1 “እጻና ጩዋይያ ሚሻ ኦዶሮቱዋፐ መꬋ፤ 2 አዉ ኦይዱ ጋጻይ ደኦ፤ አዱሳተꬃይ እት ዋꬋ፥ ጎምፓይ እት ዋꬋ፥ ጌሳይ ላኡ ዋꬋ ግዶ፤ ካጨቱካ አናና እቱዋ ግዲደ ኦይቀት መትኖ። 3 አዉ ቦላ ዶና፥ ኦይዱ ባጋ ኡባነ አ ካጨቱዋ ዋላካይ ባይና ዎርቃን ሼሻ፤ አ ዩሹዋንካ ዎርቃ ትገꬃ ዩሻ አꬃ። 4 ሄ ዎርቃ ትገꬃፐ ጋርሳና እጻና ጩዋይያ ሳጽንያዉ ዎርቃፐ ላኡ ሳጋየቱዋ መꬋ፤ ያታደ ያ ባጋናነ ሀ ባጋና ላኡዋ ላኡዋ ኦይꬃ። ሄዋንታ ቶክያ ዎደ ካሱዋ አꬃናዉ ማዳናሳ። 5 ካሶቱዋ ኦዶሮቱዋፐ ከሳደ፥ ኡንቱንታ ዎርቃን ሼሻ። 6 ሀ ያርሽያ ሚሻ ቃላ ጫቁዋ ታቦታ ስንꬃን ካቀቴዳ ጋርዱዋፐ ካረ ባጋና፥ ሄዋካ ታን ኔናና ጋከትያ ቃላ ጫቁዋ ታቦታ ቦላ ደእያ አቶ ግያ ሳኣ ቁምእያ ስንꬃን ዎꬃ።

7 “አሮነ ዎንታ ዎንታ ጾምፐቱዋ ጊግሳናዉ ይያ ዎደ፥ ሳዊያ እጻና ያርሽያ ሳኣን ጩዋዮ። 8 አሮነ ኦማርስ ጾምፐቱዋ ፖእስያ ዎደ፥ ዛረꬂደካ እጻና ጩዋዮ፤ ያቶፐ፥ እጻናይ መꬍና ጎዳ ስንꬃን ይያ የለታዉ ኡባደ ጩዋታና። 9 ሀ እጻና ጩውስያ ሚሻን ሀራ አይ እጻናነ፥ ዎይ ጹግያ ያርሹዋ፥ ዎይ ካꬃ ያርሹዋ ያርሾፓ፤ ኡሻ ያርሹዋካ አ ቦላ ትጎፖ። 10 አሮነ ላይꬃፐ እት ገደ ናጋራፐ ማረታናዉ ሹክያ መህያ ሱꬃ አኪደ፥ ሄ ያርሽያ ሳኣ ቦላ ደእያ ካጨቱዋ ቦላ ዎꬆ። ያቲደ ጌሽያ ዎጋ ፖሎ። ሀ ዎጋይ ስንꬃና ያና ዎደቱዋ ኡባን ላይꬃን ላይꬃን ፖለቶ። ሀ እጻናይ ጩውያ ሚሻይ መꬍና ጎዳዉ ዱማት ሎይꬅ ጌዬዳዋ ግዶ” ያጌዳ።

11 ሄዋፐ ጉይያን መꬍና ጎዳይ ሙሳ ሀዋዳን ያጌዳ፤ 12 “ኔን እስራኤልያ አሳ ፓይዱዋን አካናዉ ኡንቱንታ ፓይድያ ዎደ፥ እት እት ኡራይ ፓይደቲደ፥ ባረ ሸምፑዋ ዎዛናዉ መꬍና ጎዳዉ ሻሉዋ ጭጎ። ኔን ኡንቱንታ ፓይድያ ዎደ፥ ኡንቱንቱ ቦላ ቦሻይ ዬና። 13 ፓይዱዋን ገልያ አሳይ ሁጲያን ሁጲያን ዱንካንያን ኤረትያ ሚዛና ልክያን ብራ ጭጎ። እት እት ኡራይ ሀዋ መꬍና ጎዳዉ እሞታ ኦꬂደ እሞ። ከሳ 38:25-26፤ ማቶሳ 17:24 14 ፓይዱዋን ገልያ አሳይ ላይꬃይ ላታሙ ኩሜዳዌነ ሄዋፐ ቦላ ኡባይ፥ መꬍና ጎዳዉ እምያዋ አሆ። 15 ህንተንቱ ህንተንቱ ናጋራፐ ማረታናዉ መꬍና ጎዳዉ እሙዋ እምሽን፥ ዱሪካ ማንቁካ እት ልክያ እማናፐ አትና፥ ዱሪ ዳርሲደ ዎይ ማንቁ ላፈꬂደ እሞፖ። 16 ናጋራፐ ማረታናዉ ጭግያ ሻሉዋ እስራኤልያ አሳፐ አካደ፥ መꬍና ጎዳ ዱንካንያ ግዶ ኦሶ ፔሻ። ሀ ሻሉ ህንተንቱ ናጋራፐ ማረታናዉ፥ መꬍና ጎዳ ስንꬃን እስራኤልያ አሳዋ ሀሳይያዋ ግዳናዋ” ያጌዳ።

