1 “አሮነነ አ ናናይ ቄሳቱዋ ግዲደ ታዉ ኦꬃና ማላ፥ ኔን ኡንቱንታ ዱማያናዉ ሀዋዳን ኦꬃ፤ ትላ ቦላና ደእያ እት ኮሩማ፥ ላኡ ዶርሳ ኮለቱዋ አካ፤ 2 ሙሩታ ዛርጋ ꬊልያ አካደ፥ እርሹዋ የገናን ኡክꬃ ኡካ፤ ቃይ እርሹዋ የገናን ዛይትያን ኮምፑዋ ኮምፓ፤ ሄዋዳንካ፥ እርሹዋ የገናን ሌኦ ኡክꬃ ኡካደ፥ ዛይትያ ኦካ። 3 ኔን ኡንቱንታ ሳምፓን ዎꬃደ፥ ኮሩማናነ ላኡ ዶርሳ ኮለቱዋና እትፐ ታዉ ሺሻ።

4 “ያታደ አሮናነ አ ናና ጾሳ ዱንካንያ ፐንገ አሃደ፥ ሃꬃን ኡንቱንታ ሜጫ። 5 ሄዋፐ ጉይያን ማዮቱዋ አካደ፥ አዱሳ ሻምጭያ፥ ኤፉድያ ጋርሳና ማይያ አዱሳ ማዩዋ፥ ኤፉድያነ ትራን ዎꬅያዋ አሮና ማይዛደ ኤፉድያ ሂላን ዳደቴዳ ዳንጩዋን ዳንጭሳ። 6 ሻሽያካ አ ሁጲያን ጻጻደ፥ ‘ጾሳዉ ጌሻ ግዲደ ዱማቴዳ’ ያግያዌ ጻፈቴዳ አሌቁዋ ስንꬃ ደሙዋን ሻሽያ ምይያን አꬃ። 7 ኦክያ ዛይትያካ አካደ፥ አ ሁጲያን ትጋደ ኦካ። 8 አ ናናካ አሃደ አዱሳ ሻምጭያ ማይዛ። 9 ሻሽያካ ኡንቱንቱ ሁጲያን ጻጻ። ሄዋፐ ጉይያን አሮናነ አ ናና ዳንጩዋ ዳንጭሳ። ቄሳተꬃይ ኡንቱንቶ መꬍና ዎጋ ግዶ። ስም አሮናነ አ ናና ያታደ ቄሳቱዋ ኦꬃሳ።

10 “ኮሩማ፥ ጾሳ ዱንካንያ ስንꬃ ኔን አህና፥ አሮነነ አ ናናይ አ ሁጲያን ባረንቱ ኩሽያ ዎꬂኖ። 11 ኮሩማ፥ መꬍና ጎዳ ዱንካንያ ገልያ ፐንግያን መꬍና ጎዳ ማታን ሹካ። 12 ኮሩማ ሱꬃፐ አማሬዳዋ ነ ብራꬍያን አካደ፥ ያርሽያ ሳኣ ቦላ ደእያ ካጨቱዋ ኦክሽን አቴዳዋ ያርሽያ ሳኣፐ ጋርሳ ባጋና ጉሳ። 13 ሄዋፐ ጉይያን ቃንꬃ አሹዋ ካሜዳ ሞꬍያ ኡባ፥ ትርያ ጼራ ቦላ ደእያ ሞꬍያ፥ ላኡ ክላሆቱዋነ ኡንቱንታ ካሜዳ ሞꬍያ አካደ፥ ያርሽያ ሳኣ ቦላ ጹጋ። 14 ሽን ኮሩማ አሹዋ፥ አ ጋልባነ አ ማራጭያን ደእያ ቶጪያ አሳይ ኡቶ ሄራፐ ሃሳደ ጹጋ፤ ሄዌ ናጋራ ድራዉ ያርሽያ ያርሹዋ።

15 “ላኡ ዶርሳ ኮለቱዋፐ እቱዋ ኔን አክና፥ አሮነነ አ ናናይ ባረንቱ ኩሽያ አ ሁጲያን ዎꬅኖ። 16 ያቶፐ ዶርሳ ኮልያ ሹካደ፥ ሱꬃ ያርሽያ ሳኣ ምይያን ኡባ ሳኣን ፑሻካ። 17 ዶርሳ ኮልያ አሹዋ ቃንጸሬꬃደ፥ ቃንꬃ አሹዋካ ገድያ ሜጫደ ሁጲያ ቦላነ ሀራ ቆሞ አሾቱዋ ቦላ ኡንቱንታ ዎꬃ፤ 18 ሄዋፐ ጉይያን፥ ዶርሳ ኮልያ ኡባና ያርሽያ ሳኣን ጹጋ፤ ሄዌ መꬍና ጎዳዉ ጹገትያ ያርሹዋ፥ ሳዉዋ ቶሽኩ ግያ ያርሹዋነ መꬍና ጎዳዉ ታማን ያርሽያ ያርሹዋ። ኤፈ. 5:2፤ ፕልጵ. 4:18

