ሹቻቱዋ ዎꬃ፤ ኮይሮ ማራን ዎꬄዳ ሹቻይ፥ ሳርድዮና፥ ቶጳዝዮንያነ ጶልያ እንቁዋ። 18 ላኤንꬆ ማራን ባሉርያ፥ ሳምፔርያነ አልማዝያ ግያ አልኦ ሹቻቱዋ፤ 19 ሄዘንꬆ ማራን ያክንትያ፥ ከልቀዶንያነ አመተስጽኖስያ፤ 20 ኦይደንꬆ ማራን ብራል፥ ማርግድያ፥ ያስጲድያ። ሀዋንቱ ኡባይ ዎርቃፐ ኦሰቴዳ ሹቻ ኦይቂያዋ ቦላ ኡትኖ። 21 እስራኤልያ ናናቱዋ ሱንꬃ ፓይዱዋዳን፥ ሹቻቱዋ ፓይዱካ ታማነ ላኡዋ ግድኖ፤ እቱ እቱ ማታፋዳን ዎጨቲደ፥ ታማነ ላኡ ዛራቱዋ ሱንꬃይ ሄ ሹቻቱዋን ጻፈቶ።

22 “ትራን ዎꬅያዎ ዎዶሩዋዳን ዶቀቴዳ ሳንሳላታ ዋላካይ ባይና ዎርቃፐ መꬋ። 23 ላኡ ዎርቃ ምግዳቱዋ መꬋደ፥ ትራን ዎꬅያዎ ቆሞ ጋጻ ጋꬃደ ኦይꬃ ዎꬃ። 24 ሄ ላኡ ዎርቃ ሳንሳላታቱዋ ትራን ዎꬅያዎ ጋጻን ደእያ ምግዶቱዋና ጋꬃደ ኦይꬃ። 25 ሄ ሳንሳላታቶ የንኮ ባጋ ጼራ ቃይ ኤፉድያዉ ስንꬃ ባጋና፥ ሀሽያ ጫርቂያን ደእያ ሹቻ ኦይቂያዋንቱና ጋꬃ ቃቻ። 26 ቃይካ ላኡ ዎርቃ ምግዳቱዋ መꬋደ፥ ኤፉድያፐ ጋርሳን ካሊደ ደእያ ትራን ዎꬅያዎ ሶ ባጋና ደእያ ላኡ ጋጻ ጼራን አꬃ። 27 ሄዋዳንካ፥ ዎርቃፐ ሀራ ላኡ ምግዳቱዋ መꬋደ፤ ኤፉድያዉ ስንꬃ ባጋና፥ ሀሽያ ጫርቂያፐ ጋርሳ ባጋና፥ ኤፉድያ ጼሳን ቃችያዋፐ ቆሞና፥ ስኩ ጋከቴዳ ሳኣ ማታን ካረና ኡንቱንታ ኦይꬃ። 28 ትራን ዎꬅያዋን ደእያ ምግዳቱዋ ኤፉድያን ደእያ ምግዶቱዋና ጋꬂደ፥ ሳሉዋ ማላትያ ባቀꬃን ቃቻ፤ ያቶፐ፥ ትራን ዎꬅያዌ ጼሳፐ ቆሞና ደእያ ድራዉ፥ ቃሹ ሾልኤና።

29 “አሮነ ጌሻ ሳኣ ገልያ ዎደ፥ ሀ ትራን ዎꬅያ መꬍና ጎዳ ሸንያ በስያዌ ደእያ እስራኤልያ ዛራቱዋ ሱንꬃቱዋ ቶኮ። ያቶፐ ታን መꬍና ጎዳይ ኡባደ ታ አሳ ሀሳያና። 30 ቃይ ኡሪምያነ ቱሚምያ ጌተትያዋንታ ትራን ዎꬅያዋን የጋ። አሮነ መꬍና ጎዳ ስንꬃ አꬊደ፥ ባረ ትራን ዎꬅ አኪደ ገሎ። ታ ሸኒ አየንቶ እስራኤልያ አሳ ኤርሳና ማላ፥ እ ታ ስንꬃን ኦꬃናዉ ገልያ ዎደ ኡባን ባረ ትራ ኪስያፐ ꬋይሶፖ።ፓይ. 27:21፤ ዛረ. 33:8፤ እዝራ 2:63፤ ናህ. 7:65

