1 መꬍና ጎዳይ ሙሳ ሀዋዳን ያጌዳ፤ “ኮይሮዋንታ ማላትያ ላኡ ሹቻቱዋ ማሳደ ጊግሳ፤ ያቶፐ ታን ሄ ማሰቴዳ ሹቻቱዋ ቦላ ካሰ ኔን መንꬄዳ ሹቻቱዋ ቦላን ደእያ ቃላቱዋ ጻፋና። 2 ዎንታ ዎንታ ፑደ ሲና ደርያ ከሳናዉ ጊጋ፤ ያታደ ታና ያን ደርያ ሁጲያን ኤቃ ናጋ። 3 ኔናና ኦንነ ከሶፖ፤ ዎይ ደርያ ቦላ ሀቃንካ ቤቶፖ፤ ሀራይ አቶ ዶርሳ ዉዲ ዎይ መህያ ዉዲካ ደርያ ስንꬃን ሄመቶፖ” ያጌዳ።

4 ሄዋ ድራዉ፥ ሙሴ ኮይሮ ሹቻቱዋ ማላትያ ላኡ ሹቻቱዋ ማሲደ መꬍና ጎዳይ አዛዜዳዋዳን፥ ሹቻቱዋ ባረ ኩሽያን ኦይቂደ፥ ዎንታ ጉራና ፑደ ሲና ደርያ ከሴዳ። 5 መꬍና ጎዳይ ሻርያን ዱገ ዎꬊደ፥ አናና ያን ኤቄዳ፤ “ታን መꬍና ጎዳ” ያጊደ ባረ ሱንꬃ አዋዬዳ። 6 መꬍና ጎዳይ ሙሴ ስንꬃና ሀዋዳን ያጊደ አዋዪደ አꬌዳ፤ “ታን መꬍና ጎዳ፤ ታን መꬍና ጎዳ፤ ቃረታይነ ማሮተꬃይ ኩሜዳ ጾሳ፥ ዳንዳያንቻ፥ አገና ሲቁ ዳሬዳዋነ ዳሪ አማነትያዋ። ከሳ 20:5-6፤ ፓይ. 14:18፤ ዛረ. 5:9-10፤ 7:9-10 7 ታን ታ አገና ሲቁዋ ሻአቶ ናግያዋ፤ ኢታተꬃ፥ ማካላነ ናጋራ አቶ ያግያዋ። ግዶፐካ፥ ባይዞዋ ሙረናን አገናዋ፤ አዎቱዋ ናጋራ ድራዉ ናናነ ናናቱዋ ናና፥ ሄዘንꬆ የለታነ ኦይደንꬆ የለታ ጋካናዉ ሙርያዋ” ያጊደ አዋዬዳ።

8 ሄዋፐ ጉየ ሙሴ ኤለካ ቢታን ጉፋኒደ ጎይኔዳ፤ 9 “አቤት ጎዳዉ፥ ኔን ታናን ናሸቴዳዋ ግዶፐ፥ ኑናና እትፐ ደንዳ። ሀዌ አሳይ ሞርጊ ꬉሌፋቴዳዋ ግዶፐነ፥ ኑ ኢታተꬃነ ኑ ናጋራ አቶ ያጋደ፥ ኑና ነ አሳ ኦꬃ” ያጌዳ።

10 ያትና መꬍና ጎዳይ ሀዋዳን ያጌዳ፤ “ታን ህንተናና ቃላ ጫቁዋ ገላድ፤ ሀዋፐ ካሰ ሳኣ ኡባን ደእያ ካዉተꬃ ኡባን ሀን ኤረና ማላልስያባ ነ አሳ ኡባ ስንꬃን ኦꬃና፤ ታን መꬍና ጎዳይ፥ ህንተንቶ ኦꬅያ ኪታይ አይ ኬሻ ማላልስያበንቶ ኔን ኡንቱንቱ ግዶን ደእያ አሳይ ኡባይ በአና። 11 ሀቼ ታን ህንተንታ አዛዝያ አዛዙዋ ናግተ፤ ህንተንቱ ስንꬃፐ አሞረቱዋ፥ ካናነቱዋ፥ ሂተቱዋ፥ ፓርዘቱዋ፥ ሂዌቱዋነ ያቡሳቱዋ ታን የደርሳና። 12 ኡንቱንቱ ህንተንቶ ጲረ ግደና ማላ፥ ህንተንቱ ብያ ጋድያን ደእያ አሳና ቃላ ጫቁዋ ገሎፕተ። 13 ኡንቱንቱ ያርሽያ ሳኣ ኮልተ፤ ኡንቱንቱ ጎይንያ ሹቻቱዋካ መንሬꬅተ፤ ቃይ አሼሮ ጌተትያ ኡንቱንቱ ማጫ ጾሳት ካሻ ቃንጸሬꬅ ኦልተ። ዛረ. 16:21 14 ታን መꬍና ጎዳይ ቃናትያ ጾሳ ግድያ ድራዉ፥ ታፐ ሀራ ጾሳቶ ጎይኖፕተ።