19 “ቃይ የንኮ ዶርሳ ኮልያ አሮነነ አ ናናይ ባረንቱ ኩሽያ አ ሁጲያን ዎꬃና ማላ ኔን አሀ። 20 ሄ ዶርሳ ኮልያ ሹካደ፥ አ ሱꬃፐ አማሬዳዋ አካደ፥ አሮናዉነ አ ናናዉ ኡሸቻ ሀይꬃቱዋ ጼራ፥ ኡንቱንቱ ኡሸቻ ኩሸቶ ዎጋ ብራቱዋነ ኡንቱንቱ ኡሸቻ ገደቶ ዎጋ ብራቱዋ ኦካ፤ ሄዋፐ ጉይያን፥ አቴዳ ሱꬃ ያርሽያ ሳኣ ምይያን ኡባ ሳኣን ፑሻካ። 21 ያርሽያ ሳኣን ደእያ ሱꬃፐ አማሬዳዋነ ትግያ ዛይትያፐካ አማሬዳዋ አካ፥ አሮና ቦላነ አ ማዩዋ ቦላ፥ አ ናናቱዋ ቦላነ ኡንቱንቱ ማዩዋ ቦላ ፑሻካ። እነ አ ናናይ፥ ኡንቱንቱ ማዩ ጾሳ ኦሶ ዱማታናዋ።

22 “ሀ ዶርሳ ኮልያፐ ሞꬉዋ፥ ናስያ፥ ቃንꬃ አሹዋ ቦላ ደእያ ሞꬍያ፥ ትርያ ጼራ ቦላ ደእያ ሞꬍያ፥ ላኡ ክላሆቱዋ፥ ኡንቱንታ ካሜዳ ሞꬍያነ ኡሸቻ ባጋና ደእያ ጉየ ገድያ አካ፤ ሀዌ ቄሳተꬃ ሱንꬃ እምያ ዎደ ሹክያ ዶርሳ። 23 መꬍና ጎዳ ስንꬃን ዎꬄዳ እርሹ ገልቤና ኡክꬃ፥ ሳምፓፐ ዛይቲ ዋላከትቤና ኡክꬃ፥ ዛይትያና ኡኬዳ እት ኮምፑዋነ እት ሌኦ ኡክꬃ አካ። 24 ኔን ሀ ቁማ ኡባ አሮና ኩሽያንነ አ ናናቱዋ ኩሽያን ዎꬂደ ዉጻካናዳን ኦꬃ። ኡንቱንታ መꬍና ጎዳ ስንꬃን ፑደነ ዱገነ ቃꬅኖ። 25 ሄዋፐ ጉይያን ኡንቱንቱ ኩሽያፐ ሀዋንታ አካደ፥ ያርሽያ ሳኣ ቦላ ዎꬃደ፥ ጹግያ ያርሹዋና ጋꬃደ፥ መꬍና ጎዳዉ ሳዉዋ ቶሽኩ ጋናዳን፥ ያርሽያ ሳኣ ቦላ ታማን ጹጋ። 26 አሮነ ቄሳ ግዲደ ሱንትያ ዎደ ሹኬዳ ዶርሳ ኮልያ አንጎሱዋ አካደ፥ መꬍና ጎዳ ስንꬃን ቃꬅያ ያርሹዋዳን ቃꬃ፤ ሄዌ ኔና ጋክያ ነ ምያ ግሹዋ ግዳናዋ።

27 “ሄ ሹኬዳ ዶርሳ አሹዋ ቆሞቱዋፐ፥ ያርሹዋ ኦꬂደ ቃꬄዳ አንጎሱዋነ ጾሳ ስንꬃን ፑደ ቶኬዳ ገድያ ጌሻ፤ ሄዋንቱ አሮናዉነ አ ናናዉ ግሹዋ ግዳናዋንታ። 28 እስራኤላቱ መꬍና ጎዳዉ እምያ እትፐተꬃ ያርሹዋፐ ቃꬅያ ባጋዉ ዎጋይ፥ ኡባ ገደካ እስራኤልያ አሳፐ ሺቆደ አሮናዉነ አ ናናዉ ጋክያ ግሹዋ ግዶ።

29 “አሮና ቄሳተꬃ ጌሻ ማዩ አ ሀይቁዋፐ ጉይያን አ ዛረቶ ደኦ፤ ኡንቱንቱ ቄሳቱዋ ካፑዋ ግድያ ዎደ ሀ ማዩዋ ኦከታናዉነ ዱማታናዉ ማይኖ። 30 አ ናናቱዋፐ አ ሳኣን ቄሳቱዋ ግዲደ፥ ጌሻ ሳኣን ኦꬃናዉ ጾሳ ዱንካንያ ይያ ናአይ፥ ሄ ማዩዋ ላፑን ጋላሳዉ ማዮ።