31 “ኤፉድያፐ ጋርሳና ማይያ አዱሳ ማዩዋ ኡባ ሳሉዋ ማላትያ ጫርቂያፐ ጊግሳ። 32 ሄ አዱሳ ማዮ ቆꬍያ አꬅያ ሳኣ መꬋ። ሄ ሳአይ ፔተናዳን፥ ዩሻ አꬃደ ጉጃ ጉጃ ስካ። 33 አዱሳ ማዩዋ ዱገ ባጋ ማጫራ ዩሹዋን ሳሉዋ ማላትያ፥ ኦቻ ቴራ ማላትያነ ሾሎላ ዞኦ ሮማንያ አይፍያ ቴራ ምስለቱዋ መꬋ። ያታደ ኡንቱንቱ ግዱዋን ዎርቃፐ ኦሰቴዳ ዳዋላቱዋ ዋላካን ኦꬃ። 34 ዎርቃ ዳዋላቱነ ሮማንያ ቴራ ምስለቱ ሄ አዱሳ ማዩዋ ዱገ ባጋ ጼራዉ ዩሹዋን ዋላካን አꬍኖ። 35 አሮነ ቄሳተꬃን ኦꬅያ ዎደ፥ ሀ አዱሳ ማዩዋ ማዮ፤ መꬍና ጎዳ ስንꬃ ጌሻ ሳኣ ገልያ ዎደነ ከስያ ዎደ፥ ዳዋላይ ዋሳና። ሄዋ ድራዉ እ ሀይቀና።

36 “ዋላካይ ባይና ዎርቃፐ እት አሌቁዋ መꬋደ ማታፋ ቦላ ዎጭያዋዳን፥ አ ቦላ ዎጫደ፥ ‘መꬍና ጎዳዉ ጌሻ ግዲደ ዱማቴዳ’ ያጋደ ጻፋ። 37 ሁጲያን ጻጽያ ሻሽያፐ ጻደና ዴሙዋን ቃቻና ማላ፥ ሳሉዋ ማላትያ ባቀꬃ አን አꬃ። 38 አሮነ አ ባረ ዴሙዋን ዎꬆ፤ ሄዋን እስራኤልያ አሳይ መꬍና ጎዳዉ ጌሻ ያርሾ እምያዋን ፓጫይ ደኦፐ፥ ሄ ባይዙዋ አሮነ ቶኬ። አሳይ አህያዋ ኡባ መꬍና ጎዳይ አካና ማላ፥ እ ሄዋ ኡባ ገደካ ባረ ደሙዋን ዎꬃናዉ ኮሼ።

39 “አሮና አዱሳ ሻምጭያ ሊቆ ሊኑዋፐ ዳዳ፤ ሁጲያን ጻጽያ ሻሽያካ ሊኑዋፐ ጊግሳ። ቃይ ዳንጩዋ ጽልፕያን አሌቅስያዋን ስክሳ። 40 አሮና ናናዉ ቦንቾነ አሌቆ ግዳና ማላ፥ አዱሳ ሻምጭያ፥ ዳንጮቱዋነ ሁጲያን ጻጽያ ሻሸቱዋ ጊግሳ። 41 ኔን ሀ ማዮቱዋ ነ እሻ አሮናነ አ ናና ማይዜዳዋፐ ጉይያን፥ ኡንቱንታ ቄሰተꬃን ሱንꬃደ ታዉ ኦꬃና ማላ ኦካደ ዱማያ።

42 “ኡንቱንቱ ካሉ ካመታና ማላ ጋርሳና ማይያ ማዩዋ፥ ጼሳፐ ቢደ ዎድርያ ጋካናዉ ካምያዋ፥ ሊቆ ሊኑዋ ቃጭናፐ ዳዳደ ጊግሳ። 43 አሮነነ አ ናናይ ጾሳ ዱንካንያ ገልያ ዎደ፥ ዎይ ያርሹዋ ያርሽያ ጌሻ ሳኣን ቄሳተꬃን ኦꬃናዉ ሺቅያ ዎደ፥ ሀ ማዮቱዋ ማይኖ። ሄዋዳን ሀኖፐ፥ ኡንቱንቱ ባረንቱ ቦላ ባይዙዋነ ሀይቁዋ አህክኖ።

“ሀዌ አሮናዉነ አ ዛረቶ መꬍናዉ ዎጋ ግዶ።