15 “ሄ ጋድያን ደእያ አሳቱዋና አያ ቃላ ጫቁዋካ ገሎፕተ፤ አያዉ ጎፐ፥ ኡንቱንቱ ታናን አማነተናን እጺደ ባረንቱ ጾሳቱዋ ካልያ ዎደነ ኡንቱንቶ ያርሽያ ዎደ፥ ኡንቱንቱ ህንተናካ ሾባና፤ ህንተንቱ ኡንቱንቱ ያርሾቱዋ ማና። 16 ቃይ ህንተንቱ ኡንቱንቱ ማጫ ናናቱዋፐ ዶሪደ፥ ህንተንቱ አቱማ ናናቶ እማና፤ ሄ ዎደ ሄ ማጫ ናናይ ታናን አማነተናን እጺደ፥ ባረንቱ ጾሳቱዋ ካሊደ፥ ህንተንቱ አቱማ ናናካ ባረንቱዋዳን ኦስሳናዋንታ።

17 “ህንተንቶ ጎይንያ ጾሳቱዋ አያፐካ ሲልሲደ መꬎፕተ።ከሳ 20:4፤ ዎጋ 19:4፤ ዛረ. 5:8፤ 27:15

18 “ማጋገ ኡክꬃ ባላ ቦንችተ፤ ታን ህንተንታ አዛዜዳዋዳን፥ ላፑን ጋላሳዉ እርሹ ገለናን ኡከቴዳ ኡክꬃ ሚተ፤ ሄዋካ ህንተንቱ ግብጼፐ ከሴዳ አቢባ አግናን ኦꬅተ።ከሳ 12:14-20፤ ዎጋ 23:6-8፤ ፓይ. 28:16-25

19 “አት ኡሉዋፐ ባይራ የለትያ አቱማ ናኣ ኡባይ ታዋ፤ ህንተንቱ መህያ ኡባፐ ቦራ ግድና፥ ዎይ ዶርሳ ግድና፥ ባይራይ ታዋ፤ ከሳ 13:2 20 ኮይሮ የለቴዳ ሀርያ ማራ ዶርሳ ማራና ላማደ ዎዛ፤ ዎዛና ꬋዮፐ፥ አ ቆꬍያ መንꬃደ ዎꬋ። ነ ናናቱዋፐ ባይራ የለቴዳ አቱማ ናኣ ኡባ ዎዛ። ከሳ 13:13

“ኦንነ እምያዋ ኦይቀናን፥ መላ ኩሽያና ታ ስንꬃን ቤቶፖ።

21 “ኡሱፑን ጋላሳ ኦꬅተ፤ ሽን ላፑንꬃ ጋላሳን ሸምፕተ፤ ጎሽያ ዎድያን ቃይ ካꬃ ጫክያ ዎድያን ላፑንꬃ ጋላሳን ሸምፕተ። ከሳ 20:9-10፤ 23:12፤ 31:15፤ 35:2፤ ዎጋ 23:3፤ ዛረ. 5:13-14