31 “አሮነነ አ ናናይ ቄሳቱዋ ግዲደ ሱንትያ ዎደ ሹከቴዳ ዶርሳ ኮልያ አሹዋ አካደ፥ ጌሻ ሳኣን ዶይሳ። 32 አሮነነ አ ናናይ ዶርሳ ኦርግያ አሹዋካ ማሶፍያን ደእያ ኡክꬃ ጾሳ ዱንካንያ ገልያ ፐንግያን ሚኖ። 33 ኡንቱንቱ ቄሳቱዋ ግዲደ ሱንታናዉነ ዱማታናዉ ናጋራይ አቶ ጌተታናዳን ያርሸቴዳ ሀ ያርሾቱዋ ሚኖ። ሽን ሄ ያርሾቱ ጌሻ ግዴዳ ድራዉ፥ ሀራ አሳይ ኦነ ሞፖ። 34 ቄስያ ግዲደ ሱንትያ ዎደ ሹኬዳ ዶርሳ ኮልያ አሹዋፐ ዎይ ኡክꬃፐ ዎንታ ጋካናዉ ፓላሂደ አቆፐ፥ ታማን ጹገቶ፤ ጌሻ ግዴዳ ድራዉ ሜተቶፖ።

35 “አሮነነ አ ናናይ ቄሳቱዋ ግዲደ ሱንትያ ዎደ ዎꬅያ ዎጋ ልከ ታን ኔና አዛዜዳዋዳን ኦꬃደ፥ ላፑን ጋላሳ ጋርሳን ፖላ። 36 ናጋራይ አቶ ጌተታናዳን ሀቼ ሀቼ ናጋራ ያርሹዋዳን እት ኮሩማ ያርሻ። ሄዋን ያርሽያ ሳኣ ጌሻ፤ ያታደ ያርሽያ ሳኣ ዱማያናዉ ኦካ። 37 ያርሽያ ሳኣ ናጋራ አቶ ግያ ዎጋ ላፑን ጋላሳን ፖላደ፥ አ ዱማያ። ያቶፐ ያርሽያ ሳአይ ጌሻ ኡባፐ እቱዋ ግዴዳ ጌሻ። አ ቦችያ ኡባይካ ጌያና።

38 “ያርሽያ ሳኣን ኔን ሀቼ ሀቼ ሺሻና ያርሹ ሀዋ። የለቶደፐ እት ላይꬃ ግዴዳ ላኡ ዶርሳ ኦርገቱዋ ያርሻ። 39 ዶርሳ ኮለቱዋፐ እቱዋ ዎንታ፥ ቃይ ላኤንꬁዋ ኦማርስ ያርሻ። 40 ኮይሮ ዶርሳ ማራና እት ኪሎ ግራመ ግዴዳ ሙሩታ ዛርጋ ꬊልያ እት ሊትሮ ጉምኤቴዳ ዛይትያን ሙናቃደ ያርሻ፤ እት ሊትሮ ዎይንያ ኤሳካ ኡሻ ያርሹዋ ኦꬃደ ያርሻ። 41 ላኤንꬆ ዶርሳ ኦርግያ ኦማርስ ያርሻደ ዎንታዋ ኬሻ፥ ꬊልያ፥ ዛይትያነ ዎይንያ ኤሳ ሺሻ። ሄዌ መꬍና ጎዳዉ ታማን ያርሸትያ፥ ሳዉዋ ቶሽኩ ግያ ያርሹዋ ግዳናዋ።

42 “ሀ ጹግያ ያርሹ ይያ የለታ ኡባን ጾሳ ዱንካንያ ገልያ ፐንግያን መꬍና ጎዳ ስንꬃን ፓጭ ባይናን ያርሸታናዉ ኮሼ። ታን ያን ህንተንቱና ጋከታደ፥ ኔናና ሃሳያና። 43 ቃይ ያን ታን እስራኤላቱዋና ጋከታናዉ፥ ታ ቦንቹካ ሄ ሳኣ ዱማ ሳኣ ከሳና።

44 “ሄዋ ድራዉ፥ ታን ጾሳ ዱንካንያነ ያርሽያ ሳኣ ዱማያና፤ ኡንቱንቱ ታዉ ቄሳቱዋ ግዲደ ታዉ ኦꬃና ማላ፥ አሮናነ አ ናና ታን ዱማያና። 45 ያታደ ታን እስራኤለቱዋ ግዶን ደአና፤ ቃይ ታን ኡንቱንቱ ጾሳ ግዳና። 46 ታን ኡንቱንቱ ግዶን ደአና ማላ፥ ግብጼፐ ኡንቱንታ ከሴዳ መꬍና ጎዳ ኡንቱንቱ ጾሳ ግድያዋ ኡንቱንቱ ኤራና። ኤ፥ ታን መꬍና ጎዳ ኡንቱንቱ ጾሳ።