1 አሳይ ሙሴ ደርያፐ ዎናን ሎይꬅ ጋምኤዳዋ በኤዳ ዎደ፥ አሮና ዩሹዋን ሺቂደ፥ “ሃያ፤ ኔን ኑና ካለꬅያ ጾሳቱዋ ኑዉ መꬋ። ግብጼ ጋድያፐ ኑና ከሴዳ ሙሳ ግዶፐ፥ እ ዋኔደንቶነ ኑን ኤሮኮ!” ያጌድኖ። ኪታ 7:40 2 አሮነ ኡንቱንታ፥ “ህንተንቱ ማቻቱዋ ሀይꬃንነ ህንተንቱ አቱማ ናናነ ማጫ ናናቱዋ ሀይꬃን ደእያ ዎርቃ ከሲደ፥ ታዉ አኪደ አህተ” ያጌዳ። 3 ሄዋፐ ጉይያን አሳይ ኡባይ ባረ ሀይꬃ ዎርቃ ከሲደ፥ አሮናዉ አሄድኖ። 4 እ ሄዋ ኡንቱንቱ ኩሽያፐ አኪደ፥ ሲልሴዳዋፐ ጉይያን ቆጽያባን ቆጺደ፥ ማራ ማላትያ ኤቃ ኦꬂደ መꬌዳ።1 ካታ. 12:28፤ ኪታ 7:41

አሳይ፥ “እስራኤላቶ፥ ህንተንታ ግብጼ ጋድያፐ ከሴዳ ህንተንቱ ጾሳቱ ሀዋንታ” ያጌዳ። 5 አሮነ ሀዋ በኤዳ ዎደ፥ ሄ ማራ ስንꬃን ያርሽያ ሳኣ ግምቢደ፥ “ዎንታ መꬍና ጎዳ ባላ ጋላሳ ግዳናዋ” ያጊደ ኤርሴዳ። 6 ሄዋ ድራዉ፥ ዎንተꬃ ጋላስ አሳይ ጉራን ደንዲደ፥ ጹግያ ያርሹዋ ሺሼዳ፤ እትፐተꬃ ያርሹዋካ ያርሼዳ። ያቲደ አሳይ ማናዉነ ኡሻናዉ ኡቴዳ። ም ኡሽ ስሚደ፥ ቃይ ዱራናዉ ደንዴዳ። 1 ቆሮ. 10:7

7 ያንና መꬍና ጎዳይ ሙሳ፥ “ኔን ኤለካ ዱገ ዎꬋ፤ አያዉ ጎፐ፥ ነ አሳይ፥ ኔን ግብጼፐ ከሳደ አሄዳዌ ናጋራ ኦꬂደ፥ ባረንቱ ሁጲያ ቱንሴድኖ። 8 ታን ኡንቱንታ አዛዜዳ ኦግያፐ ኡንቱንቱ ኤለካ ሸርእ ጌድኖ። ዎርቃ ሲልሴዳ ማራ ማላትሲደ፥ ባረንቶ ኤቃ መꬊደ አዉ ጎይኔድኖ፤ አዉ ያርሼድኖ። ኡንቱንቱ፥ ‘እስራኤላቶ፥ ህንተንታ ግብጼ ጋድያፐ ከሴዳ ህንተንቱ ጾሳቱ ሀዋንታ’ ያጌድኖ” ያጌዳ።

9 መꬍና ጎዳይ ሙሳ፥ “ታን ሀ አሳ በኣድ፤ ኡንቱንቱ ሞርጊ ꬉሌፋቴዳ አሳ። 10 ሀእ ታ ሀንቁ ኡንቱንቱ ቦላ ኤጽ ከስና፥ ታን ኡንቱንታ ባይዛናዋ ኔን ታና ድጎፓ። ያታደ ታን ኔና ዎልቃማ ካዉተꬃ ኦꬃና” ያጌዳ።