22 “ባይራ ዘረቴዳ ዛርጋ ህንተንቱ ጫክያ ዎደ፥ ሳምንታቱዋ ባላ ቦንችተ፤ ላይꬃ ዉርሰꬃ ካꬃ ሺሽያ ዎደካ፥ ሺሹዋ ባላ ቦንችተ። ዎጋ 23:15-21፤ ፓይ. 28:26-31 23 ላይꬃን ሄዙ ገደ እስራኤልያ አቱማ አሳይ ኡባይ ኡባ ሞድያ ጾሳ፥ እስራኤልያ መꬍና ጎዳ ስንꬃን ቤትኖ። 24 ካዉተꬃቱዋ ታን ህንተንቱ ስንꬃፐ የደርሳደ ከሳና፤ ያታደ ህንተንቱ ዛዋ ታን አሳና። መꬍና ጎዳ ህንተንቱ ጾሳ ስንꬃን ህንተንቱ ላይꬃን ሄዙ ገደ ቤታናዉ ፑደ ከስያ ዎደ፥ ኦንነ ህንተንቱ ጋድያ አሞተና።

25 “ህንተንቱ ታዉ ሱꬃ ያርሹዋ ያርሽያ ዎደ፥ እርሹዋ የጊደ ኡኬዳ ኡክꬃና ያርሾፕተ። ፓስጋ ቦንችያ ጋላሳዉ ያርሼዳ ያርሹዋፐ ዎንትዉ አያይነ አቶፖ። ከሳ 12:10

26 “ህንተንቱ ጋደን ባይራ ካኤዳ ካꬃፐ ኮይሮ ሙሩታ መꬍና ጎዳ ህንተንቱ ጾሳ ጎልያ አህተ። ዛረ. 24:21፤ 26:2

“ዴሻ ማራ አ አት ማꬃን ዶይሶፕተ” ያጌዳ።

27 መꬍና ጎዳይ ሙሳ፥ “ታን ኔናናነ እስራኤልያ አሳና ቃላ ጫቁዋ ገልያዌ ሀ ቃላቱ ግያ ማራና ግድያ ድራዉ፥ ሀ ቃላቱዋ ጻፋ” ያጌዳ። 28 ሙሴ ቁማ ሜናንነ ሃꬃ ኡሸናን፥ ኦይታሙ ጋላሳነ ኦይታሙ ቃማ መꬍና ጎዳና ያን ጋምኤዳ፤ ቃላ ጫቁዋ ቃላቱዋ፥ ታሙ አዛዙዋ ማሰቴዳ ሹቻን ጻፌዳ።

29 ሙሴ ጾሳና ሃሳዪደ ጋምኤዳ ድራዉ፥ ሄ ላኡ ማርካተꬃ ሹቻቱዋ እ ባረ ኩሽያን ኦይቂደ ሲና ደርያፐ ዱገ ዎꬌዳ ዎደ፥ አ ሶምኢ ፖኤዳ፤ ሽን እ ሄዋ ኤርቤና። 2 ቆሮ. 3:7-16 30 አሮነነ እስራኤልያ አሳይ ኡባይ ሙሳ ጼሊደ፥ አ ሶምኢ ጶልያዋ በኤድኖ፤ ኡንቱንቱ አኮ ሺቃናዉ ያዬድኖ። 31 ሽን ሙሴ ኡንቱንታ ጼስና አሮነነ ሽቁዋ ካለꬅያ ካፓቱ ኡባይ አኮ ስሜድኖ፤ እ ኡንቱንታ ሃሳይሴዳ። 32 ሄዋፐ ጉይያን እስራኤልያ አሳይ ኡባይ አኮ ሺቅና መꬍና ጎዳይ አዉ ሲና ደርያን እሜዳ አዛዙዋ ኡባ እ ኡንቱንቶ እሜዳ።

33 ሙሴ ኡንቱንቶ ኦድያዋ ዉርሴዳ ዎደ፥ ባረ ዴሙዋ ናጻላን ካሜዳ። 34 ሽን ሙሴ መꬍና ጎዳ ስንꬃ አናና ሃሳያናዉ ገልያ ዎደ አዉደነ ከሳና ጋካናዉ፥ ናጻላ ባረ ሶምኡዋፐ ቃር ድጌ። ሄዋፐ ከሲደ፥ መꬍና ጎዳይ አዛዜዳዋ እስራኤልያ አሳዉ ኦዴ። 35 ኦድያ ዎደ፥ ኡንቱንቱ አ ሶምኢ ጶልያዋ በኤድኖ። ሄዋ ድራዉ፥ ሙሴ መꬍና ጎዳና ሃሳያናዉ ባና ጋካናዉ፥ ባረ ዴሙዋ ዛረꬂደካ ናጻላን ካሜ።