1 መꬍና ጎዳይ ሙሳ ሀዋዳን ያጌዳ፤ 2 “በአ፤ ታን ይሁዳ ዛረ ግዴዳ ሁራ ናኣ ናኣ፥ ኡራ ናኣ፥ ባጻልኤላ ዶራድ። 3 አ ታን ጾሳ አያናን፥ ሂላን፥ አኬካንነ ኦሱዋ ኡባ ኦꬅያ ኤራን ኩንꬃድ፤ 4 ሄዌካ ሂላን ኪታ ሀልቹዋ ከሲደ፥ ዎርቃፐ፥ ብራፐነ ናሃስያፐ ዱማ ዱማባ እ ኦꬃናሳ። 5 ሄዋዳንካ፥ ሹቻ ማሲደ ጊግሳናዳንነ፥ ምꬃ ማሳናዉ ሀራ ኦሱዋ ኡባ እ ኦꬃናሳ።

6 “ሄዋ ቦላካ ቃይ አ ማዳና ማላ፥ ዳና ዛረ ግዴዳ አህሳማካ ናኣ ኦሆልኣባ ሱንꬃድ። ታን ኔና አዛዜዳዋ ኡባ ኡንቱንቱ ኦꬃና ማላ፥ ኩሽያ ሂላ ኤርያዋንቶ ኡባቶ ኤራ እማድ። 7 ኡንቱንቱ ኦꬃናዉ: ጾሳ ዱንካንያ፥ ቃላ ጫቁዋ ታቦታ፥ አ ቦላ ዎꬅያ አቶ ግያ ሳኣ ቁምእያ፥ ጾሳ ዱንካንያ ግዶን ጎኤትያ ሚሻ ኡባ፥ 8 ጻርጴዛነ አ ሚሻቱዋ፥ ጾምፕያ ዎꬅያ ባላ ዋላካይ ባይና ዎርቃፐ ኦሰቴዳዋነ አ ሚሻ ኡባና፥ እጻና ጩውስያ ሚሻ፥ 9 ጹግያ ያርሹዋ ያርሽያ ሳኣነ አ ሚሻ ኡባና፥ ሜጨትያ ከርያነ አ ዎꬅያዋና፥ 10 ዳደቴዳ ማዩዋ፥ ቄሳቱዋ ኡባቱዋ ካፑ አሮነ ማያና ጌሻ ቄሳተꬃ ማዮቱዋነ አ አቱማ ናናይ ቄሳተꬃ ኦꬂደ ማያና ማዩዋ፥ 11 ቃይ ኦከትያ ዛይትያነ ጌሻ ሳአዉ ሳዉዋ ቶሽኩ ግያ እጻና። ኡንቱንቱ ሀዋ ኡባ ታን ኔና አዛዜዳዋዳን ኦꬅኖ” ያጌዳ።

12 ሄዋፐ ጉይያን መꬍና ጎዳይ ሙሳ ሀዋዳን ያጊደ አዛዜዳ፤ 13 “እስራኤልያ አሳ ኔን፥ ‘ታ ሳምባታ ቦንችተ። ሄዌ ታን መꬍና ጎዳይ ህንተንታ ታዉ ጌሻ ኦꬃደ ዶሬዳዋ በስያዋ ግዲደ፥ ያና የለታ ኡባዉ ታፐነ ህንተፐ ግዱዋን ማላታ ግዳናዋ። 14 ህንተንቶ እ ጌሻ ግድያ ድራዉ፥ ሳምባታ ቦንችተ። አ ቱንስያዌነ ሄ ጋላሳን ኦꬅያ አሳይ ኡባይ አሳ ግዶፐ ሀይቁዋን ቦሄቶ። 15 ኡሱፑን ጋላሳቱዋን ኔን ኦሱዋ ኦꬃ፤ ሽን ላፑንꬃ ጋላሳይ መꬍና ጎዳዉ ዱማቴዳ ሸምፖ ሳምባታ፤ ሳምባታ ጋላሳን አይ ኦሶነ ኦꬅያ ኦንነ ሀይቆ። ከሳ 20:8-11፤ 23:12፤ 34:21፤ 35:2፤ ዎጋ 23:3፤ ዛረ. 5:12-14 16 እስራኤላቱ ሀ ሳምባታ ጋላሳ የለታፐ የለታዉ መꬍና ቃላ ጫቁዋ ኦꬂደ ቦንችኖ። 17 መꬍና ጎዳይ ኡሱፑን ጋላሳቱዋን ሳሉዋነ ሳኣ መꬌዳ ድራዉነ ቃይ ላፑንꬃ ጋላሳን ታን ኪታ አጋደ ሸምፔዳ ድራዉ፥ ታ ግዱዋንነ እስራኤላቱ ግዱዋን ሀዌ መꬍናዉ ማላታ ግዳና’ ያጋ” ያጌዳ። ከሳ 20:11

18 መꬍና ጎዳይ ሙሴዉ ሲና ደርያ ቦላን ሃሳይያዋ ዉርሴዳ ዎደ፥ ጾሳይ ባረ ብራꬍያን ጻፌዳ ታሙ አዛዙዋ ኦይቂደ ላኡ ማሰቴዳ ቃላ ጫቁዋ ሹቻቱዋ ሙሴዉ እሜዳ።