11 ሽን ሙሴ መꬍና ጎዳ ባረ ጾሳ ሀዋዳን ያጊደ ዎሴዳ፤ “አቤት መꬍና ጎዳዉ ኔን ነ ዎልቃማ ዎልቃንነ ነ ምኖ ኩሽያን ግብጼፐ ከሳደ አሄዳ ነ አሳ ቦላ ነ ሀንቁ አያዉ ኤጽ ከስ?ፓይ. 14:13-19 12 ግብጼቱ፥ ‘ጾሳይ ኡንቱንታ ደረቱዋ ቦላን ዎꬋናዉነ ጋድያፐ ፕት ꬋይሳናዉ፥ ኢታ ሀልቹዋን ከሴዳ’ አያዉ ግኖ? ነ ያሽያ ሀንቁዋፐ ስማ፤ ነ አሳ ꬋይሳናዉ ቆፖዋ አጋ ባሻ። 13 ነ አይለቱዋ አብራሃማ፥ ይሳቃነ ያቆባ ሀሳያ፤ ኔን ኡንቱንቶ፥ ‘ታን ህንተንቱ ዛርያ ሳሉዋ ጾልንተቱዋዳን ዳርሳና፤ ሀ ታን ህንተንቶ እማና ጌዳ ጋድያ ኡባካ ህንተንቱ ዛርያዉ እማና፤ ኡንቱንቱ ሄ ጋድያ መꬍናዉ ላታና’ ጋደ ነ ሁጲያን ኔን ጫቄዳ ቃላ ሀሳያ” ያጌዳ። ዶመꬃ 22:16-17፤ 17:8 14 ሄዋ ድራዉ፥ መꬍና ጎዳይ ባረ አሳ ቦላ ኢታባ አሀናዉ ኦዴዳዋ አጊደ፥ ኡንቱንታ ማሬዳ።

15 ሄዋፐ ጉይያን ሙሴ ታሙ አዛዛቱ ኡንቱንቱን ጻፈት ኡቴዳ ላኡ ማርካተꬃ ሹቻቱዋ ባረ ኩሽያን ኦይቂደ፥ ደርያፐ ዱገ ዎꬌዳ። ሄ ሹቻቱ ላኡ ባጋናካ ጻፈቴድኖ። 16 ሄ ማሰቴዳ ሹቻቱዋ ጊግሴዳዌ ጾሳ፤ ሹቻ ቦላ ዎጪደ ጻፌዳዌካ ጾሳ።

17 ኢያሱ አሳ ጫቡዋ ስሴዳ ዎደ፥ ሙሳ ሀዋዳን ያጌዳ፤ “ዱንካኔዳ ሳኣን ኦላ ዋሱ ስሰቴ” ያጌዳ።

18 ሙሴ ዛሪደ፥ “ታን ስስያዌ ሀዌ የꬃፐ አትና፥ ጾኔዳዋንቱ ኮሻ ዎይ ጾነቴዳዋንቱ ኮሻ ግደና” ያጌዳ።

19 ሙሴ ዱንካኔዳ ሳኣ ማቴዳ ዎደ፥ ማራነ ዱሩዋ በኢደ ሎይꬅ ሀንቀቲደ ባረ ኩሽያን ኦይቆ ማርካተꬃ ሹቻቱዋ ደርያ ጻጱዋን ኦሊደ መንሬꬄዳ። 20 ኡንቱንቱ መꬌዳ ማራካ አኪደ፥ ታማን ጹጌዳ፤ ሄዋፐ ጉይያን ሊቃና ጋካናዉ ጋጪደ ሃꬃ ቦላ ላሊደ፥ እስራኤልያ አሳይ ኡሻናዳን ኦꬄዳ።

21 ሄዋፐ ጉይያን፥ ሙሴ አሮና፥ “ሀ አሳይ ኔና ዋትኔ ኔን ኡንቱንታ ሀዋ ማላ ዎልቃማ ናጋራዉ ካለꬄዳዌ?” ያጌዳ።

22 አሮንካ ዛሪደ፥ “ታ ጎዳዉ፥ ሀንቀቶፓ፤ ሀ አሳይ ኢታ ኦꬃናዉ አይ ኬሻ ኮይንቶ ኔን ኤራሳ። 23 ኡንቱንቱ ታና፥ ‘ኑና ካለꬅያ ጾሳቱዋ ኑዉ መꬋ። አያዉ ጎፐ፥ ሀ ኑና ግብጼፐ አሄዳ ሙሴ እ ዋኔደንቶነ ኑን ኤሮኮ!’ ያጌድኖ። 24 ታን ኡንቱንታ፥ ‘ህንተ ቦላ ደእያ ዎርቃ ከሲደ፥ ሀምተ’ ያጋድ። ሄዋፐ ጉይያን ኡንቱንቱ ታዉ እሜዳ ዎርቃ ታን ታማን የግና፥ ሀ ማራይ ከሴዳ” ያጌዳ።