17 ሄዋፐ ጉይያን መꬍና ጎዳይ ሙሳ ሀዋዳን ያጌዳ፤ 18 “ሜቻ ከርያነ አ ዎꬅያዋ ናሃስያፐ መꬋደ ጾሳ ዱንካንያፐነ ያርሽያ ሳኣፐ ግዱዋን ዎꬃ፤ አን ሃꬃ ትጋ። ከሳ 38:8 19 አሮነነ አ ናናይ ባረንቱ ኩሽያነ ባረንቱ ገድያ ሜጨታና። 20 ኡንቱንቱ ሀይቀና ማላ፥ ጾሳ ዱንካንያ ገልያ ዎደ፥ አዉደነ ሄ ሃꬃን ሜጨትኖ። ቃይ መꬍና ጎዳዉ ታማን ያርሹዋ ያርሻናዉ ያርሽያ ሳኣ ማታ ሺቄዳ ዎደ፥ 21 ኡንቱንቱ ሀይቀና ማላ፥ ባረንቱ ኩሽያነ ባረንቱ ገድያ ሜጨትኖ። ሀዌ አሮናዉነ አ ዛረቶ፥ ይያ የለታ ኡባዉ መꬍናዉ ዎጋ ግዳናዋ” ያጌዳ።

22 መꬍና ጎዳይ ሙሳ ሀዋዳን ያጌዳ፤ ከሳ 37:29 23 “ሙሩታ ቅማመቱዋ፥ ሄዋንቱካ፥ ኡሱፑን ኪሎ ግራመ ጉክያ ካርቢያ፥ ሄዙ ኪሎ ግራመ ሳዊያ ቃራፋ፥ ሄዙ ኪሎ ግራመ ሳዊያ ጉንጨቻነ 24 ኡሱፑን ኪሎ ግራመ ዝምባኑዋ አካ። ሀ ኡባይካ ዱንካንያን ኤረትያ ሚዛና ልክያን ግዶ። ሄዋ ቦላካ ኦይዱ ሊትሮ ዎጋራ ዛይትያ ጉጃ። 25 ሀዋንታ ሽቱዋ ኦꬅያ ኤራን ዋላካደ፥ ሳዊያ ጌሻ ኦክያ ዛይተ ከሳ። 26 ያታደ ጾሳ ዱንካንያ፥ ቃላ ጫቁዋ ታቦታ፥ 27 ጻርጴዛነ አ ቦላ ዎꬅያ ሚሻ ኡባ፥ ጾምፕያ ዎꬅያ ባላነ አ ሚሻቱዋ፥ እጻና ጩዋይያ ሚሻ፥ 28 ጹግያ ያርሹዋ ያርሽያ ሳኣነ አን ደእያ ኡባ ሚሻቱዋ፥ ሜቻ ከርያነ አ ዎꬅያዋ ኦካ። 29 ኡንቱንቱ ሎይꬅ ጌሻ ግዳና ማላ፥ ኔን ኡንቱንታ ዱማያ፤ ኡንቱንታ ቦችያዌ ኡባይካ ጌሻ ግዳናዋ።

30 “ሄዋፐ ጉይያን አሮነነ አ ናናይ ቄሳቱዋ ግዲደ ታዉ ኦꬃና ማላ፥ ኡንቱንታ ኦካደ ዱማያ፤ 31 እስራኤልያ አሳዉ ሀዋዳን ያጋደ ኦዳ፤ ‘ሀዌ ይያ የለታዉካ ኦከትያ ታ ጌሻ ዛይተ ግዶ፤ 32 ሀ ዛይትያ አሳ ቦላን ጉሶፓ፤ ቃይ አይ ዛይቲካ ሄዋ ኦꬄዳ ልክያን ኦꬆፓ። እ ጌሻ ግዴዳ ድራዉ፥ ህንተንቱካ አ ጌሻባዳን ቆፕተ። 33 ሀዋ ማላ ሽቱዋ ጊግስያ ኡራይነ ቄሳቱዋ ግደና ሀራ አሳ ኦክያ ኡራይ ኦንነ ባረ አሳ ግዶፐ ቦሄቶ’ ያጋ” ያጌዳ።

34 ሄዋፐ ጉየ መꬍና ጎዳይ ሙሳ ሀዋዳን ያጌዳ፤ “ሳዊያ ቅማመቱዋ: ምꬃ ጮሻ፥ ꬋꬍያ ጎለን ደእያ ሽቱዋ፥ ሳዊያ ሽድያነ ሳዊያ ጌሻ እጻና አካ፤ ኡንቱንቱ ኡባ ዴጹካ እት ልከ ግዶ። 35 ሽቱዋዳን ዋላከቴዳ እጻና ኦꬃደ፥ ኡንቱንቱን ጎኤታ፤ ዋላካይ ባይናዋነ ጌሻ ግዳናዳን፥ አን ማጽንያ የጋ። 36 አፐ አማሬዳዋ አካደ ሊቅሳደ ጫዳ፤ ያታደ ታን ኔናና ጋከትያ ጾሳ ዱንካንያ ግዶን ቃላ ጫቁዋ ታቦታ ስንꬃን ዎꬃ። እ ነዉ ሎይꬅ ጌሻ ግዳናዋ። 37 ሀዋ መꬌዳዋ ልክያን ሀራ እጻና መꬎፕተ። ሄዌ መꬍና ጎዳዉ ዱማ ጌሻ ግድያዋ ኤርተ። 38 ሀዋ ማላትያዋ መꬊደ፥ አ ሳዉዋ ስንጊደ ናሸታናዉ ኮይያ ኡራይ ደኦፐ፥ እ ባረ አሳ ግዶፐ ቦሄቶ” ያጌዳ።