1 ሄዋፐ ጉይያን መꬍና ጎዳይ ሙሳ ሀዋዳን ያጌዳ፤ “ኔንነ ኔን ግብጼፐ ከሴዳ አሳይ ሀ ሳኣፐ ደንድተ፤ ‘ታን ህንተንቱ ያራቶ እማና’ ያጋደ ዎꬄዳ ጋድያ ቢተ። ሄ ጋዲ ታን አብራሃመዉ፥ ይሳቃዉነ ያቆባዉ እማና ያጋደ ጫቃ ዎꬄዳ ጋድያ። ዶመꬃ 12:7፤ 26:3፤ 28:13 2 ታን ህንተንቱ ስንꬃን ኪታንቻ ኪታደ፥ ካናነቱዋ፥ አሞረቱዋ፥ ሂተቱዋ፥ ፓርዘቱዋ፥ ሂዌቱዋነ ያቡሳቱዋ የደርሳና። 3 ማꬃይነ ኤሳይ ጎግያ ሄ ጋድያ ቢተ። ሽን ህንተንቱ ሞርጊ ꬉሌፋቶ አሳ ግዴዳ ድራዉ፥ ታን ህንተንታ ኦግያን ꬋይሳናዉ፥ ህንተናና ቢከ” ያጌዳ።

4 አሳይ ሄ ያሽያ ኦዱዋ ስሲደ ሎይꬅ ዬኬዳ። ሄ ዎድያፐ ዶሚደ ኡባይካ ባረ አሌቁዋ አꬅያዋ አግ ባሼዳ። 5 አያዉ ጎፐ፥ መꬍና ጎዳይ ሙሳ ሀዋዳን ያግ ዎꬄዳ፤ “እስራኤልያ ሀዋዳን ያጋ፤ ‘ህንተ ሞርጊ ꬉሌፋቶ አሳ። ታን ህንተናና ሀራይ አቶ ጉꬃ ዎድያ ብንቶካ፥ ታን ህንተንታ ꬋይሳና። ሀእ ስም ህንተንቱ አሌቁዋ ከስ ድግተ፤ ያቶፐ ታን ህንተንታ ኦꬃናባ ቃቻና’ ያጋ” ያጌዳ። 6 እስራኤላቱ ሲና ደርያፐ ዶሚደ ባረንቱ አሌቆቱዋ ከስ ዎꬄድኖ።

7 ሙሴ ዱንካንያ አክ አፊደ፥ አሳይ ዱንካኖ ሳኣፐ ካረና ሃሲደ ꬎጌዳ። ሄ ዱንካኒ፥ “ጋከትያ ዱንካንያ” ጌተቲደ ጼሰቴዳ። መꬍና ጎዳ ኦቻናዉ ኮይያ ኡባይ ዱንካኖ ሳኣፐ ካረና ደእያ ጋከትያ ዱንካንያ ቤ። 8 ሙሴ ሄ ዱንካንያ ቤዳ ዎደ፥ አዉደነ አሳይ ኡባይ ደንዲደ፥ ባረ ዱንካንያ ፐንግያን ፐንግያን ኤቄ፤ ሙሴ ሄ ዱንካንያ ገላና ጋካናዉ አ ጼሌ። 9 ሙሴ ጋከትያ ዱንካንያ ግዶ ገሌዳ ዎደ፥ ሻርያ ቱሳይ ዱገ ዎꬌ፤ መꬍና ጎዳይ ሙሴና ሻርያፐ ሃሳይሽን፥ ሄ ዱንካንያ ፐንግያን ጋምኤ። 10 ሻርያ ቱሳ ሄ ዱንካንያ ገልያ ፐንግያን በኤዳ ዎደ ኡባን፥ አሳይ ኡባይ ባረ ዱንካንያ ፐንግያን ፐንግያን ጾሳዉ ጎይኔ። 11 አሳይ ባረ ላግያና ሃሳይያዋዳን መꬍና ጎዳይ ሙሴና ስንꬃን ኤቂደ፥ ሃሳዬ። ሄዋፐ ጉይያን ሙሴ አሳይ ዱንካኔዳ ሳኣ ጉየ ስሜ፤ ሽን አ ማድያ ያላጋይ፥ ነዊ ናኣ ኢያሱ፥ ጋከትያ ዱንካንያፐ ሻከተና።

12 ሙሴ መꬍና ጎዳ ሀዋዳን ያጌዳ፤ “ኔን ታና፥ ‘ሀ አሳ ካለꬃ’ ያጋዳ፤ ሽን ታናና ኔን ኦና ኪታንንቶ፥ ታና ኤርሳበይካ። ኔን፥ ‘ታን ኔና ሱንꬃን ኤራይ፤ ቃይካ ኔን ታናን ናሸታዳ’ ያጋዳ። 13 ኔን ታና ናሼዳዋ ግዶፐ፥ ታን ኔና ኤራና ማላነ ስንꬃዉካ ኔና ናሸቻደ ደአና ማላ፥ ነ ኦግያ ታና በሳ። ሀ አሳይ ነ አሳ ግድያዋ ሀሳያ” ያጌዳ።

14 መꬍና ጎዳይ ዛሪደ፥ “ታን ኔናና ባና፤ ታን ኔና ሸምፕሳና” ያጌዳ።

15 ያትና ሙሴ አ፥ “ኔን ኑናና ቤናዋ ግዶፐ፥ ሀዋፐ ኑና የዶፓ። 16 ኔን ኑናና ቤናን ꬋዮፐ፥ ታናንነ ነ አሳን ኔን ናሸቴዳዋ አሳይ ኡባይ ዎት ኤራናዌ? ቢታ ኡባን ደእያ ሀራ አሳ ኡባፐ ታናነ ነ አሳ ዱማይያዌ ሀራባይ አዬ?” ያጌዳ።

17 መꬍና ጎዳይ ሙሳ፥ “ታን ኔናን ናሸቴዳ ድራዉነ ኔና ነ ሱንꬃን ኤርያ ድራዉ፥ ኔን ታና ኦቼዳ ሀ የዉዋ ታን ኦꬃና” ያጌዳ።

18 ያትና ሙሴ፥ “ነ ቦንቹዋ ታና በሳርኪ?” ያጌዳ።

19 መꬍና ጎዳይ፥ “ታን ታ ሎኦተꬃ ኡባ ነ ስንꬃና አꬃና፤ ታ ጌሻ ሱንꬃካ ነ ስንꬃን አዋያና። ታን መꬍና ጎዳ፤ ታን ሎአናዉ ኮይያዋንቶ ሎአና፤ ቃይ ቃረታናዉ ኮይያዋንቶካ ቃረታና። ሮመ 9:15 20 ሽን ኔን ታ ዴሙዋ በአካ፤ አያዉ ጎፐ፥ ኦንነ ታና በኢደ ሸምፑዋና ደኤና” ያጌዳ።

21 ሄዋፐ ጉይያን መꬍና ጎዳይ፥ “ኔን ዛላ ቦላ ኤቃናዉ ሀዋን ታ ማታን ሳአይ ደኤ። 22 ታ ቦንቹ አꬍያ ዎደ፥ ታን ኔና ጳልቀቴዳ ዛላ ግዶን ዎꬃና፤ ታን አꬋና ጋካናዉ፥ ታ ኩሽያን ኔና ካማና። 23 ሄዋፐ ጉይያን ታን ታ ኩሽያ ድግና፥ ኔን ታ ዞኪያ በአናሳ፤ ሽን ታ ሶምእ በኤተና” ያጌዳ።