25 አሮነ አሳ ገደ ጮ የድ አግና፥ አሳይ ባረ ሞርከቱዋ ስንꬃን ካዉሺደ ካቴዳዋ ሙሴ በኤዳ። 26 ሄዋ ድራዉ፥ ሙሴ ዱንካኔዳ ሳኣ ገልያ ፐንግያን ኤቂደ ሀዋዳን ያጌዳ፤ “መꬍና ጎዳ ባጋ ግዴዳ አሳይ ኦንነ ታኮ ዮ!” ያጌዳ። ሌዋቱ ኡባይ አኮ ሺቄድኖ።

27 ሄዋፐ ጉይያን እ ኡንቱንታ፥ “መꬍና ጎዳይ እስራኤልያ ጾሳይ ሀዋዳን ያጌ፤ ‘አሳይ ኡባይ ማሻ ባረ ጼሳን ጼሳን ዳንጮ፤ ዱንካኔዳ ሳኣን ጋጻፐ ጋጻ ጋካናዉ፥ ጉየዉነ ስንꬃዉነ ስመረቶ፤ እቱ እቱ ባረ እሻ፥ ባረ ላግያነ ባረ ሾሩዋ ዎꬎ ያጌ’ ” ያጌዳ። 28 ሌዋቱ ሙሴ አዛዜዳዋዳን ኦꬄድኖ፤ ሄ ጋላስ አሳፐ ሄዙ ሻኣ ኬሻይ ሀይቄዳ። 29 ሄዋፐ ጉይያን ሙሴ ሌዋቱዋ፥ “ሀቼ ህንተንቱ ጾሳዉ ዱማቴድታ፤ አያዉ ጎፐ፥ ህንተንቱ ህንተንቱ ናናነ ህንተንቱ እሻቱዋ ዎꬋናዉካ አዛዘቴድታ፤ ሀቼ መꬍና ጎዳይ ህንተንታ አንጃና” ያጌዳ።

30 ዎንትሳ ጋላስ ሙሴ አሳ፥ “ህንተንቱ ዎልቃማ ናጋራ ኦꬄድታ፤ ሽን ሀእ ታን መꬍና ጎዳኮ ፑደ ደርያ ከሳና፤ ህንተንቱ ናጋራ ታን አቶ ጊሳንታንቶነ” ያጌዳ። 31 ያትና ሙሴ መꬍና ጎዳኮ ስም ቢደ ሀዋዳን ያጌዳ፤ “ሀ አሳይ ዎልቃማ ናጋራ ኦꬄዳ፤ ኡንቱንቱ ባረንቶ ዎርቃፐ ጾሳቱዋ መꬌድኖ። 32 ሽን ሀያና፥ ሀእ ኡንቱንቱ ናጋራ አቶ ያጋ፤ ሄዌ ꬋዮፐ፥ ኔን ጻፌዳ ማዝጎብያፐ ታና ቁጫ” ያጌዳ። ማዝ. 69:28፤ ሳፃ 3:5

33 መꬍና ጎዳይ ዛሪደ ሙሳ፥ “ታን ታ ማዝጋባፐ ቁጫናዌ ታ ቦላ ናጋራ ኦꬄዳ አሳቱዋ ሱንꬃ። 34 ሀእ ባደ፥ ሀ አሳ ታን ነዉ ኦዴዳ ሳኣ ካለꬃ፤ ታ ኪታንቻይካ ኔና ካለꬃና፤ ሽን ታን ሙራናዉ ዎዲ ጋክና፥ ኡንቱንታ ኡንቱንቱ ናጋራ ድራዉ ሙራና” ያጌዳ።

35 አሮነ ዎርቃፐ ማራ ምስልያ መꬋናዳን አሳይ ኦꬄዳ ድራዉ፥ መꬍና ጎዳይ አሳ ቦላ ዎልቃማ ቦሻ የዴዳ።